Madamu
Buwarɛ Fili Sisɔkɔ n’a tɔɲɔgɔnw ka kiiri tile 4nan weleli
kiiritigɛsoba (kuru dapɛli) la, kiiritigɛlaw tun y’a ɲinin ka nafoloko ni wariko minisiri
kɔrɔ ka jalaki jira sɔrɔdasiw ka minɛnw sanniko la. I n’a fɔ a kɛra cogo min na jamanakuntigi ka
pankurun sanniko fana na ; nka hali o la, a ma bɔ a kumakan kelen in kan. A k’ale ye
layidu dafa a tɛmɛnsira bɛɛ la, o de la a tɛ ka jɔ a la, k’a nɔ bɛ weleyaw la ; ka da a kan, k’ale
y’a jɔyɔrɔ fa foroba jate bɔli la, ni wariw sarali ani jamana
ka kɛta waleyali ye.
Faranfasili la, Madamu Buwarɛ Fili Sisɔkɔ k’ale bɔra bɛnkansɛbɛn in kalama lafasa minisiriso ni cakɛda « Guo-Star » cɛ kalo kelen a bolonɔbilalen kɔfɛ lafasa ni sɔrɔdasi kɔrɔw minisiri Sumeyilu Bubeyi Mayiga fɛ. O de tun y’a yamaruya dibaa ye, min musaka tun ka ca ni sefawari miliyari 69 ye sɔrɔdasiw ka minɛnw sanni kama.
Nafoloko
ni wariko minisiri kɔrɔ in ka fɔ la, musaka min tun kofɔlen bɛ sɔrɔdasiw ka minɛnw sanni na, o mumɛ tun ye sefawari miliyari 33 ye. Finiw,
dalanw, bugunin turutaw, ani dumunifɛnw musaka tun ka ca ni sefawari miliyari
21,7 ye. Bolifɛnw,
mɔbiliw ani ni
bolifɛn min fɛn dɔ tiɲɛna, o nɔnabilalifɛnw, olu musaka tun ka ca ni
sefawari miliyari 7,8 ye. Minɛn
kun filanan musaka tun ka ca ni sefawari miliyari 3,4 ye Fili Sisɔkɔ ka fɔ la, k’a jɔlen to kiiritigɛlaw ɲɛkɔrɔ.
Kiiriso kɔni dabali banna bɛnkansɛbɛn in kɔnɔko waleyali la minisiri kɔrɔ in fɛ, kasɔrɔ ale de tun banna a ma fɔlɔ ! Ka da a kan, a yɛrɛ tun y’a jira k’ale ma sɔn k’a kun don bɛnkansɛbɛn in kɔrɔ, sabula a ma sara a la a daminɛ na. Nka k’a labanna k’o kɛ ka da a kan ko minɛnw ɲininni don sɔrɔdasiw ye ka jamana to kojugubakɛlaw fɛkɛlɛ kɔnɔ.
Kiiritigɛlaw ɲɛmɔgɔ y’a ɲininka kun jumɛn na ale tun bannen bɛ k’a kun don bɛnkansɛbɛn in waleyali kɔrɔ ? Fili ko a kɛra ale ɲinɛma, wa fɛn tun ma sara ale la warisarako la.
Kiiritigɛlaw ko, ni fɛn ma sara e la, mun de y’e bila ka sɔn a wari bɔli ma bilen. A ko ale y’a jɔyɔrɔ fa foroba jateko de la ani min b’a to sɔrɔdasiw ka se ka minɛnw sɔrɔ teliya la.
Kiiritigɛlaw ɲɛmɔgɔ y’a ɲininka, ko munna jamana yɛrɛ ka bilankɔrɔ miliyari 100 sigira senkan ale fɛ. Nafoloko ni wariko minisiri kɔrɔ ko o dabɔra ka bɛnkansɛbɛn kɔnɔko waleya k’a sɔrɔ maga ma kɛ
foroba nafolo la sɔrɔdasiw ka minɛnw sanni na. Kiiritigɛlaw ko o bilankɔrɔ ma a kun ɲɛ ; sabula dɔ farala fɛnw sɔngɔw kan.
Fili ko bilankɔrɔ tun dabɔra ka basigi don bɛnkansɛbɛn waleyali la, ani bɛnkan fɛn o fɛn kɛra ka kɔn o ɲɛ lafasa ni sɔrɔdasi
kɔrɔw minisiriso makow kama ; wa k’o wari in tun bilalen bɛ banki dɔ la
jamana in kɔnɔ. A kɔni y’a faranfasiya, k’ale t’a
kalama, ko dɔ farala fɛnw sɔngɔw kan ; sabula k’ale t’a sɔrɔdasiminɛn kelenna sɔngɔ jɔnjɔnw dɔn kɔrɔlen ; ani fana, bɛnkansɛbɛn don, min tɛ foroba sugu dili taabolo kɔnɔ ; o la, o sariya ma boli a kan.
Kiiriso ɲɛmɔgɔ n’a laadibaaw dalen b’a la ko dɔ farala fɛnw sɔngɔw kan sɔrɔdasiw ka minɛnw sanni na. Sabula sɔngɔ minnu kofɔra, olu ka ca ka hakɛ tɛmɛn ; o de b’a jira ko dɔ farala fɛnw sɔngɔw kan, wa fo ka minɛnɲininna kɛrɛnkɛrɛn a kama. Kiiritigɛlaw bolo, a ɲuman tun ye ka sanni kɛ minɛntigiw yɛrɛ fɛ, ka sagon k’u melenge cakɛda wɛrɛ la, min y’u san da nɔgɔ la, k’u kɔfili jamana ma da gɛlɛn na. Jaabili la, Fili Sisɔkɔ ko cakɛda «Guo Star» ye lafasa minisiriso
ka minɛnɲinnina ye kabini san 2000, ka kɔn jamanakuntigi IBK tile ɲɛ ;
wa ko an tun bɛ gɛrɛntɛ (anbarigo) kɔrɔ, an tun tɛ se ka sin ka minɛn san an yɛrɛ
ma.
Fili Sisɔkɔ ka ɲɛfɔliw la jamana ka bilankɔrɔwariko kan, a y’a jira ko cakɛda « Guo-Star » de y’o laɲinin kɛ ; nka k’o dabɔra lafasa minisiriso kama ; n’o tɛ, a ma dabɔ minɛnɲininnna kama. A k’ale y’a dabɔ minisiriso senkɔrɔmadonni de kama ; nka ko kabini ale y’a kɔlɔsi ko yuruguyurugu b’a ko la, ale ye bilankɔrɔko in bɔ a ma, wa ko sarali kelen min kɛra, o kɛra a bɔlen kɔ a ma. A labanna k’a jira ko bilankɔrɔ in nafa tun ye ka se ka minɛnw sɔrɔ sɔrɔdasiw ye.
Bilankɔrɔko bɔlen a ma, Madamu Buwarɛ Fili Sisɔkɔ ka fɔ la, o sera k’a to segin ka kɛ sɔngɔ jɔnjɔnw ma, ani fɛn minnu tun sɔrɔla kaban, k’olu wariw sara. A k’o
de y’a to ale ye sefawari miliyari 22 in sara. A k’an bɛ dakun min na bi, o de ye k’a dɔn, n’o wari saralen in kɛra a bɔkun ye.
Gɔfɛrɛnaman tɔgɔ la mazisitaraw jɔyɔrɔ tun falen bɛ Kɔkɛ Kulubali fɛ ; o ye ɲininkali
kɛ, n’a y’a sɔrɔ bɛnkansɛbɛn in tun bɛ makow kofɔ. Fili Sisɔkɔ ye jaabili kɛ, k’a jira ko bɛnkansɛbɛn in kalifara ale la lafasa
minisiri fɛ, ko minɛn ɲinintaw don kabini san 2012 furancɛlafanga kɔnɔ.
Madamu Buwarɛ Fili Sisɔkɔ ye kiiritigɛso ni gɔfɛrɛnaman tɔgɔ la mazisitaraw ka ɲininkaliw jaabi sɔrɔdasiw ka minɛnw sanniko kan lɛrɛ 6 kuntaala kɔnɔ. Yecogo la, ɲininkali si ma muso in bɔ a cogo la ; wa a k’a t’a kalama ni dɔ farala minɛnw sɔngɔw kan.
Dɔkala Yusufu JARA
Tanba KAMARA
Rédaction Lessor
Bɛn ni fɔkabɛn bɛnkansɛbɛn ɲɛbila-poroze kolabɛnkulu ɲɛmɔgɔ, minisiriɲɛmɔgɔ kɔrɔ Usumani Isufi Mayiga n’a ka cakɛda mɔgɔw, u ye gɔfɛrɛnaman minisiriw kumaɲɔgɔnya alamisa tɛmɛnnen in minisiriɲɛmɔgɔso la, wulayanfan fɛ..
Nin tali in ɲɛsinnen bɛ dɔnniyatigi 49 ma, a bɛ fɔ minnu ma kategori « A» ani «B2» lakɔlikaramɔgɔya kalanw kɛbaaw la. Mɔgɔ 21.765 de y’a ɲɔgɔndanw kɛ kunun, u tun tilalen bɛ kalanyɔrɔ 21 cɛ jamana fan bɛɛ fɛ.
-.
Bɛnkan talen kɔ ka bagansuguw datugu Bamakɔ faaba kɔnɔ ka da basigiko kan, yɔrɔ kuraw dira baganfeerelaw ma Sanankɔrɔba ani Zantigila kominiw kɔnɔ. O yɔrɔ ninnu labaarali hukumu kɔnɔ, baganmara ni mɔnni minisiri Yuba Ba ye taama kɛ ka taa a ɲɛ da u kan alamisa tɛmɛnnen in na..
Kameruni balontanna kɔrɔ Samuyɛli Etoo, ni Kameruni ntolantan tɔnba (Fecafoot) ɲɛmɔgɔ don bi, a dulonna kalo wɔɔrɔ kuntaala FIFA fɛ, k’a sababu kɛ musomannin U20 minnu ka kupudimɔni kɛra Kolɔnbi, k’a sababu kɛ a y’a fɔli min kɛ, k’o jalatigilaw ye hakilidumantigiya kɛ..
San 2024-2025 kalanta tun bolodalen bɛ ka bila bi tarata kan ɔkutɔburukalo tile 1lɔ san 2024 ; nka, a bɔra a dɔgɔ kɔrɔ k’a bila nowanburukalo tile 04 nata in na. Kalanko minisiri Dr Amadu Si Sawanɛ y’o laseli in kɛ kunun, jamana telesoba la..
