Taamasiyɛnnan saba jɔra jamanakuntigi kɔrɔ Alifa Umaru Konarɛ tile kɔnɔ ka hakililajigin kɛ san 1991 wulikajɔba la. U jɔyɔrɔw an’u jɔcogo, ani kɛrɛnkɛrɛnnenya la nafa min b’u la, o bɛ fɛn fɔlɔ min jirali daminɛ, o ye Mali dugubaw cɛɲɛni ye. Ani seko ni dɔnko waleyaw jirali, ka da u dilanbaaw dɔnkow kan an tariku kɔrɔ ni kura kɔnɔ, ani nsiirinw ni maanaw ka fara masakɛfanga tɛmɛnnenw kow kan, fo ka se jamana kelen denya ma, o min y’a daminɛ k’a yɛrɛ dilan kabini waati jan. Aw b’a la ka sɛbɛn min kalan sisan, an tɛna se ka yaala ka bɔ jamana kɔnɔ taamasiyɛnnan bɛɛ la, minnu dabɔra marisikalo tile 26 kama. An bɛ dan waleya minnu kɛra a kow la Bamakɔ ; o min ye Mali duguba fɔlɔ ye. A taamasiyɛnnanw fɔlɔ ye Seyiduw taamasiyɛnnan ye. O bilala a waati gɔfɛrɛnaman ka yecogo kɔnɔ, ka mɔgɔ bɔnɛnenw miiriya tagan, minnu y’u tɔgɔw don an ka jamana tariku kɔnɔ. O taamasiyɛnnan in filɛ Seyidusuw tɔgɔla babili da la Bajoliba numanbolo kan Karicedifulowu la Bamakɔ. O dabɔra ka hakililajigin kɛ demokarasi nɔfɛ wulikajɔba mɔgɔ bɔnɛnenw u ni na, olu kama. I bɛ fɔlɔ ka fɛn min ye ka lasa o taamasiyɛnnan in kan, o ye muso dɔ kasibaatɔ ye, a ɲɔgirinnen don a den su kunnan. Taamasiyɛndilanna Some Kulubali bolonɔ y’o ye ja in kan. I bɛ fɛn filanan min kɔlɔsi ja kelen in kan kokura, o ye jama sigimajɔlen ye ni banbaatɔ ye, ka kule a kunnan, kisɛ kɛlen k’a minɛ a kunkolo la. O yɔrɔ in ye taamsiyɛndilanna Isimayɛli Jabatɛ bolonɔ ye. O fɛn fila ja in kan, olu bɛ gɛlɛyaw kofɔ, minnu ye fasodenw sɔrɔ demokarasi sɔrɔli sira fɛ ; o demokarasi min yɛrɛ selen tɛ ka basigi fɔlɔ an fɛ. Nka a ɲininni taama kɔnɔ, Ala m’an hinɛna jamanakuntigi kɔrɔ Zenerali darimɛ Musa Tarawele la, fiɲɛ taara n’o ka fanga ye marisikalo tile 26 san 1991. Taamasiyɛnnan in yɛrɛ kurunbonkarila marisikalo tile 29 san 1995, jamanakuntigi Alifa Umaru Konarɛ fɛ. Dekere n° 2012-118/P-RM min tara feburuyekalo tile 24 san 2012, o y’a kɛ faso cɛn ye seko ni dɔnko nasira la, ka da a nafa kan tariku kɔnɔ, sabula a b’an ka dilanni an’an ka hadamadenya seko ni dɔnko maana. I bɔlen kɔ seyidusuw taamasiyɛnnan na Bajoliba da la ka na Ɲarɛla kaburudo la, seyidusuw kaburu bɛ yen. Jamana in maaba caman dalen bɛ yen, hali a dɔw dɔnnen tɛ mɔgɔ caman fɛ ; nka latigɛ y’u dayɔrɔ bɛn yen ma. Marisikalo tile 26 an 1991 mɔgɔ bɔnɛnen caman fana bɛ yen, yɔrɔ dantigɛlen dɔ kɔnɔ ; o yɔrɔ in de bɛ wele «Seyidusuw kaburu». A bɛ se ka kɛ a mɔgɔ bɔnɛnen dɔw y’o ye ; nka an tɛ se k’a fɔ k’u bɛɛ don ; sabula an t’a seere ye ko dɔw donna fan wɛrɛw fɛ. Seyidusuw kaburu dilannen don ka kɛ digɛnba saba ye mɔgɔ caman bɛ minnu kɔnɔ, ani mɔgɔ kelen kaburu 8 wɛrɛw. Faso cɛnko seko ni dɔnko nasira la, o ɲɛmɔgɔso kuntigiba ka fɔ la, marisikalo tile 26 mɔgɔ bɔnɛnen fanba ye lakɔlidenw ye. I n’a fɔ Abudulu Karimu Kamara n’a tun bɛ wele Kabarali, o ɲɔgɔnnaw. A bɛ se ka bisigiya dɔw ka fɔ la, ko lakɔlidenw ka tɔnba (AEEM) de kɛra marisikalo tile 26 wulikajɔba kalamɔɲɔ ye. Abudulu Karimu Kamara tun bɛ lakɔlidenw ka tɔnba min na, o tun bɛ wele tubabukan daɲɛ surun na «Uneem». O sigira senkan san 1970 waati la ka baara kɛ ka se san 1980 ma. Nin kalanden tɔnba fila in y’u kɔgɔ da waatiw fangaw la. O kɛra sababu ye faamaw ka bɔnɛ jigin u kan. Abudulu Karimu Kamara « Kabarali » min tun ye Uneem ɲɛmɔgɔba ye, o ni tora o la. Taamasiyɛnnanba dɔ jɔra ale tɔgɔ la Bamakɔ kɔnɔ. O kurunbonkarila zuwɛnkalo tile 15 san 1996 Lafiyabugu dankunba la. Abudulu Karimu Kamara fagara marisikalo tile 17 san 1980. A fagali sanyɛlɛma o sanyɛlɛma, gɔfɛrɛnaman fɛn o fɛn tɛmɛnna san 1992 ni bi cɛ, o b’o laɲɛnamaya ni jirifeere dali ye taamasiyɛnnan in kan. « Piramidi di suweniri » y’a taamasiyɛnnanw sabanan ye. O jɔlen don k’a mɔɔnɔbɔ ka yɛlɛn sanfɛ. O fana dabɔra san 1991 wulikajɔba mɔgɔ bɔnɛnenw hakililajiginnanko kama, ani mɔgɔ o mɔgɔ ni tora kannabila ɲininni ani hadamadenya hakɛw dafaliko la Mali kɔnɔ. Seko ni dɔnko kunkanko caman bɛ waleya o piradi di suweniri in na. Ɲininni, hakilijakabɔ ani komaɲagan politiki cogoyaw bɛ siri yen demokarasi kɛcogo la ka mɛɛn si la an bolo Mali kɔnɔ. O taamasiyɛnnan in bɛ Bamakɔ faaba komini 3nan na Karicedifulowu fana na. A ni seyidusuw tɔtɔla taamasiyɛnnan cɛ man jan Babili fɔlɔ masurunna na. A kurunbonkarila san 2002. Dɔkala Yusufu JARA Namori KOUYATE
Dɔkala Yusufu Jara
Minisiriw y’u ka laadalatɔnsigi kɛ araba utikalo tile 13 san 2025 jamanakuntigiso la Kuluba. A ɲɛmɔgɔya tun bɛ furancɛlafanga jamanakuntigi Zenerali darimɛ Asimi Goyita bolo..
Wulikajɔ demokarasiko ani politikitɔn camanko la an ka jamana kɔnɔ, o cɛba dɔ taara i da. Kɔkankow ni diɲɛ tɔnbaw cɛ koɲɛnabɔ minisiri kɔrɔ Cɛbilen Daramɛ fatura kunun utikalo tile 12 Pari, Faransi faaba la k’a si to san 70 la bana kuntaala jan senfɛ. A ka denbaya de ye nin kunn.
Nun donna kunun, furancɛlafanga jamanakuntigi Zenerali darimɛ Asimi Goyita fɛ ; n’o ye faso ka san 2025 fɛɛrɛ tigɛlen ye, k’a ɲinin ka dɛmɛn don dɛsɛbaatɔ miliyɔn 2,3 la baloko la jamana kɔnɔ..
Lamɛnnen kɔ siɲɛ fɔlɔ la juma utikalo tile 1lɔ, minisiriɲɛmɔgɔ kɔrɔ Dr Sogɛli Kokala Mayiga welela kokura k’a lamɛn kunun faso nafoloko an’a wariko kɔlɔsili cakɛda fɛ, ka laban k’a lamara bolo kɔrɔ. Kunnafoni in dira a ka awoka Me Sɛki Umaru Konarɛ fɛ..
Minisiriw y’u ka laadalatɔnsigi kɛ araba utikalo tile 6 san 2025 jamanakuntigiso la Kuluba. A ɲɛmɔgɔya tun bɛ furancɛlafanga jamanakuntigi Zenerali darimɛ Asimi Goyita bolo..
Liputako-Guruma jamanaw ka yiriwali cakɛda bɛ bayɛlɛmani sira kan ka kɛ saheli kungo jamanaw ka kɔnfederasɔn (AES) ka waleyali cakɛda ye. A ɲɛmɔgɔ bɛna kɛ kalo wɔɔrɔ kuntaala kɔnɔ, an Maliden ɲɔgɔn Eli Pɔrɔsipɛri Arama ye..
