Furancɛlafanga jamanakuntigi Zenerali darimɛ Asimi Goyita ye saheli kungo AES jamana saba ninnu tɔgɔla darapo yɛlɛnko fɔlɔ ɲɛmɔgɔya kɛ Kuluba kunun ntɛnɛn marisikalo tile 3 san 2025. A kɛra o cogo la waati kelen na kɔnfederasɔn jamana tɔ fila fana na. Minisiriɲɛmɔgɔ Zenerali de diwisɔn Abudulayi Mayiga, bulonba kuntigi Zenerali de kɔri darimɛ Maliki Jawu, olu tun b’a kɛnɛ kan. Gɔfɛrɛnaman minisiriw ka fara lasigiden minnu b’an ka jamana kɔnɔ, olu yɛrɛ tun bɛ yen. Nin waati in bɛ dɔ farali kofɔ jamana saba ninnu ka jɛɲɔgɔnya fanga kan, k’u ka yɛrɛmahɔrɔnya jira an’u bugunnatigɛ k’a sababu k’u tɔgɔla darapo ye. Saheli kungo kɔnfederasɔn sigili senkan, o ye dakunba ye marayɔrɔ jɛɲɔgɔnya na Afiriki tilebinyanfan fɛ, ka kelenya ni ɲɔgɔndɛmɛn sinsinni kofɔ jɛkamiiri kɔnɔ Burukina Faso, Nizɛri ani Mali cɛ. Kɔnfederasɔn kuntilennasɛbɛn waleyali Mali ka ɲɛmɔgɔya kɔnɔ, o bɛ jamana saba ninnu ka kandi sɛmɛntiya basigi ani yiriwali ɲɛtaako la marayɔrɔ la. Bɛn kɛra AES kɔnfederasɔn darapo forobayali kan Bamakɔ feburuyekalo tile 22 san 2025 a minisiriw ka lajɛ dɔ senfɛ. Nka a forobayali kɛra Mali, Burukina Faso ani Nizɛri jamanakuntigiw jɛnnen kɔ n’a cogoya ye. Darapo in bɛ u foroba bugunnatigɛ an’u jamanadenw haminankow kofɔ. Ni nin waleya in ye, kɔnfederasɔn bɛ ɲɔgɔndɛmɛn ni jigisigi cikan gɛlɛn di siniɲɛsigi hɛrɛma ani yiriwali kunkan saheli kungo kɔnɔ. Nin waati in bɛ paraɲɛ kelen jira dɔ farali la kɔnfederasɔn jamanaw ka jɛɲɔgɔnya fanga kan Mali kɔkankow ni diɲɛ tɔnbaw cɛ koɲɛnabɔ minisiri Abudulayi Jɔpu y’a jira, ko kɔnfederasɔn darapo yɛlɛnna tuma min na Kuluba, a tun b’a la ka yɛlɛn o waati kelen na Ɲame (Nizɛri) ni Wagadugu (Burukina Faso) o jamanakuntigiw fana ka ɲɛmɔgɔya kɔnɔ, n’o ye Zenerali de birigadi Abudurahamani Tiyani ani Kapitɛni Ibarahimu Tarawele ye. Abudulayi Jɔpu y’a sɛmɛntiya, ko ni nin darapo in ye, bɛnkan donna u ni ɲɔgɔn cɛ, ka paraɲɛ kelen wɛrɛ kɛ saheli kungo kɔnfederasɔn jɔli an’a sinsinni na jamanaw fɛ, ani fana, ka cikan gɛlɛn jɔnjɔn lase kelenya, faraɲɔgɔnkan ani bato la Mali, Burukina Faso ani Nizɛri fasojamaw fɛ kɔnfederasɔn in ka donɲɔgɔnna kɔnɔ. Mali kɔkankow minisiri ye ɲɛfɔli kɛ fana, k’ale ka minisiriso in ni bɛnkantakuluw bɛ baara la ɲɔgɔn bolo ko dɔw kan darapoko in kunkan, min dabali tigɛlenw bɛna da jama tulo kan kɔfɛ. Kɔnfederasɔn tɔgɔla darapo in tangililama don, k’a kɔnɔ kɛ ɲuguji ye, ka kɔnfederasɔn ja (logo) k’o cɛmancɛ la. Ɲuguji bɛ ɲɛtaa, jigisigi, yiriwali, kununni kura ani kurayali kofɔ. A b’an sigidalafɛnw fana kofɔ, minnu ye hɛrɛ ye siniɲɛsigiko la ka damakɛɲɛ n’an ka jamana saba ninnu ye. Dɔkala Yusufu JARA Amara Bɛni Yaya TARAWELE Esɔri sɛbɛnnijɛkulu
Dɔkala Yusufu Jara
Vente de carburant.
Vente des produits phytosanitaires.
Sport/football.
Terrorisme à Kita.
Salon des armements.
Annulation du pèlerinage.
