Nin ɲininkali in de bɛ digi mɔbilitigiw la. Asurelen tiɲɛnen nɔ ladilanni kasaara kɔfɛ taamako cakɛdaw bolo, o ye kamanagankoba ye, min kuma bɛ asurelenw da bi ka caya. Asuelenw y’a jira k’u bɛ mɛɛn kosɛbɛ k’a sɔrɔ u ma bila u ka hakɛw kɔnɔ ni kasaara y’u sɔrɔ. Amara Wɔlɔgɛmu ye foroba cakɛda dɔ baarakɛla ye ; ale bɛ k’a ka mɔbili asure taamako cakɛda dɔ la. A k’ale ye san kelen kuntaala sɔrɔ k’a sɔrɔ a tɛgɛ ma da a ka hakɛ kan a tiɲɛnen siraba kan kasaara la.
Mɔbiliba dɔ y’a ka mɔbili tan san 2019, min fana asurelen don o cakɛda kelen in
na. A ka fɔ la, i n’a fɔ u fila bɛɛ bɛ asuransi kelen, kow bɛ sɔn ka
sennateliya. Nka min sɛbɛnnen bɛ o ni waleyali tɛ kelen ye, fɔlen tɛ ka bɔ a
sira fɛ. Nin mɔbilitigi in y’a jira ko ale de wajibiyara ka wari bɔ a yɛrɛ kun
k’a ka mɔbili tiɲɛnen dilan. K’o musaka sera sefawari ba bi saba (d30 000)
ma, ka kalo saba k’o kɔfɛ k’a sɔrɔ a m’a ka nɔladilanwari sɔrɔ a ka asuransi la.
Amadu Keyita ye bolifɛn
dilanna ye, ale bɛ k’a yɛrɛ asurue tasumako, kasaara ani ko suguya wɛrɛw cakɛda
(IARD) la o ka ca ni san 20 ye. A ko ni kasaara y’i sɔrɔ, asuransi dɔw bɛ mɛɛn
k’a sɔrɔ u ma layidu tiimɛ. O la minnu asurelen don olu dusukasibaatɔ bɛ to taa
ka segin na, ka laban ka lafiya di u yɛrɛ ma a ko tɔ la. A k’ale teri dɔw ta
kɛra o ɲɔgɔnna ye. K’o dɔw ye san saba jalen kɛ fo ka tɛmɛn o kan k’a sɔrɔ u ma
bila u ka hakɛw kɔnɔ. Maliden dɔ min tun sigilen bɛ Gabɔn, o kɔseginnen jamana
kɔnɔ, o y’a jira ko Gabɔn yen kow senna ka telin kosɛbɛ. A k’ale ye kasaara
sɔrɔ k’a to yen. Hali a ma kalo kelen sɔrɔ tiɲɛni min donna a kun o nɔ
ladilanna.
Dr Ibarahima Sango ye medesɛn ye, o k’ale sago tɛ abada mɔgɔw ka maɲumanko k’u ka hakɛ nɔfɛ nin coggo la. A ko a bɛ asuransi cakɛdaw ka yɛrɛsagokɛ de kofɔ. A k’ale furumuso ye kasaara sɔrɔ san 2023. Nka fo ka se desanburukalo tile 2 ma san 2024, a ka asuransi cakɛda tun ma se k’a bila a ka hakɛ kɔnɔ. K’a sɔrɔ a tun ye sɛbɛn nafama bɛɛ ladon min b’a to a b’a ka hakɛ sɔrɔ. Nin mɛɛnko jugu de b’a to hali ni kasaara ye min sɔrɔ, o bɛ wajibiya k’a kunko latɛmɛn cogoya wɛrɛ la, ka sago a ko donni kan asuransi bolo. A ko ale t’a dɔn asuransi cakɛdaw jɔyɔrɔ ye min ye bilen. Sabula ko ale bɛ asuransi la o bɛ san 15 bɔ bi.
Kasaara kɛlen seereyasɛbɛn (PV) dilanni sumanya- Hamadi Jalo ye Asuransi « bleues » (CNAR) ɲɛmɔgɔba ye. Ale y’a jira ko asuransi ye cogoya ye, min b’a to a bɛ se ka mɔgɔ wɛrɛ ka basigi lakanan, o kɛra mɔgɔ dɔ ye walima cakɛda dɔ. Ni mɔgɔ dɔ don min y’a yɛrɛ asure, ni tiɲɛni donna o kun, a ka asuransi de kan ka jɔ o ko kɔrɔ. A ka fɔ la asuransi ye suguya fila ye : ɲɛnamaya ta ani min tɛ ɲɛnamayako ye, n’a bɛ fɔ o laban in na (IARD). A ko mɔbiliw asuransi bɛ IARD kɔnɔ, o bɛ dɔ ta wajibi la jamana dugukolo kan, n’o ye hadamadenyako jɔyɔrɔ ye.
A k’o yɔrɔ in de bɛ polisiw
ka wuli ka jɔ kun bɔ kosɛbɛ. Nka dɔw fana bɛ yen olu tɛ wajibi ye. A k’o
garanti bɛɛ de bɛ wele farati asuransi. Ni kasaara kɛra, asurunasi ka kan ka
ladɔnniya o la walasa o ka se ka ko dɔnbaa ŋanaw bila ka taa jateminɛw kɛ
kasaara in kɛyɔrɔ la. Nka, k’o waleya in de tɛ kɛ tuma bɛɛ la, o bɛ asuransi
bila ka waati jan sɔrɔ k’a sɔrɔ a ma se ka nɔnadilanni kɛ.
« Asuransi bleues » ɲɛmɔgɔba ko olu ka baara kɛcogo dɔnnen tɛ mɔgɔ caman fɛ. O de la ni kasaara kɛra, wajibi ye sɛgɛsɛgɛli ye ani ka sɛbɛnw labɛn ka ladon. Ni nɔladilanni bɛ kɛ minɛnko la walima farikolo kunkan, o bɛ sara a tigi ye ka kɛɲɛ ni ni polisiw ka kasaara seereyasɛbɛn labɛnnen kɔnɔko ye. A ka fɔ la, polisi minnu ye sɛgɛsɛli kɛ, olu de bɛ mɛɛn tuma dɔw la k’a sɔrɔ u ma o sɛbɛn in di olu ma. Hamadi Jalo ko abɔneman min bɛ sara mɔbili kunkɔrɔ o bɛ tali kɛ mɔbili fanga (sewo) hakɛ la, o dun b’a ta 4 na ka se 32 ma.
Dɔkala Yusufu Jara
Denmisɛnw bɛ ka kalan bila ka firi Kɔfilacɛ damanda kan Kangaba sɛrɛkili kɔnɔ kosɛbɛ sisan. Cɛmannin fara musomannin kan, u kɛlen bɛ ka Kɔfilacɛ damandaw fa tewu digɛn senni ani damanbɔgɔw koli kama sanu nɔfɛ. U bɛ firi dugukolo jalan kan i ko fɛn wɛrɛ, k’u jigi dalen to sa.
Kow gɛlɛyara Mali bolo. An tɛ se k’a fɔ fɔcogo wɛrɛ la n’o tɛ, Mali dɛsɛlen kɔ Santarafiriki la 0-0 kunun ntɛnɛn marisikalo tile 24 san 2025, kupudimɔni san 2026 ɲɛbila ntolantanw tile 6nan hukumu kɔnɔ.
Taamasiyɛnnanw jɔra Bamakɔ ani jamana marayɔrɔ caman faabaw la k’a daminɛ san 1992 la, walasa ka hakililajigin kɛ Malidenw ka wulikajɔba la demokarasi nɔfɛ.
Lajɛ in ɲɛmɔgɔya tun bɛ minisiriɲɛmɔgɔ Zenerali de diwisɔn Abudulayi Mayiga bolo. A y’a gɛlɛya cakɛdaw ma, minnu bɛna degedenw sɔrɔ, u ka baaradege sarati fɔ ka gɛlɛya u ye.
Denmisɛnninw (cɛmanw ni musomanw) bɛ nin laadalako in kɛ ni sunkalo ye tile 10 sɔrɔ. Laada min don, hakilimaw ka fɔ la, a bɛ ɲɔgɔndɛmɛn ani ku-ɲɔgɔn-kan hakilila de kofɔ.
Selen Marɔku sibiri su k’a dugu jɛ kari la, degelikaramɔgɔ Tɔmu Sɛnfiye n’a ka cɛdenw y’u ka farifoni balontanko fɔlɔ kɛ ntɛnɛn marisikalo tile 17 san 2025. Cidenkulu mɔgɔ tɔw ka kan ka se Ujuda bi tarata ni Ala sɔnna. Ujuda ye dugu ye, min bɛ Marɔku ni Alizeri dancɛ la.
