AES kɔnfederasɔn kiiriko minisiriw bɛ lajɛ la kabini kunun Bamakɔ lotoliba dɔ kɔnɔ. Tile fila lajɛ don, nin hakilila in ye cogoya ɲuman ye ka hakilijakabɔ kɛ, min b’a to hakɛ bɛ se ka bila bolo kelen kan AES kɔnɔ an ka yɛrɛya, an danbe an’an ka yiriwali kama. Baara daminɛni ɲɛmɔgɔya tun bɛ minisiriɲɛmɔgɔ Zenerali de diwisɔn Abudulayi Mayiga bolo, kɔnfederasɔn jamana saba ninnu kiiriko minisiriw tun b’a kɛnɛ kan.
Masalakun minnu tara
lajɛ in kama, o ye hakɛ kɛli ye kelen ye kɔnfederasɔn kɔnɔ, foroba kiiriso
kɛrɛnkɛrɛnnen kelen sigicogo senkan, dɔ farali jɛkabaara fanga kan kiiriko
nasira la. Ani fana, kiiriko kannabila baaraw sariyaw mabɛnni, kiiriko ni
kasoko jatew an’a seeredenw mabɛnni, ani dɔ farali kiiri tigilamɔgɔw hakɛ kan.
Bɛn kɛlen a kan ka
kɔnfederasɔn sigi senkan zuluyekalo tile 6 san 2024 Ɲame (Nizɛri), AES
bɛnkansɛbɛn bolonɔbilalen kɔfɛ sɛtanburukalo tile 16 san 2023, jamana saba
ninnu jamanakuntigiw ye waleyali tugu fɔli la, u y’u ka fasojamaw ŋaniya kɛ. Burukina
Faso kiiriko ani hadamadenw ka hakɛw labatoli minisiri ye hakililajigin kɛ, ko
fasojama ninnu ka tiɲɛw ye kelen ye, u ka tarikuw ye kelen ye, u ka hadamadenya
ni sɔrɔ cogoya fana ye kelen ye, ka fara u sigiyɔrɔw cogoyaw kan ; wa u
y’a dɔn fana ko gɛlɛya kelen de talen don k’u sɛgɛrɛ, n’o ye kojugubakɛ ani
marabaa jugu kɔrɔw ŋaniya ye. Walasa ka se k’o taabolo in senkɔrɔmadon, Edaso
Rodirigi Bayala ye ɲɛfɔli kɛ, ko gɛrɛɲɔgɔnna, fo ka se an ka kiirikow mabɛnni
ma an ye minnu sɔrɔ an marabaa kɔrɔw bolo, yɛlɛma donni olu cogoya la o ye
wajibi ye.
Nizɛri kiiriko ni hadamadenw ka hakɛw labatoli ani jamana taamasiyɛnw marali
minisiri ka ɲɛsin gɔfɛrɛnaman ni fangabulonw cɛ koɲɛnabɔ ma, o y’a sinsin
hakilila falen kɛnɛ dɔ sigili kan foroba kiiriso kelen sigili kama AES fasojama
tɔgɔ la. Aliio Dawuda ka fɔ la, o ye wajibi ye an ka yɛrɛya sinsinni na, gɛlɛya
in kɔnɔ an ka kɔnfederasɔn jɔli la. A y’a ka nisɔndiya jira nin hakilila in na,
n’a bɛna se ka dɔ fara kojugubakɛ kɛlɛli fanga kan an ka lakananbaaw bolo.
KA KOJUGUKƐLAW DEGUN- O siratigɛ la, minisiri
Aliio Dawuda ko kiiriko jɔyɔrɔ ka bon kosɛbɛ, sabula ko ale de fɛ, kojugukɛlaw
bɛ se ka degun. A ko an ka kan k’an jilaja o kojugukɛla ninnu kana se ka yɛgɛyɛgɛyɔrɔ
si sɔrɔ AES kɔnɔ. Bɛnkansɛbɛn min bɛ AES kofɔ, o ye ko saba ta ; i n’a fɔ
lafasa ni basigi, dipulomasi ani yiriwali. Nka a tun tɛ ɲɛ ni kiiriko ma fara u
kan walasa ka se ka baara kɛtaw senkɔrɔmadon, minnu tɛ taa sariyalakow kɔ an ka
laɲininw sabbatili la.
Minisiriɲɛmɔgɔ ka fɔ la, ko jugu walangatali ka don an ka jamana saba ninnu kɔnɔ ɲɔgɔn fɛ, dɛmɛn minnu b’a la ka ta ka kojugubakɛjɛkuluw sɛgɛrɛ, ka fara sɛgɛsɛgɛliw kɔnɔ dunya kan, olu b’an bila ka hakilijakabɔ kɛ fura sɔrɔli la gɛlɛya kofɔlen ninnu na kɔnfederasɔn kɔnɔ. Zenerali de diwisɔn Abudulayi Mayiga sinsinna hakɛ mabɛnni, fo ka se kiiriko fangabulonw farali ma ɲɔgɔn kan ka jɛkabaara sabati ani ɲɔgɔndɛmɛn kiiriko nasira la. Kiiriko mana mabɛn ka fara sɔrɔdaiyakow kan, a ka ca a la laɲininw bɛ sabati, n’an ka jamanaw ka kɛtaw yeli ye hadamadenw ka hakɛko la.
Zenerali de diwisɔn Abudulayi Mayiga y’a jira ko yiriwali jɔsen ye kɔnfederasɔn bɛnkan ye, k’o kɔnɔko waleya, yɔrɔjɔw ni wari donni baara nafamaw dafɛ, dabali ɲumanw kiiriko ni basigili kama ka nafolotigiw ni minnu b’u ka wari don baaraw dafɛ, k’olu jigi sigi.
Minisiriɲɛmɔgɔ ko fana,
kiiriko an ka kɔnfederasɔn kɔnɔ, o cogoya ka kan ka kiimɛ ani k’a fɛsɛfɛsɛ ji
ɲɛmajɔlen na ka kɛɲɛ ni kow cogoyaw ye, k’u mabɛn ni sisan kow ye hadamadenya
ni sɔrɔ yiriwali nasira la, o min y’an ka fasojamaw haminanko ye.
O cogoya kelen na, minisiriɲɛmɔgɔ y’a jira ko nafolotigiw ani minnu b’u ka wari
don baaraw dafɛ, olu hakili bɛ sigi ka baara kɛ u fɛrɛ ma. O fana tɛ ɲɛ ni
yɛlɛma ɲuman ma don jago ni kannabila kiiriko la, olu kɛcogo la lafiya sɔrɔli
kama an ka jamanaw kɔnɔ.
Dɔkala Yusufu JARA et
Mariétou KOITE