Afiriki
sennantolantan tɔnba (CAF) ye jalatigɛlaw kofɔ minnu bɛna KANI 2025 balontanw
file fiyɛ Marɔku k’a daminɛ desanburukalo tile 21 na san 2025 ka se zanwuyekalo
tile 18 ma san 2026. Maliden fila b’u cɛla ; n’o ye Bubu Tarawele «
Peni-Peni», cɛmancɛla jalatigɛla ani Modibo Samakɛ, dɛmɛnbaa jalatigɛla.
Nin
jalatigɛla fila in yera dɔ farali u ka dɔnniyaw kan o kalanw na Kɛri, Eziputi
faaba la nowanburukalo in tile 8 ka se a tile 13 ma. U mumɛ ye jalatigɛla 73 ye
minnu sugandira KANI nata in filefiyɛ kama, u tilalen don nin cogo la :
cɛmancɛla jalatigɛla 28, dɛmɛnbaa jalatigɛla 31 ani widola jalatigɛla (VAR) 14.
Tuma
min na jalatigɛlaw sugandili jaabiw bɔra, telefɔni fɛ Bubu Tarawele y’a jira
ko, nin ye bonyaba ye ka ɲɛsin ale ma siɲɛ saba ka da ɲɔgɔn kan KANI na,
Kameruni san 2021 ani Kɔnɔwari san 2023. A ko a nisɔndiyalen bɛ ye kɛnɛ kan
Marɔku n’a tɔɲɔgɔnkɛ Modibo Samakɛ ye. Wa k’u bɛna u seko kɛ Mali tɔgɔ yanganni
na.
A ka fɔ la,
a ka di jalatigɛla bɛɛ ye ka ye KANI kɛnɛ kan. A k’u kelen tɛna kɛ Marɔku,
Sɛgɛw fana bɛna kɛ yen, wa ko a jigi b’a kan k’olu bɛna se ka taa yɔrɔ jan na.
Bubu Tarawele senkɔrɔmadonbaaw de b’a wele ko Peni-Peni. Modibo Samakɛ fana y’o
nisɔndiya kelen jira. Jalatigɛla bɛɛ bɛ sogo ni KANI kɛnɛ lasɔrɔli ye.
A ko nin
bɛna kɛ dɔnniya kura sɔrɔli ye u bolo. Wa ko nin bɛna kɛ ale siɲɛ 2nan ye KANI
kɛnɛ kan Kɔnɔwari ta kɔfɛ san 2023. A ko ale ni a balimakɛ Bubu Tarawele bɛna
taa Marɔku janjo la ka Mali darapo kɔrɔta, ani u mako bɛ Maliden bɛɛ ka dugawu
la u ka se k’u taakun waleya ni jigifa ye.
Mali
sennantolantan tɔnba (Femafoot) sekeretɛri zenerali Sidi Bekayi Magassa ko
Maliden jalatigɛla fila sugandili ka ye KANI kɛnɛ kan, o ye bonyaba ye ka ɲɛsin
Mali balontan ma, kɛrɛnkɛrɛnnenya la jamana jalatigɛko ma. A ɲɛna Mali bɛna ye
KANI kɛnɛ kan ni jalatigɛla fila ye, kelen ye cɛmancɛla jalatigɛla ye ani
dɛmɛnbaa jalatigɛla kelen. Femafoot tɔgɔ la, a ye dugawu kɛ Bubu Tarawele
ani Modibo Samakɛ ye.
Dɔkala
Yusufu JARA
Jɛnɛba
BAGAYƆGƆ
Dɔkala Yusufu Jara
Conseil des ministres.
Amélioration de la crise du carburant.
Année de la Culture.
Page noire.
Sortie de promotion à l'EMIA.
Sport.
