Polisi ani siwiliw lakananni : Mɔgɔ 700 tali bolodalen don

Basigibaliya min b’an ka jamana kɔnɔ, o furakεcogo dɔ ye mɔgɔ caman tali ye ka fara lakananbaaw hakε kan. Kabini san 2020, furancεlafanga ɲεmɔgɔw cεsirilen don nin kow fε, min b’a to bεn ani lafiya bε se ka don an ka jamana kɔnɔ.

Mɔgɔw tara sɔrɔdasiya la salon, ɲinan, tali da bε polisiya ani siwiliw lakananniko la. An bε don min na, polisiw bilala sɔrɔdasiya minεn kɔnɔ. U bε se ka wele ciw la jamana fan bεε fε sisan ; kεrεnkεrεnnenya la, fɔɲɔgɔn fanga ka bon yɔrɔ minnu na, ani yɔrɔ minnu bɔɔsira kojugubakεjεkuluw la olu ka san caman maminεni kɔfε.

O de y’a to basigi ani siwiliw lakananni minisiri Zenerali Dawudi Uludu Ali Mohamedini ka laseli forobayara kunun alamisa ɔkutɔburukalo tile 12 san 2023, k’a jira ko tali bεna kε polisiya ani siwiliw lakananni na. Polisi 600 ani sapεri pɔnpiye 100 tali de ko don.

Walasa mɔgɔ ka se ka ta polisiya ani sapεri pɔnpiyeya la, o saratiw filε : si hakε k’a ta san 18 na ka se 28 ma a cayalenba ; ka kε Maliden ye fayanfan ani bayanfan ; a ka diya i yεrε nikun ye ; ka kε cε gana walima muso gana ye, i n’i hakili ka sɔrɔ ɲɔgɔn fε, i ka hadamadenya hakε dafalen ka sɔrɔ i bolo, a ka sɔrɔ fana i bε se ka sɔrɔdasiya baaraw kε.

O siratigε la, sεbεn minnu wajibiyalen don, olu filε : wolosεbεn kelen ; Malidenya sεmεntiyasεbεn kelen ; lajεyali kiiriso fε ka bε waleya jugu dɔ ma (kaziye zudisiyεri) o sεmεntiyasεbεn kelen ; Deyεfi sɔrɔli sεmεntiyasεbεn (dipulɔmu) kelen ; sεbεn min b’a sεmεntiya ko hali n’a y’a sɔrɔ i ye Baki (BAC) kε, nka o ma sɔrɔ, o sεmεntiyasεbεn kelen ; kariti NINA foto legalizelen kelen walima fisi εndiwiduyεli foto legalizelen kelen ; sigiyɔrɔ bugunnatigεsεbεn (rezidansi) kelen ; sεbεn min b’a sεmεntiya k’i ye cε gana walima muso gana ye wa den t’i bolo ; ani karadantε sarati dafabali foto talen kelen.

O sεbεnw bε fara ɲɔgɔn kan ka di, k’a daminε ɔkutɔburukalo in tile 23 la ka se a tile 29 ma san 2023. Mɔgɔ minnu bε Bamakɔ, olu bε se k’u taw bila polisisow la, Bamakɔ faaba polisiw ɲεmɔgɔsoba la, ani BSI (Birigadi Sipesiyali dεntεriwansɔn) la.  Mɔgɔ minnu bε marayɔrɔ tɔw kɔnɔ, olu bε se k’u ka sεbεnw bila u ka marayɔrɔ polisiw ɲεmɔgɔso la.

Kabini diɲε tɔnba ka basigi sabatilijεkulu ye sariya 2690 ta ka Minusima ka baara ban Mali kɔnɔ, ani k’o dagayɔrɔ labilataw latεmεn Mali sɔrɔdasiw ma, wulikajɔw bε sen na walasa jamana bε se k’a ka fanga boli a ka dugukolo yɔrɔ bεε kan. O de kosɔn furancεlafanga ɲεmɔgɔw, ka Kolonεli Asimi Goyita to u ɲεfε, u b’a la ka jamana lakananbaaw dεmεn ni baarakεminεn nafamaw ye ani ka dɔ fara kεlεcε hakε kan san o san.

O kun ye lakananbaa hakε bε se ka labɔli kε cogo min na, u disi ka se ka jamana fan bεε lasɔrɔ. O laɲinin dɔ ye nin mɔgɔta kun ye polisiya ani sapεri pɔnpiyeya la. A bε dabɔ fana, hadamadenw an’u bolofεnw taakasegin nɔgɔyali kama Mali lafiyalen, basigilen kɔnɔ. Polisiw ni sapεri pɔnpiyew bilala sɔrɔdasiya minεn kɔnɔ, walasa ka se ka fangaba don u la ka taa a fε lakananko la, sigidalamɔgɔw hakili ka sigi n’u ye kosεbε.

Namori KUYATƐ

Dɔkala Yusufu JARA