Furancɛlafanga jamanakuntigi Zenerali darimɛ Asimi Goyita
Kunun nɛgɛ kanɲɛ 08
waati, jamanakuntigiso la Kuluba, jamanakuntigi Zenerali darimɛ Asimi Goyita ye
sariya n°2025-005 ta mɛkalo tile 13 san 2025, ka sariya n°05-047 min tara
utikalo tile 18 san 2005 politikitɔnko la ani sariya n°2015-007 min tara marisikalo
tile 4 san 2015 fanga sinamatɔnw ɲɛmɔgɔ bugunnatigɛli la, k’olu binni yamaruya
di. Jɛn tun kɛra ni sariya in ye furancɛlafanga bulonba la ntɛnɛn tɛmɛnnen in u
ka sigi senfɛ.
Sariya min tara
jamanakuntigi fɛ ka yamaruya di, o sariyasen 1 b’a faranfasiya k’u tun bɛ mako
fɛn o fɛn ɲɛ k’o bɛɛ binna, n’o ye sariya n°05-047 min tara utikalo tile 18 san
2005 politikitɔnko la ani sariya n°2015-007 min tara marisikalo tile 4 san 2015
fanga sinamatɔnw ɲɛmɔgɔ bugunnatigɛ kan. A sariyasen 2 la, a jirala ko kɛcogo
kura bɛna dantigɛ politikitɔnko taabolo la ka kɛɲɛ ni sriyasunba ye.
Ka hakililajigin kɛ, ko
politikitɔnko sariya ani fanga sinamatɔnw ɲɛmɔgɔ bugunnatigɛli sariya binni
laɲinin kɛra san 2021 sigikafɔba senfɛ. O sigi ninnu senfɛ, Malidenw y’a ɲinin
dɔ ka bɔ politikitɔn hakɛ la ani ka fanga sinamatɔnw ɲɛmɔgɔ jɔyɔrɔ datugu. O de
kosɔn yɛlɛma minnu daminɛna, furancɛlafanga gɔfɛrɛnaman b’a la ka fasojama haminanko
de waleya.
Sigikafɔba laɲininw
waleyali hukumu kɔnɔ jamana jɔli kura siratigɛ la, yɛlɛma donniko la sariya n°05-047
min tara utikalo tile 18 san 2005 politikitɔnko
la, minisiriɲɛmɔgɔ dɛmɛnni minisiri ye bataki ci politikitɔn ɲɛmɔgɔ
kelenna ma ani tɔn minnu tɛ politikitɔnw ye olu ɲɛmɔgɔw ma desanburukalo tile
19 san 2024 ko u k’u hakililaw jira a ko la.
Sigikafɔba laɲininw na, saba
bɛ politikitɔnw kunkan, kɛrɛnkɛrɛnnenya la dɔ bɔli u hakɛ la, sariya gɛlɛn tali
tɔn kuraw sigili la ani faso nafolo doncogo u ka baara kɛtaw dafɛ, yɛlɛma donni
polikitɔnko sariya la. Walasa ka se k’o laɲinin ninnu waleya, wajibi tun ye
sariya n°05-047 min tara utikalo tile 18 san 2005 politikitɔnko la ani sariya
n°2015-007 min tara marisikalo tile 4 san 2015 fanga sinamatɔnw ɲɛmɔgɔ
bugunnatigɛli kan, k’o fila bɛɛ bin. O de b’a to ni gɔfɛrɛnaman bɛ se ka yɛlɛma
kuraw kɛ a ɲɛma, k’a sɔrɔ fiɲɛ ma bila demokari ani politiki camanko la jamana
kɔnɔ.
Minisiriɲɛmɔgɔ dɛmɛnni
minisiri ka ɲɛsin politiki yɛlɛma kuraw ani kalataw tɛmɛnsira senkɔrɔmadonni
ma, o seginna sariya ninnu binni tɛmɛnsira kan bulonba kɔnseyew ɲɛkɔrɔ. Mamanin
Nasire ka fɔ la, san 2023 zuluyekalo tile 22 sariyasunbala bɛ yɛlɛmani caman
dajira jamana jɔli kura hukumu kɔnɔ. A y’a jira ko an bɛ taabolo min kan,
yɛlɛmani kun bɛ cakɛda caman kan an ka jamana kɔnɔ. Ni sariya ka kan ka ta o
bɛɛ kama fasojama haminankow waleyali sira fɛ, o y’an ka yɛrɛmahɔrɔnya bonyani
ye ; wa a tɛ ɲɛ fo o yɛlɛmaniw ka kɛ ka se u dan na.
Minisiri labanna k’a jira, ko gɔfɛrɛnaman tɛna sariya kuraw ta galabagalaba la,
ka wo bɔ fan wɛrɛ fɛ. Baara bɛ kɛ basigi kɔnɔ ka sɛbɛn ɲuman dajira bulonba la.
Bɛɛ sen bɛ don o baara in na.
Dɔkala Yusufu JARA
Oumar DIAKITE