Samatasεgεw : Ɲangilibere farin dara Hamari Tarawele kun

Mali kɔkanntolantanna in ɲangira, karitɔn bilenman dira a ma, ka da a kan ko a ye waleya min kε Mali ni Kɔnɔwari ka ɲɔgɔnsɔrɔ kɔfε, o tε ɲuman ye. A kεra karidefinali senfε. A ɲangira (CAF) fε balontan naani bε tεmεn a kan ; nka fila juru bε don a la. O b’a jira ko Mali ka kan ka ɲεbilantolantan fila min kε KANI Marɔku 2025 nata kama, o fila bε tεmεn Samatasεgεw ɲεmɔgɔ kan. (CAF) ma dan o ma, a ye Mali sennantolantan tɔnba (Femafuti) fana ɲangi, o bε sefawari miliyɔn 5,5 sara alimani ye, k’a sababu kε Mali ntolantanna wεrεw kεcogo jugu ye ka ɲεsin a don jalatigεla ma, n’o ye Eziputi jamanaden ye.

Hakililajigin na, Mali ni Kɔnɔwari bεnna karidefinali la. O ye Mali gosi 2 ni 1 mɔɔnɔbɔ kɔnɔna na. Samatasεgεw ɲεmɔgɔ Hamari Tarawele an’a tɔɲɔɔn dɔw ye dan kari jalatigεla la, k’o ma sɔn olu k’u ka kɔrinεri laban sɔrɔlen tan. O de kosɔn jalatigεla ye karitɔn bilenman jira Hamari la. O y’a sɔrɔ balontan yεrε kuncεra kaban. Tiɲε don Hamari dusukasilen tun don ; nka a ma hakilima baara kε. A ye kasa tεmεn kɔnɔ wɔɔrɔ kan. A tun ka kan k’a yεrε minε nin ko suguyaw ma ; sabula u ɲangata bε se Samatasεgεw ma ani jamana yεrε ma.

N'a y’a sɔrɔ Angilεjamana ntolantan don, jalatigεla b’a to fɔlɔ kɔrinεri ka tan, ka sɔrɔ ka file laban fiyε ka ntolantan kuncε. Nka sariya b’a jira, ko jalatigεla ye fangatigi de ye kεnε kan. A bε se ka file laban fiyε ni sarati dafara ko mana kε cogo o cogo la.

I n’a fɔ Mali sennantolantan tɔnba cogoya, Kɔnɔwari fana ta ɲangira (CAF) fε, ka da a ka ntolantantɔn kεcogo jugu fε. O bε sefawari miliyɔn 3 sara alimani ye. Mali Femafuti ɲεmɔgɔ Sidi Bekayi Magasa ɲininkalen a hakilila la, o y’a jira ko ntolantannaw ye nin waleya min kε, o ma diya ale ye ; nka, ko Femafuti bεna a ka ɲangiliwari in sara. Ko ale tun b’a dɔn pεrε, ko, ko bε waleya in kɔfε ; sabula k’u ma ɲuman kε jalatigεla la Mali gosilen karidefinali la.

Jεnεba BAGAYƆKƆ

Dɔkala Yusufu JARA