Mali furancɛlafanga jamanakuntigi Zenerali darimɛ Asimi Goyita, kunun a ye Gana jamanakuntigi Jɔni Daramani Mahama ka cidenkulu bisimila. O ɲɛmɔgɔya tun bɛ jamanakuntigi yɛrɛ balimakɛ Aliferedi Mahama bolo. Cisɛbɛn tun b’u bolo ka di a ma k’a ɲinin a fɛ, a ka ye u ka jamanakuntigi sugandilen sigili la fanga la Akara zanwuyekalo tile 7 san 2025. Kɔkankow ni diɲɛ tɔnbaw cɛ koɲɛnabɔ minisiri Abudulayi Jɔpu tun b’a kɛnɛ kan. Ɲɔgɔnye kuncɛlen, cidenkulu in ɲɛmɔgɔ y’a jira kunnafonidilaw la, k’u ka jamanakuntigi Jɔni Daramani Mahama de tun y’a ci. Aliferedi Mahama ko nani kun tun ye ka Mali furancɛlafanga ye, ka cisɛbɛn di a ma bolo ni bolo, k’a ɲinin a fɛ a ka ye u ka jamanakuntigi ka fanga tali kɛnɛ kan. Dɔ farali Mali ni Gana cɛ jɛkabaara fanga kan, kɔrɔfɔ fanba bolila o kan zenerali darimɛ Asimi Goyita ni Aliferedi Mahama cɛ. O ye ɲɛfɔli kɛ, ko Gana sago don ka dɔ fara u cɛ jɛkabaara fanga kan, fo k’a walangata ka se AES kɔnfederasɔn jamanaw ma. A ko fana, k’u ka jamana sago don ka baara kɛ ni kɔnfederasɔn jamanaw ye, ani ka dɛmɛn don basigibaliya min bɛ Mali kɔnɔ ani AES kɔnɔ, o kɛlɛli ɲɛtaa la. Gana jamanakuntigi sigili fanga la, o ye zanwuyekalo tile 7 ye san 2025 ; a kalataw kɛta desanburukalo tile 7 san 2024. Yamaruya tun tɛ jamanakuntigi Nana Akufo-Ado bolo k’a kanbɔ kokura fanga nɔfɛ bilen, sabula u ka sariyasunba bɛ dantigɛli kɛ, ko fanga sarati ye tako fila ye ka a ɲɔgɔn kan. Fanga sinamatɔn ka cɛbɔ tun ye jamanakuntigi kɔrɔ Jɔni Daramani Mahama ye. Ale de ye sebaaya sɔrɔ kalataw la u ka politikitɔn (NDC) tɔgɔ la. Kalatala 56,6% y’a kandi a ma. Kalata tako laban tun b’a ni jamanakuntigi-dankan Mahamudu Bawumiya cɛ ; kalatala 41,6% y’a kandi ale ma. Jamanakuntigi sugandilen in ye layiu ta, ko a bɛna kow ta kura ye, ka kuntilenna kura di jamana ma a kɛlen in na jamanakuntigi ye kokura. Dɔkala Yusufu JARA Jedone JAMA
Dɔkala Yusufu Jara
Sport/football.
Terrorisme à Kita.
Salon des armements.
Annulation du pèlerinage.
Tasuma kasaara dɔ kɛra kunun ntɛnɛn nowanburukalo tile 10 san 2025 KAFO JIGINƐW dagayɔrɔ la ACI 2000 kɔnɔ Bamakɔ. Sapɛri-pɔnpiyew ka wuli ka jɔ joona ani baara kɛtaw mabɛnni kosɔn, kasaara in sera ka dalasa a tuma na mɔgɔ si kelen ni ma to a la. An ye kunnafoniw sɔrɔ Bamakɔ mara.
Ni kumaɲɔgɔnya dɔgɔyara furu kɔnɔ, a bɛ fiɲɛ bila kowkɛcogo ɲuman na furu ɲɔgɔnw cɛ. Sigi gɛlɛyali sababu dɔw bɛse ka kɛ, ɲɔgɔn faamubaliya, yaafabaliya, erezo sosiyowkɔlɔlɔ ani k’i furu ɲɔgɔn jate i n’a fɔ nkunankunan tɛ mɔgɔmin na.
