Kanpaɲi in
baara kɛtaw ye : « tile 16 wulikajɔ ɲangata minnu bɛ ta ka suguya sɛgɛrɛ (VBG)
olu kɛlɛli hukumu kɔnɔ » o b’a tan ni fila fili la. O siratigɛ la, mɔgɔ
ɲangatalen dɔ a hakili la o sɔnna ka lakali k’an ye hali n’a y’a bugunnatigɛ to
gundo la. Bamakɔ faaba komini I sigibaa don, min y’a jira ko a furucɛ bɛ k’a
mako bɔ a la a san saba ye nin ye k’a sababu kɛ opereli dɔ ye jiginni senfɛ.
N b’a fɛ k’a fɔ jiginni
kɛtɔ, musoya dugumanan farali dɔɔnin walasa den ka se ka bɔ.
A ko cɛ in tɛ dumuni di
ale ma tuguni, wa a t’a denw furakɛ n’u banana. A ko ale de wajibiyalen don
sisan ka jago misɛnninw kɛ, kɛrɛnkɛrɛnnenya la finikosarala, ani fɛn misɛnninw
feereli walasa a bɛ se k’a ni a denw balo, ka fara fɛɛrɛbɔw ni furasɔngɔw
sɔrɔli kan. A ko hali mɔgɔ minnu b’u furucɛ ka du kɔnɔ luwanse la, a sinamuso
b’olu bali ka dumuni di ale ma. A b’a fɔ ko n’a ye min ye ka dumuni di olu ma,
a b’o gɛn ka bɔ so kɔnɔ.
A cɛ ye kuran tigɛ a la
so kɔnɔ. Ale dun denkɛ fɔlɔnin tɛ sɔn ka don so kɔnɔ sufɛ k’a sababu kɛ dibi ye.
Dusukasi ani degun bɛ muso in kan, nka a t’a fɛ ka bɔ a cɛ ka so, furucɛ in ka
tɔɔrɔ n’a ta bɛɛ. Nin ye muso degunnen in san 5 ye a ka furu kɔnɔ, wa ko a ye
mɔgɔ caman bila ka kuma a cɛ fɛ, nka halibi a sɔnnen tɛ ka sabali k’a to mɔgɔ
si ta la, alimamiw, a somɔgɔw an’a cɛ somɔgɔw b’o la.
Jigilatigɛ fɛ muso in
sera musow ka hakɛw lafasatɔn dɔ ma. Yen, Ayisa Burama Jara y’a bilasira
koɲuman, o ye erezo « Musow, hakɛw ani yiriwali » (Wildaf-Mali) ka kɛnɛyako
ɲɛmɔgɔ ye. O y’a jira ko muso degunnen in ka laɲinin kɔnɔ, ale ka cakɛda y’a
ɲinin k’a furucɛ kumaɲɔgɔnya ni bataki dɔ cili ye o ma a ka na. Nka ko a cɛ y’a
ban k’o bataki in minɛ ka da a kan ko « sogo bilen tigi de bɛ tasuma bilen
tigi sɛgɛrɛ ». Ko u mako de b’ale la, n’o tɛ ale mako t’u la. N’a b’u ma u
na ale sɛgɛrɛ. O de kosɔn (Wildaf) y’a ɲinin ka Ayisa bila ka se a ma.
ƝANGATAW DEGUN- Sanni u ka ɲɔgɔnye don
cɛ, a banna k’u ka telefɔni ta ɲɔgɔnye ma se ka kɛ tuguni cɛfɔliko la. N’u y’a
ŋaniya fana ka taa n’u yɛrɛ ye yen ten kasɔrɔ o yamaruya t’u bolo, o y’u ka
cakɛda sariyaw sɔsɔli ye.
Nin taabolo min filɛ
muso in furucɛ kɔrɔ, o tɛ jigisigi di a ma ka to du kɔnɔ tuguni. A ko an bɛ
waati min na ale b’a fɛ ka furusa ɲinin ka da a kan a ka sɔrɔ t’a to a ka se k’a
jɔ n’a ni a denw balo ye bilen, o kumaw fɔra ni ɲɛji ye. Opereli min dara a kan
jiginni senfɛ, o de kɛra a ka gɛlɛya sababu ye. (Wildaf Mali) sera k’o
furakɛ, o ye hakilisigi dɔɔnin di a ma kɛnɛyako fanfɛ hali n’a cɛ tɛ k’a jate
halibi. Musoya banaw dɔnbaa ŋana min ye dɛmɛn don Wildaf Mali la muso in
furakɛli la, o ka fɔ la, a cɛ bɛ k’a fili bolo kɔfɛ, k’a sababu kɛ ko a tɛ
daamu sɔrɔ a fɛ kafoɲɔgɔnya la tuguni.
Degun min bɛ muso in kan, o ye a kɛli ye ka opereli in dogo ka mɛɛn k’a sɔrɔ a
m’a dɔn ko a bɛ se ka labɛn. A kɛra waleya ye a t’a fɛ min ɲɔgɔnna ka kɛ muso
wɛrɛ si la. Wa a b’a ɲinin muso tɔw fɛ, a kɛra bana suguya o suguya ye, u kana
a dogo, u k’a lakali min b’a to fura bɛ sɔrɔ a la, ani min b’a to a bɛ se ka
faamuya hinɛ ka k’u la. Min ye nin muso in sɔrɔ, a ɲɔgɔnna bɛ kɛ ka caya
an sigidaw la. Ayisa Burama Jara y’a jira ko a ɲɔgɔnna ɲangata 22.777 kɛra san
2024 kɔnɔ, 3.202 ye hakili ɲangatali ye y’o la, ɲangata minnu bɛ ta ka suguya
sɛgɛrɛ (VBG) o ka kunnafoniko tɔpɔtɔli cakɛda (SGIVBG) ka fɔ la. A ko min
nimisa b’ale la, o ye hakili ɲangatali kɛbaliya ye kojugu ye mɔgɔ caman bolo. Kasɔɔ
a bɛ se ka mɔgɔ bila yɛrɛ faga la. A b’a ɲinin furuɲɔgɔnw fɛ, u ka kumaɲɔgɔnyaw
kɛ ni sigida mɔgɔbaw ye ani ni denmisɛnninw ye.
Dɔkala
Yusufu JARA
Mohamɛd JAWARA
Dɔkala Yusufu Jara
Rencontre sur l'AES.
Rencontre Primature.
Conseil des ministres.
Amélioration de la crise du carburant.
Arbitres.
Année de la Culture.
