Minisiriɲɛmɔgɔ
Zenerali de diwisɔn Abudulayi Mayiga, bɛ ka ɲɛfɔli kɛ kunnafonidilaw ye,
gɔfɛrɛnaman minisiri saba b’a kɛrɛfɛ
Jamanakuntigi
ye lajɛ gonin min hakilila ta n’a kɛra jamanakuntigiso la Kuluba kunun, nin
kunnafoni in de bɔra o kɔnɔ. Minisiriɲɛmɔgɔ, mara ni desantaralizasɔn minisiri
Zenerali de diwisɔn Abudulayi Mayiga, Nafoloko ni wariko minisiri Aluseni Sanu,
baarako, gɔfɛrɛnaman baara ni hadamadenya fɔkabɛn minisiri Fasun Kulubali,
jamana jɔli kura minisiri Bakari Tarawele ka ɲɛsin gɔfɛrɛnaman ni fangabulonw
cɛ koɲɛnabɔ ma, olu tun b’a kɛnɛ kan.
Nin lajɛ in
kɛra tile tan gɔfɛrɛnaman ani sigidaw tɔgɔla baarakɛla hakɛ jateli cakɛda
(SIGRH) ka seereyasɛbɛn dilen kɔ furancɛlafanga jamanakuntigi ma.
Lajɛ in
kuncɛlen, minisiriɲɛmɔgɔ ye laseli kɛ kunnafonidilaw ye k’a jira ko a ye
jamanakuntigi karankun dɔn nin ko in ma, k’a ɲinin ka sigikafɔba laɲininw
waleya, a seginna o min kan (SIGRH) ka seereyasɛbɛn didon a ma o kɛnɛ kan. Zenerali
de diwisɔn Abudulayi Mayiga ka fɔ la, Zenerali darimɛ Asimi Goyita ka laɲinin
faamuyara. A ko ni Ala sɔnna, don nataw la, laɲinin dɔw bɛna waleya,
kɛrɛnkɛrɛnnenya la fɛn min ye baarakɛla 36.000 bisigilenw kunkanko ye, jate
bɔra minnu kan nin waati in na. A ye hakililajigin kɛ, k’o kunnafoni dira
utikalo tɛmɛnnen in tile 15, ka kangari da baarakɛla 36.000 bisigilen ninnu ye,
ko kalo saba sarati de b’u bolo ka na u yɛrɛ bugunnatigɛ. Yanni o sarati in ka
dafa, furancɛlafanga jamanakuntigi y’a miiri, ko a ɲuman ye ka kow sennateliya.
O de kosɔn a ye yamaruya di, dabali jɔnjɔnw ka ta ka ɲɛsin mɔgɔ kofɔlen ninnu
ma ; sabula ko kalosara min bɛ ka taa u kunko dafɛ san kɔnɔ, o ka ca ni
sefawari miliyari 48 ye.
Don nataw
la, Zenerali de diwisɔn Abudulayi Mayiga ka fɔ la, dabali minnu mana tigɛ a ko
la, o tɛna dogo fasojama na laɲininw waleyali hukumu kɔnɔ. A y’a jira ko kalo
saba sarati min dara u ye o bɛ yen, wa u ka kalosaraw dili bɛ lajɔ fɔlɔ, magɛlɛyali
wɛrɛw kɛra gɔfɛrɛnaman ye o siratigɛ la. A fɔra ko dabali wɛrɛw fana bɛna tigɛ.
Don nataw la kunnafonidilaw bɛna o kunnafoniw sɔrɔ ni faranfasiya jɛlenw ye
minisiriw fɛ, a gɛlɛya bɛ minnu kan.
Hakililajigin na, juma utikalo in tile 15 san 2025, jamana jɔli minisiri ka ɲɛsin gɔfɛrɛnaman ni fangabulonw cɛ koɲɛnabɔ ma, o ye gɔfɛrɛnaman ani sigidaw tɔgɔla baarakɛlaw hakɛ jateli cakɛda (SIGRH) ka seereyasɛbɛn di furancɛlafanga jamanakuntigi ma. Laɲininw tun kɛra o dabali kofɔlenw waleyaliko la, Mali fasojama y’o min kɛ a ka sigikafɔba senfɛ. Ka da a kan, fasojama haminankobaw dɔ ye gɔfɛrɛnaman ani sigidaw tɔgɔla baarakɛlaw hakɛ dɔnni ye.
Dɔkala Yusufu Jara
Conseil des ministres.
Amélioration de la crise du carburant.
Arbitres.
Année de la Culture.
Page noire.
Sortie de promotion à l'EMIA.
