Bamakɔ Sitadimaliyɛn jigi tun bɛ nin sebaaya in de kan kɔnfederasɔn kupu kanpaɲi daminɛcogo la. O siratigɛ la, a ni Afirikidisidi ntolantantɔn « Stellenbosch FC » ye ɲɔgɔn sɔrɔ « 26Mars » farikoloɲɛnajɛkɛnɛ na kunun nowanburukalo tile 27 san 2024 kuluntolantanw tile fɔlɔ la. A y’o gosi 2-0. Haman Manjan ye bi fɔlɔ don sanga 15nan na, Dawuda Kulubali ye filanan don sanga 90nan dafalen fo ka sanga 4 yɛlɛn o kan. Ni nin sebaaya in ye, Sitadimaliyɛn ni Marɔu RS Berkane » fila y’u ka kuru saba fɔlɔw sɔrɔ ka jɔyɔrɔ fɔlɔw ta u ka kulu in kɔnɔ. O balontan dɔ in na Marɔku « RS Berkane » ni Angola « Desportivo da Lunda Sul » cɛ kunun nɛgɛ kanɲɛ 19 waati la, Marɔku fana ye Angola tontan 2-0. O la, Sitadimaliyɛn ni Angola de bɛ ɲɔgɔn sɔrɔ kuluntolantan in tile 2nan na. Degelikaramɔgɔ Mamutu Janɛ « Murule » n’a ka cɛdenw bɛ taa Angola k’o balontan in kɛ desanburukalo tile 8. An ka kunnafoniw y’a jira ko Bamakɔ Sitadimaliyɛn b’a to labɛnyɔrɔ la Marɔku, ka sin Angola la. Wa n’an seginna kunun balontan ma, an b’a ye ko Sitadimaliyɛn tun b’a don duman na kosɛbɛ ka tɛmɛn Afirikidisidi « Stellenbosch FC » kan. Nin kɛra o tɔn in siɲɛ fɔlɔ ye kɔnfederasɔn kuluntolantako la. Nka, u fana y’u fasa fili kosɛbɛ, a ma dɔn k’u ye dunan ye ko in na. U farifoninen ye balontan in kɛ ka se a dan na, hali n’u ma bi sɔrɔ ka don Sitadimaliyɛn na. Balontan daminɛnen ni sanga 15 ye, Haman Manjan ye Sitadimaliyɛn ka bi fɔlɔ don, kasɔrɔ « Stellenbosch FC » kɔfɛmɔgɔ dɔ sen tura balon na k’a fɛgɛn dɔɔnin. Hali ka dan o bi kelen ma, jigisigi dira Sitadimaliyɛn ma. Balon tora u bolo, mɔgɔ dɔ ninnu tora girin na a nɔfɛ. Sɛgɛnnafiɲɛbɔ kɛra o sebaaya 1-0 kan. Tako filanan daminɛna ni tɔn fila bɛɛ ka yɛrɛdi ye ka taa a fɛ. Sitadimaliyɛn t’a fɛ kuru ka jibɔ, walima a ka dɔwɛrɛ don ka fara a kan. « Stellenbosch FC » hami ye kuru jibɔli ye fo ka dɔwɛrɛ fana don. U kɔni y’an sɛbɛkɔrɔ bagabaga sanga 56nan na ; hali n’o ma kɛ bi ye bilen. Sitadimaliyɛn labanna ka penaliti dɔ sɔrɔ. Dawuda Kulubali y’o tan k’o don sanga 90 dafalen fo ka sanga 4 yɛlɛn o kan. Balontan kuncɛra Sitadimaliyɛn ka sebaaya la 2-0. A bɛna labɛn sabati sa, ka Angola « Desportivo da Lunda Sul » sɛgɛrɛ tile 2nan na. Sitadimaliyɛn ntolantannaw tun ye : Ŋolo Tarawele, Daramani Tarawele, Fadi S. Kulubali, Lasinɛ Kuma, Dawuda Kulubali, Musa Jalo (o donna Idirisa Jara nɔ na sanga 87nan na), Mamadu Dunbiya (balontannaw ɲɛmɔgɔ), Sumayila Magasuba, Haman Manjan (o donna Siyaka Jabi nɔ na sanga 45nan na), Mukutari Sise, Abudulayi Kulubali. Dɔkala Yusufu JARA Seyibu Sanbiri KAMISƆKƆ
Dɔkala Yusufu Jara
Ni kumaɲɔgɔnya dɔgɔyara furu kɔnɔ, a bɛ fiɲɛ bila kowkɛcogo ɲuman na furu ɲɔgɔnw cɛ. Sigi gɛlɛyali sababu dɔw bɛse ka kɛ, ɲɔgɔn faamubaliya, yaafabaliya, erezo sosiyowkɔlɔlɔ ani k’i furu ɲɔgɔn jate i n’a fɔ nkunankunan tɛ mɔgɔmin na.
Kunnafoni, numeriki sɔrɔ ni fanga ka baara yɛlɛma kura minisiri ye Mali ka kunnafoni ni lagamuni cakɛda (Amap) ka baara kɛtaw wulili kura ye o ɲɛmɔgɔya kɛ kunun ntɛnɛn ɔkutɔburukalo tile 27 san 2025 Bamakɔ lajɛkɛsoba Seyisebe (CICB) la..
A bɛ tile caman bɔ sa, Mali faaba Bamakɔ tajiko gɛlɛya fanga ka bon yen, o bɛ ka jama dɔgɔya siraw kan k’u tonnen ton tajitayɔrɔw la. Nka o degun n’a ta bɛɛ, mɔgɔw b’a la k’u kologɛlɛya, ka muɲun a ko kɔrɔ, k’a ɲinin ɲɔgɔn fɛ halibi u k’u fanga kɛ kelen ye.
Gɔfɛrɛnaman ye kalanw jɔ fɔlɔ k’a daminɛ ɔkutɔburukalo tile 7 san 2025 jamana fan bɛɛ fɛ ; kalanw wulili kura ye kalo in tile 10 ye..
Ɲɔgɔndɛmɛn ani dɛnkɛrɛ kɛlɛli kalo hukumu kɔnɔ ani musow ka hɛrɛ ɲɛtaa kama, muso, den ni denbaya ɲɛtaa minisiri Madamu Jara Jɛnɛba Sanɔgɔ taara a ɲɛ da Sabalibugu sugu kan sibiri tɛmɛnnen in Bamakɔ faaba komini 5nan na..
Conseil des ministres.
