Kameruni balontanna kɔrɔ sugandira araba marisikalo tile 12 san 2025 « CAF » ka lajɛba 14nan senfɛ Kɛri Eziputi faaba la ka don ɲɛmɔgɔkulu kɔnɔ. A bɛna san naani sarati kɛ kulu in baara la, (Fecafoot) ɲɛmɔgɔba in bɛna Afiriki cɛmancɛbolo jɔyɔrɔ fa « CAF » kɔnɔ. A bɛnna mɔgɔ caman ma. Sugandili in kɛra tile fila balontanna kɔrɔ in bangeli sanyɛlɛma 44nan laɲɛnamayalen kɔfɛ. O tun ye marisikalo tile 10 ye san 2025. San 2025 zanwuyekalo la, « CAF » tun y’a ban ka a ɲɛmɔgɔya ɲininsɛbɛn minɛ Samuyɛli Eto’o bolo ; sabula ko « FC Bariselɔni » balontanna kɔrɔ in ye balontanko sariyaw sɔsɔ n’a kɛli ye lasigiden ye soboncakɛda dɔ la. Eto'o tun y’a ka nisɔngoyajirasɛbɛn don « CAF » kiiriko cakɛda la. O kiiri da diyara a la, fo o y’a ɲinin « CAF » k’a ka sɛbɛn minɛ. An b’aw ladɔnniya, ko « CAF » ɲɛmɔgɔba Patirisi Motisepe min kelen tun bɛ k’a yɛrɛ jɔyɔrɔ in ɲinin kokura, a sugandira k’a to jɔyɔrɔ in na san naani kura kuntaala kama. Patirisi Motisepe bangera zanwuyekalo tile 28 san 1962 Soweto. Awoka don, makobatigi don, Afirikidisidi faikoloɲɛnakɛtɔn dɔ fana ɲɛmɔgɔ don. Cakɛda min ɲɛsinnen bɛ sanu, pilatini, nɛgɛ dɛɲɛ, ani sarabon feereli ma n’o tɔgɔ angilɛkan ye African Rainbow Minerals ye, o ɲɛmɔgɔ don. Afirikidisidi ntolantantɔn min bɛ wele Mamelodi Sundowns, o fana ɲɛmɔgɔ don. A sugandira ka kɛ « CAF » ɲɛmɔgɔba ye marisikalo tile 12 san 2021. O sarati dafalen a ye jɔyɔrɔ in ɲinin kokura k’a sɔrɔ san 4 kura kama. Dɔkala Yusufu JARA. Makan SISƆKƆ
Dɔkala Yusufu Jara
Visite du PM du Niger.
Réflexion sur la démocratie.
Transfert de compétence.
Semaine nationale de l'harmonisation des symboles de l'Etat.
Vote de loi de finances 2026.
Rencontre sur l'AES.
