Ɲininnisεbεnw bilali : Timinandiya dan ye denmisεnw ta ye - Actualités et Infos au Mali et dans le monde

I b’a fɔ ko an bε denbaya kɔnɔ. Tarata ɔkutɔburukalo tile 31 san 2023, nεgε kanɲε 9 tun tεmεnna ni sanga 20 ye εntεripoli da la Bamakɔ-kura, komini 3nan na. Musomannin dɔw tun koorilen bε surɔfanadun na ɲɔgɔn fε fan dɔ fε. Sira fan dɔ fana fε, mɔgɔw jurunintonnen bε ɲɔgɔn kɔ. Nin bεε b’a fε ka kε mɔgɔ fɔlɔ ye k’a ka ɲininnisεbεn bila polisiya kama. Kasɔrɔ sεbεnw minεni tun ye o dugu jε ye nεgε kanɲε 8,00.

Timinangoya t’a la, dusumandoya t’a la ; cεmannin fara musomannin kan, bεε ɲεmajɔlen don. A ɲεna gɔfεrεnaman ye dɔ fara sεbεnw bilali sarati kuntaala kan, ka laban ka faranfasiya di sεbεn ditaw cogoyaw kan. A jεyara jama ma, ko kariti NINA, walima fisi εndiwiduyεli, walima karidantε siwili, n’o kelen o kelen b’i bolo, o b’a ɲε. O saba wajibiyalen tε bilen. Tɔgɔsεbεnko t’a la, ko ni min fɔlɔ sera o bε ɲεkun minε tɔw ka jɔ o kɔfε. Nka, bεε b’a dɔn i nawaati kama, i bε min kɔfε. O de la bεε hakili sigilen tun don hali ni su tun b’a la ka janfa.

Su fila kuntaala kɔnɔ, an ye sεbεnbilala ninnu jate minε sεbεnbilayɔrɔ dɔw la. Timinandiya dan bεε don ani dusukungεlεya. Bεε hami ye don nataw la, ka faso lakananfini don. K’a daminε Polisisow la, zandaramasow, zeni militεri, dugumakεlεcεw ni sanfεkεlεcεw ka yɔrɔw, garidi nasiyonali, a bεε da tun falen bε denmisεnw na. Su fara tile kan jama ma kɔtigε.

Nεgε kanɲε 00 bε tεmεn ni sanga 30 ye tuma min na, o y’an sɔrɔ Bajalan 1^l^ɔ la komini 3nan kɔnɔ. Su kɔrɔbayali n’a ta bεε, jama tun bε yen. Mɔgɔ minnu bε ka garidiya ɲinin, o sεbεnw bilayɔrɔ ye yen ye. Olu tun bε ka tɔgɔsεbεnw kε papiye A4 ɲε saba kan. An y’a sɔrɔ tɔgɔ dugumadan ye 300 ye. Sεbεnntanya fε, ni min b’a fε i tɔgɔ ka fara a kan, i bε na ni papiye kura kelen ye. Tɔgɔwele tun bolodalen bε ka bila nεgε kanɲε 8,00 kan. Mɔgɔ dama min tun bε yen, a si sago tun tε o sibiridon ka tεmεn a kan a ka sεbεn bilali la. Cεmannin ni musomannin, minnu ka ko bε taa ni ɲɔgɔn ye, olu tun faralen don ɲɔgɔn kan.

Dɔw bε k’u ka sangew siri tuma na, dɔw koorilen bε tedagaw da la. Fo i b’a dɔw kan mεn, ko anw bεna kε jamana in garidi ɲumanw ye, ka jamana tɔgɔ duman segin a ma. Dɔw k’u haminanko tε dɔwεrε ye ka garidifugulan don ka waso n’o ye faso kanu kosɔn.

Ntolantankεnε in kan yen, feerelikεlaw tun bε fan bεε fε. Sɔfeerelaw, cεkεfeerelaw, tigafeerelaw. Motokɔlɔsilaw fana tun b’u dan ma. Kin mɔgɔ caman ye nafa sɔrɔ sεbεnbila in na. Dɔ y’a jira ko tile o tile ale bε sefawari ba fila (d2000) sɔrɔ motokɔlɔsi la Bajalan 1^l^ɔ la yan.

Nεgε kanɲε 3 ka sanga 30 da o kan, o y’an sɔrɔ Arɔndiseman 1^l^ɔ polisiso da la. Mɔgɔw tun muɲunnen tε ɲɔgɔn kɔrɔ yen jɔyɔrɔko la. Tɔgɔsεbεn tun tε yen, nka mɔgɔw dan tun ye k’u hakili to u ɲεfεmɔgɔw la. Wa jama tun man ca yen ka garidiya ɲininbaaw ka yɔrɔ bɔ. Cεmannin fara musomannin kan, galabugoya tun bε kɔlɔsi a caman na. Dɔw tun sigilen b’u ka motow kan, dɔw tun sεmεnnen bε kogow la. A mɔgɔ dɔ ka fɔ la, ale bεna jεn a ka dipulɔmuba kɔ ka polisiya ɲinin, ka da baarantanya degun kan. An y’a fɔ ko mɔgɔ suguya bεε dɔ bε jama in na. A y’a sεmεntiya, ko ale tε ka polisiya ɲinin a kanu kama ; nka a ka se ka baara dɔ sɔrɔ ka bɔ baarantanya na.

Dɔ farali sεbεnw bilali kuntaala sarati kan, o kεra nisɔndiya ye. Fototalaw bε mununmunun na fan bεε fε, k’a ɲinin ka karidantεfotow ta a ɲininbaaw ye. Sabula foto maralen tun tε a caman bolo kɔrɔ. Nin fototala min tun bε Falajε zandarameri da la, o y’a jira ko, a ko kεlen bε sɔrɔdaba ye ale bolo.

Ka da jama bɔcogo kan jamana lakananbaaya ɲininni na, jamana ɲεmɔgɔw y’a ŋaniya juma tεmεnnen in, ka dɔ fara sarati dalen kuntaala kan sεbεnw bilali la. Sarati fɔlɔ min tun dara, o tun b’a damiεnε ɔkutɔburukalo tile 23 la ka se a tile 29 ma san 2023 ; nka o mɔɔnɔbɔra ni dɔgɔkun kelen ye ; n’o ye ka se sini juma ma nowanburukalo tile 03 san 2023.

Kunun nεgε kanɲε 10 y’an sɔrɔ Falajε. Sigiyɔrɔntanya fε, mɔgɔ caman tun sigilen bε duguma ka weleli makɔnɔ. Cεw dɔrɔn de ka sεbεnw tun b’a la ka minε zandarameri la. Tile fila muɲunni kuntaala sera k’a to caman ka se k’a ka sεbεnw bila. Gɔfεrεnaman ye nɔgɔya min kofɔ sεbεnko la, o fana sera k’a to caman ka se ka wasa sɔrɔ sεbεnko la. Sabula sεbεn minnu bε legalize meriw la, yen lasɔrɔli ye babugubaara dan bεε ye. Dɔwεrε dun tun t’a dɔw bolo ni karidantε siwili kelen tε.

Sapεri pɔnpiyew ka yɔrɔ la Soninkɔ komini 6^nan kɔnɔ, yen ɲεmɔgɔba Kolonεli Adama Jatigi Jara y’a jira ko tile o tile olu bε mɔgɔ 500 fo 600 ka sεbεnw sɔrɔ. A k’u ye dabali minnu tigε kow nɔgɔyali la, o labatoli kεlen bε lafiya y’u bolo. Baara bε daminε nεgε kanɲε 6 mana tεmεn ni sanga 30 ye, ka jigin a kanɲε 18,00.

Sira dara namaratɔw ɲε. Gɔfεrεnaman ye kangari min da sεbεnko la, o nafa yera. Sabula mɔgɔw mako bε sεbεn suguya minnu na ka ɲininni kε, dɔw tun y’o kε jagokun ye. Nisɔngoyajira tun cayara o ko la. U tun bε wariba bin mɔgɔw kan karidantε siwili, kaziye zudisiyεri, sεritifika de nasiyonalite ani sεbεn wεrεw sɔrɔli la komisariyaw ni meriw ani kiirisow la. Nka gɔfεrεnaman ka kangarida n’a ta bεε, dɔw tun b’a la k’u tuloma gεlεya a ko la sɔrɔ diyagoyali kama.

Nka a bɔra o caman ye minεn fεrεlen na ; sabula mɔgɔ min ɲεsinnen bε jamana ka hakεw lafasali ma Kucala kiiritigεso la, n’o ye porokirεri Umaru Alasani Kuyatε ye, o ye mɔgɔ duuru minε u la k’u datugu kaso la. Zandarameri ka sεgεsεgεliw y’a jira, ko u tun bε sefawari d600 fo 2000 minε kaziye zudisiyεri ani sεritifika de nasiyonalite sɔrɔli kunkɔrɔ ; kasɔrɔ u bε dilan d300 la.