Nizεri minisiriɲεmɔgɔ ka taama Mali kɔnɔ : Hakilila falenw kεra jεkabaara, kojugubakε kεlεli ani nafoloko kan

Nεgε kanɲε 12 tεmεnnen si sanga 40 ye, Nizεri minisiriɲεmɔgɔ ka pankurun cunna Bamakɔ, Modibo Keyita tɔgɔla pankurunjiginkεnε na Senu. A kunbεnna Mali fana minisiriɲεmɔgɔ D^r Sogεli Kokala Mayiga fε ; minisiri caman tun b’o nɔfε.

U fila kεlen ka ɲɔgɔnye kunkurunnin kε, kɔkankow ani diɲε tɔnbaw cε koɲεnabɔ minisiri Abudulayi Jɔpu ani mara ni desantaralizasɔn minisiri Kolonεli Abudulayi Mayiga farala u kan. U labanna ka minisiriɲεmɔgɔso magεn, ka baara tɔw kε yen. Lafasali ani sɔrɔdasi kɔrɔw ka minisiri Kolonεli Sajo Kamara, basigi ani siwiliw lakananni minisiri Zenerali Dawudi Ali Mohamedini, nafoloko ni wariko minisiri Aluseni Sanu, olu y’u dafa yen. Minisiri jɔyɔrɔbatigi caman tun bε Nizεri minisiriɲεmɔgɔ nɔfε taama in na.

Dantigεli la, Nizεri minisiriɲεmɔgɔ fɔlɔla k’u ka jamanadenw ka foli ni tanuni lase an ka jamana ma, u dεmεnni na Sedeywo (CEDEAO) ka gεrεntεw kɔnɔ. A ye foli fana lase Burukina Faso ma. A k’u ye dεmεn min ɲεsin u ma, tiɲε yεrε la u wasara n’a ye.

A y’a jira ko bεnkan sɔrɔla ni Burukina Faso ye u ka jamana lasɔrɔli la ni dunfεn kεrεnkεrεnnenw ye. Iyemuwa (UEMOA) fana ye gεrεntε min sigi u ka jamana kan wariko la, a da sera o kɔlɔlɔw ma. Nka, o n’a ta bεε, u b’a la k’u firifiri u seko la.

Kunnafoni y’a jira, ko Alizeri sago ye fɔkabεn sabatili ye Nizεri faama kuraw ni Sedeyawo cε ; nka u ma se ka ɲɔgɔn faamuya o kεcogo la fɔlɔ, k’a sababu kε kow taacogo sennateliya ye. Nizεri ye dan dɔw tigε, minnu tε kɔsagon. Alizeri ka fɔ la, ale sago tε kεlε ka wuli ka bin Nizεri kan. O dun tε ɲε n’a ma Nizεri fanga kura lakodɔn. Fεn min y’u cε jagosira dayεlεli ye kumaw kεra o fana kan. A ɲininna Alizeri fε tuguni, a k’a fεla jεya, a kεra Sedeyawo ye walima jamana wεrε, n’o binna Nizεri kan, a bε mun kε ? Minisiriɲεmɔgɔ kɔni y’a jira, k’olu sago ye a ka Nizεri dεmεn a ka yεrεmahɔrɔnya yεrε-yεrε sɔrɔli la.

Minisiriɲεmɔgɔ ka taama Mali kɔnɔ, o kun dɔ fana kεra jamana fila ninnu cε jεɲɔgɔnya sinsinni ye ka taa a fε. O de kosɔn a ni minisiri kεrεnkεrεnnw bε ɲɔgɔn fε nin taama in na ; tajikow minisiri b’o la. U bεna jateminε kε, o sabaticogo la u ni ɲɔgɔn cε. Nizεri b’a ka taji bɔ ka feere kɔkan, Mali bε se k’a ɲεmada o nɔgɔyaw an’a gεlεyaw fε.

Lamini Zeyini Ali Mahamani labanna k’a jira, ko a tεna mεεn tuguni, Nizεri ni Mali bεna ɲɔgɔnye wεrε kε u cε jεɲɔgɔya sinsincogo la halibi ka taa a fε. Da sera yiriwali poroze caman ma u cε ; Liputako-Guruma taw b’o la lakanan sabatili siratigε la, ani sɔrɔ jiidili siraw. 

Umaru Jakite

Dɔkala Yusufu Jara