Afiriki musomanninw ka KANI ɲɛbila ntolantanw tako filanan n’a laban hukumu kɔnɔ Mali ni Kapuwɛri bɛ kari ɲɔgɔn na. O Kapuwɛri de ye Lajinɛ gosi (2-2, 4-1). A taali bɛ kɛ Kapuwɛri, k’a seginni kɛ Bamakɔ « 26Mars » la. Mali Sɛgɛ musow ka Marɔkutaa sira bɛ tɛmɛn kapuwɛri fɛ, sabula jamana min mana sebaaya sɔrɔ u fila la, o de bɛ yamaruya yeli la Marɔku san 2026 janjon kɛnɛ kan. Mali sɛgɛ musow degelikaramɔgɔ Mohamɛdi Salumu « Huseyi » ka fɔ la, u tɛ Kapuwɛri dɔn kosɛbɛ ; nka ko jamana min ye Lajinɛ gosi, o fana tɛ jamananin ye balontanko la, mɔgɔ ka kan k’i yɛrɛ kɔlɔsi o la. A ko u ni Kapuwɛri bɛna tako fila min kɛ ɲɔgɔn na, u bɛna u sɛbɛkɔrɔ labɛn o kama, sabula ko a laɲinin tɛ fila ye, sebaaya sɔrɔli don ka ye musow ka KANI kɛnɛ kan. Kapuwɛri fana musow degelikaramɔgɔ muso Siliyeriya Nejo y’a ka musow tanu kosɛbɛ kunnafonidilaw ɲɛkɔrɔ, u kɛli la ka se sɔrɔ Lajinɛ kan ka se Mali kunbɛnni ma. A ka fɔ la, u ka bonya bɛ Mali kan ; sabula ko bɔko fila kɔnɔ ni Gabɔn ye, o sera ka bi 10 don. O la, olu ni Mali kunbɛnko min ye nin ye, u bɛna u fasa fili kosɛbɛ sebaaya sɔrɔli nɔfɛ walasa u ka se ka wasa sɔrɔ ka ye u musow ka KANI kɛnɛ kan. A ko taali min bɛna kɛ u fɛ yen, u bɛna u jilaja k’o de sebaaya ɲinin, sanni ka se seginni ma Bamakɔ. I n’a fɔ Kapuwɛri-Mali, ntolantan duman wɛrɛw bɛ yen. O dɔ ye Sɛnɛgali-Kɔnɔwari, Alizeri-Kameruni, RD Kongo-Afirikidisidi, Gana-Eziputi ani Burukina Faso-Togo. Angola fana ni Malawi, Tanzani ni Ecopi, Namibi ni Zanbi, Keniya ni Ganbi, ani Benɛn ni Nizeriya, olu bɛ ɲɔgɔn sɔrɔ. O ntolantan ninnu kɔmaseginniw ye ɔkutɔburukalo tile 20 ye ka se a tile 28 ma san 2025. Jamana minnu mana sebaaya sɔrɔ o tako filaw la, olu de bɛ yamaruya ni Marɔku janjon taali ye musow ka KANI finali kama. Ɲɛbila ntolantanw tako filanan n’a laban bolodacogo Kapuwɛri-Mali Angola-Malawi RD Kongo-Afirikidisidi Tanzani-Ecopi Namibi-Zanbi Burukina Faso-Togo Alizeri-Kameruni Eziputi-Gana Keniya-Ganbi Benɛn-Nizeriya Sɛnɛgali-Kɔnɔwari Dɔkala Yusufu JARA Jɛnɛba BAGAYƆGƆ
Dɔkala Yusufu Jara
Sports.
Retour de l'Administration à Kidal.
Sports.
Concours fonction publique.
Vente de carburant.
Vente des produits phytosanitaires.
