Kɔnfederasɔn kupu : Sitadimaliyɛn ni tɔn kura bɛ ɲɔgɔn na - Actualités et Infos au Mali et dans le monde

Ko sɛbɛlamaw bɛ daminɛ Sitadimaliyɛn fɛ kɔnfederasɔn kupu kuluntolantan tile fɔlɔ kama. O la, Bamakɔ Sitadimaliyɛn bɛ Afirikidisidi ntolantantɔn « Stellenbosch FC » bisimila Bamakɔ nɛgɛ kanɲɛ 17 waati la « 26Mars » farikoloɲɛnajɛkɛnɛ na. Nin bɔko fɔlɔ in na, Sitadimaliyɛn kalikan ye sebaaya sɔrɔli ye ; wa jama bɛɛ wulilen don k’u jɔ u kɔ o laɲinin in sabatiliko la.

Sitadimaliyɛn degelikaramɔgɔ Mamutu Kanɛ n’a bɛ wele « Murule », o y’a jira ko nin bɛna kɛ kuluntolantan tile fɔlɔ ye, min nafa ka bon kosɛbɛ tɔn fila in bɛɛ bolo ; sabula u bɛɛ jigi bɛ sebaaya sɔrɔli kan. A ko u y’u sɛbɛkɔrɔ labɛn ni teriyabalontan damadɔ kɛli ye ; minnu sera k’a to u ka se fiɲɛ kɔlɔsilen dɔw latilen. Wa k’u labɛnnen don fana ka balontan in kɛ k’a sebaaya sɔrɔ. Degelikaramɔgɔ ye nin fɔ kunun u ka ladalakunnafonidi senfɛ, ka kɔn balontan in daminɛni ɲɛ.

Degelikaramɔgɔ y’a jira fana, ko ntolantanna dɔw joginnnen don, k’a bɛ se ka kɛ olu tɛna se ka yɛlɛn kɛnɛ kɔnɔ tile fɔlɔ in na tɔn kura « Stellenbosch FC » kama. Fɛn min y’o tɔn kura in fanfɛla ye, Mamutu Kanɛ « Murule » ka fɔ la, nin ye Afirikidisidi tɔn in siɲɛ fɔlɔ ye kɔnfederasɔn kupu kuluntolantan janjo laban kɛnɛ kan, a bɛna k’o la balontan balalenba ye.

Sitadimaliyɛn cɛmancɛmɔgɔ Yusufu Kulubali tun bɛ kunnafonidilajɛ in kɛnɛ kan. Ale y’a jira ko a n’a tɔɲɔgɔnw hakili sigilen don a ko fɛ kosɛbɛ, wa ko u bɛɛ haminanko ye sebaaya sɔrɔli ye. A k’u b’a fɛ ka kanpaɲi daminɛ ni sebaaya ye. O siratigɛ la, u b’a ɲinin u senkɔrɔmadonbaaw fɛ, u ka bɔ kosɛbɛ bi araba, k’u laɲaga. Sitadimaliyɛn ka balontankow ɲɛmɔgɔ Agibu Ba bolo, olu ŋaniya ye kelen pe ye : ka se yɔrɔ jan na nin kupu in janjo la.

Tɔn ɲɛmɔgɔso ye dabali bɛɛ tigɛ ka balontannaw n’u senkɔrɔmadonbaaw bila cogoya ɲuman na baara kama. Fɛn o fɛn bɛ se k’a to ni tɔn bɛ wasa sɔrɔ nin kanpaɲi in na, a k’u y’o bɛɛ bila senkan.

Afirikidisidi cidenkulu cunna Bamakɔ kabini ntɛnɛndon. U ka ntolantantɔn in degelikaramɔgɔ ye Sitewu Barikɛri ye. Malidenw bɔra k’u kunbɛn k’u bisimila ni bonya ni kaarama ye. A fana y’a jira k’u sɛbɛkɔrɔ labɛnnen don Sitadimaliyɛn kama nin janjo la ; sabula k’u ye teriya ntolantan caman kɛ a ɲɛsigili la.

A ka fɔ la, u ni tɔn bɛ ɲɔgɔn sɔrɔ, min bɛ siɲɛ caman bɔ a ko la, fo ka deli k’a kupu ta san 2009. A k’u ka bonya bɛ Sitadimaliyɛn kan, nka k’u nakun Bamakɔ, o kɔni ye sebaaya ɲininni ye.

Tunizi jamanaden saba de bɛna balontan in file fiyɛ. Olu ɲɛmɔgɔ ye Merɛzi Meliki ye. A dɛmɛnbaaw ye Kalilu Hasani ani Ayimɛni Isimayili ye, jaalatigɛla 4nan bɛna kɛ Nidali Letayiyɛfu ye. Kulu B kɔnɔ « RS Berkane » ni Angola « Desportivo Lunda-Sul » bɛ ɲɔgɔn sɔrɔ ; O balontan bɛ kɛ Bɛrikani farikoloɲɛnajɛkɛnɛ kan.