Ko minnu tun bolodalen don a don lajε kama, olu fεsεfεsεlen kɔ, minisirilajε bεnna ninnu kan : - sɔnni sariya poroze dɔw waleyali ma ; - ka mɔgɔ dɔ sugandi ka bila jɔyɔrɔ dɔ la ; - ani ka kumaɲɔgɔnya dɔw latεmεn. O kumaɲɔgɔnyako nasira la, an da bε se jamana jɔli kura minisiri ka ɲεsin gɔfεrεnaman ni fangabulonw cε koɲεnabɔ ma, o ka kumaɲɔgɔnya ma gɔfεrεnaman ni sigidaw baarakεlaw hakε jateminεni bε dankan min na, o kow kan. Gɔfεrεnaman ni sigidaw baarakεlaw jate dɔnni baaraw kɔlɔsili siratigε la, jεkulu kεrεnkεrεnnen min sigira senkan o kama, o ye gεlεya dɔw kofɔ jateminεnaw kunkan yɔrɔw la, minnu lasɔrɔli ka gεlεn halibi, ani ka fura dɔw dajirali kε o gεlεyaw latεmεncogo la, min b’a to baara ka se ka dagun. Gɔfεrεnaman ni sigidaw baarakεla hakε jate dɔnni poroze, n’a tubabukan daɲε surun ye « SIGRH » ye, a kuntaala bε mɔɔnɔbɔ ka se zuwεnkalo tile 30 ma san 2024, walasa : - ko kεta minnu dεnnen don a la, olu ka se ka ta ba la, i n’a fɔ yɔrɔ minnu lasɔrɔli ka gεlεn, olu baarakεlaw hakε dantigεli ; - lasigidensow ni kɔnsulaw baarakεlaw hakε dantigεli ; - SIGRH kunnafoniw kalansoli ɲɔgɔn na εntεrinεti fε, o dagayɔrɔw sigili ; - Kunnafoisεbεn kun fɔlɔ labεnni ; -laɲinin kεlenw tɔpɔtɔli ; - Kunnafonisεbεn laban labεnni ; - SIGRH sεbεn kura gɔfεrεnaman ni sigidaw baarakεlaw hakε kan, o sɔrɔli bolo kɔrɔ. Hakililajigin- Poroze min ɲεsinnen bε gɔfεrεnaman ani sigidaw baarakεlaw hakε jateminεni ma (SIGRH), o waleyali hukumu kɔnɔ, jamana jɔli kura minisiriso ye lajε kε ɔkutɔburukalo tile 17 ka se a tile 20 san 2023 (CICB) la Bamakɔ. A baaraw daminεni ɲεmɔgɔya tun bε jamana jɔli kura minisiriso sekeretεri zenerali Abarahamu Bεngali bolo. Ale de ye baara in kolabεnjεkulu ɲεmɔgɔ fana ye. Gɔfεrεnaman ka baarabolodalen (PAG) kɔnɔko dɔ ye poroze (SIGRH) ye, fangabulonw yiriwali siratigε la. Jamana sigikafɔba min fana kεra, o laɲininw dɔ don jamana jɔli kura la. Poroze in laɲinin ye gɔfεrεnaman ani sigidaw tɔgɔla baarakεlaw hakε ka dɔn a ɲεma, O b’a to saraw hakε fana ka dɔn. Baarakow cogoya fana bε se ka dɔn o la seko kunda. Poroze in ɲεmɔgɔya bε jɔsen fila bolo : fεεrεjεkulu min ɲεsinnen bε kuntilenadi ma (COS) n’a ɲεmɔgɔ ye jamana jɔli kura minisiri ye, sigidaw cakεdaɲεmɔgɔw, nafoloko ni wariko minisiriso mɔgɔw, gɔfεrεnaman baarako ani kalanko mɔgɔw, ka fara jamana basigili cakεda ɲεmɔgɔba kan, olu b’o kulu kɔnɔ. Fεεrεjεkulu min ɲεsinnen bε waleyali ma (CTE), o mɔgɔw bε jεkulu misεnnin caman na. Olu de bε (COS) bεnkanw waleya. A ɲεmɔgɔ ye jamana jɔli kura minisiriso sekeretεri zenerali Abarahamu Bεngali ye. Gɔfεrεnaman ani sigidaw baarakεlaw hakε dɔnni, o baaraw foroba daminεni kεra ɔkutɔburukalo tile 26 Segu, minisiriɲεmɔgɔ Dr Sogεli Kokala Mayiga ka ɲεmɔgɔya kɔnɔ. Jamana jɔli kura minisiriso sekeretεri zenerali ka dantigεli kɔrɔfɔw la, a ye hakililajigin kε, ko baara in nun donna kabini san 2022 mεkalo tile 24 furancεlafanga jamanakuntigi Kolonεli Asimi Goyita fε. O don ni bi cε baara dɔw waleyara. I n’a fɔ baarakεlaw hakε jateli. Abarahamu Bεngali ka fɔ la, o dakun in waleyali sera k’a to gɔfεrεnaman ani sigidaw baarakεla hakε ka se ka dɔn. A dakun filanan ye mɔgɔw bugunnatigεw dɔnni ye. O de kosɔn gɔfεrεnaman yεrε bε k’o ta ba la. A ko si tεna siri kɔkanmɔgɔ la. Mɔgɔ 306 de tara baara in kεli kama. U bε don cakεda kelenna kɔnɔ jamana kɔnɔ yan ani kɔkan. U tun ka kan ka tila a la yanni nowanburukalo tile 1lɔ cε. Nka o ma se ka kε ; o de kosɔn minisirilajε ye sarati mɔɔnɔbɔ k’a se zuwεnkalo in tile 30 ma san 024. Dɔkala Yusufu JARA
Dɔkala Yusufu Jara
Lajɛ in ɲɛmɔgɔya tun bɛ minisiriɲɛmɔgɔ Zenerali de diwisɔn Abudulayi Mayiga bolo. A y’a gɛlɛya cakɛdaw ma, minnu bɛna degedenw sɔrɔ, u ka baaradege sarati fɔ ka gɛlɛya u ye.
Denmisɛnninw (cɛmanw ni musomanw) bɛ nin laadalako in kɛ ni sunkalo ye tile 10 sɔrɔ. Laada min don, hakilimaw ka fɔ la, a bɛ ɲɔgɔndɛmɛn ani ku-ɲɔgɔn-kan hakilila de kofɔ.
Selen Marɔku sibiri su k’a dugu jɛ kari la, degelikaramɔgɔ Tɔmu Sɛnfiye n’a ka cɛdenw y’u ka farifoni balontanko fɔlɔ kɛ ntɛnɛn marisikalo tile 17 san 2025. Cidenkulu mɔgɔ tɔw ka kan ka se Ujuda bi tarata ni Ala sɔnna. Ujuda ye dugu ye, min bɛ Marɔku ni Alizeri dancɛ la.
Kameruni sennantolantan tɔnba (Fecafoot) ɲɛmɔgɔ Samuyɛli Eto’o kɛra Afiriki sennantolantan tɔnba « CAF » ɲɛmɔgɔkulu mɔgɔ ye..
An ye Afiriki jamanaw ntolantantɔnw ka kupu U17 bolodacogo dɔn. A bɛ daminɛ marisikalo tile 30 k’a kuncɛ awirilikalo tile 19 san 2025 Marɔku jamana na..
A ɲininnen don sigidalamɔgɔw fɛ, u ka fara Bamakɔ faaba Meriba tɔpɔtɔ jɛkulu kɛrɛnkɛrɛnnen ka taabolo kura kɔ, min b’a to Bamakɔ bɛ se ka segin ka kɛ dugu saniman ye k’a sigili diya an bolo.
