Tile bilen kɔrɔ jumandon marisikalo tile 14 san 2025. Kɔfilacɛ ni Kangaba cɛ ye km35 ye ; mankan dan ye yen damanda ta ye. Musomanin tan ni kɔ ɲɔgɔnna, minnu si b’a ta san 12 la ka se 17 ma, olu bɛ tonnen bɛ kɔ dɔ dala. I bɛ sɔlikanw mɛn dugukolo jalanw kan fan bɛɛ fɛ, mɔgɔ mankan duurulen bɛ ani yɛlɛkanw funteniba in kɔrɔ. An ɲɛ ma da cɛ kelen kan yen. Musow dɔrɔn de ye yen kotigiw ye. Aminata Sɔ san 16, kun digilen bɛ ka cɛ ɲɛ, a bɛ ka misɔrɔ bilenmannin siri o dala ka kabamugu cilen cɛ n’a fanga bɛɛ ye, fo a bɛ to ka sɔli kɔrɔnin yɛlɛma-yɛlɛma a tɛgɛ ɲaramaw ni ɲɔgɔn cɛ, k’o seri nɛgɛtɛmɛnba kan. Mɛtɛrɛ damadɔ o kɔfɛ, a kanɛmɛmuso Fatu san 15, o birilen bɛ kɔ kɔnɔ. A b’a tɛgɛ duuru ji jukɔrɔ ka tɛmɛn wuguba, ka to k’a sigimajɔ sanuko fɛ. Nisɔndiya bɛ kɔlɔsi a ɲɛ kan ni fɛn dɔ yeleyelela a kun, tile kɔrɔ. Fo yɔrɔ jan, Mariyamu Keyita, u bɛɛ la kɔrɔbalen, o bɛ kɔlɔsili la. Ale si bɛ san 8 na. A sɛbɛkɔrɔ labɛnnen bɛ ɲɛmɔgɔya baara in fɛ. Palan falen bɛ ji la a bolo, ka sin tabali kɔrɔba dɔ la, ka ji suuru bɔgɔ fin kan yen. Filen kolon min b’a bolo kelen na, a bɛ bɔgɔ woloma n’o ye sanu ɲininni na. A timinan ka di o fɛ kosɛbɛ, wa a wasalen don baara in kɔnɔ, hali ni ko dɔw ye gundo y’a bolo minnu tɛ lakali nabaa dunan ye. Tuma dɔw la, a b’a kanbɔ a tɔɲɔgɔnw ma, k’u ka tɛmɛn yuguyugu kosɛbɛ, u kana a to fɛn ka bɔn. Mariyamu y’o kulu in koloma ye. A ye lakali kɛ u ka baara kan ni hakililatigɛ ye. A ko ale n’a tɔɲɔgɔn minnu filɛ, u bɛɛ ye falaw ye, u bɔra denbaya sentanw kɔnɔ ka na yan. A ka fɔ la, kalan ka ɲin ; nka demisɛn caman b’a la k’a bila k’u ɲɛsin damandaw ma, walasa u na se ka dumuni sɔrɔ ka dun ka to balo la. Gɔngɔn bilen bɛ fan bɛɛ fɛ. O kɛlen bɛ k’u ka finiw bilen, an’u ɲɛda wɔɔrilenw. Ɔrɔbu bari-barilen b’a dɔw la, pantalonba b’a dɔw fana na, u ye minnu ta u kɔrɔkɛw kɔ. Dɔnkilidakan bɔra. O tɛ mɔgɔ wɛrɛ ye Ayisata Koyite kɔ, san 14. A b’a la ka kabaw susu ni jirikolonkalan ye. Tɔw y’a ka dɔnkili laminɛ. U kanw ka di, u yɛrɛw nisɔn ka di baara gɛlɛn in n’a ta bɛɛ. Sanga ni wati bɛɛ la, u bɛ to ka dɔnkilininw da ka waati tɛmɛn u kan, k’u yɛrɛ laɲinɛ baara sɛgɛn kɔ. U bɛ ɲɔgɔn dɛmɛn ko kɛtaw la yɔrɔ in na, ka to ka baro bila ɲɔgɔn na fana. Minɔgɔ mana min minɛ, girife falen bɛ ji suman na ka dulon jiri la u kɛrɛfɛ. Sanu sɔrɔta kɔni ka dɔgɔn ; nka u jigi bɛ belebele kan don dɔ la ; wa bɛɛ fana ka gundonin maralen b’a kɔnɔ : Dɔw hami ye ɔrɔbu kuranin sanni ye, dɔ yɛrɛ hami ye selimafini sanni ye an’a somɔgɔw ye, dɔ fana ko kalanminɛnw, ka segin kalan ma. Nin musomannin ninnu dɔrɔn tɛ sanuɲininninaw ye dugukolo jalanw kan. U bɛ yɔrɔ min na o ni kɔrɔn cɛ, kɔ dɔ bɛ yen, o kankunw bɛ to ka waari ka cun a kɔnɔ, cɛmannin dɔw b’u sɔn mununtannin kɔrɔ. Fiɲɛ sumannennin min b’a la ci, o bɛ ka yɔrɔ nɛɛmaya. O n’a ta bɛɛ, wɔɔsiji musɛnnin cilen b’u ɲɛdaw kan. I tulo tɛ fosi la sɔli mankanw kɔ kaba la. Musomannin kelen tɛ yen. Yɔrɔ gɛlɛnba don, wa a farati ka bon kasaarako la. Cɛmanninw bɛ sangaɲɔgɔnmako caman kɛ yen. U b’a bɔ ɲɔgɔn ɲɛ na. ŊUNAN BAARA GƐLƐYA FƐ- Mamadu Keyita, san 16, a kannan kolon don. I b’a dɔn k’a kɔgɔlen bɛ kosɛbɛ farikolo fasaw cogoya fɛ. A ye kabaton dɔ jira a ye min ci ka labɔ dugu jukɔrɔ. A wɔɔsilenba, fo a bɛ ŋunan baara gɛlɛya fɛ. Sɔlikan kelen o kelen kaba kan, o y’a damana sebaaya ye dugukolo kan. Cɛ pasannin dɔ b’ale kɛrɛfɛ. O ye sanba Jabi ye, san 14. O bɛ ka kaba cilenw cɛ ni pelu kɔrɔ dɔ ye, ka kɛ bidɔn kɔrɔ datigɛlen dɔ fana kɔnɔ. A baara kɛcogo fɛ, i b’a dɔn a bɛ baara gɛlɛn na, nisɔn fana ka go. Mamadu bɛ to k’i kan bila a la ni nisɔndiya ye, ko a k’a teliya. A b’o ɲagarilabɔ, nka a bɛ galabu kura ta baara kama. O masurunna na, damandigɛn dɔ bɛ yen, Isa Jalo san 15, o birilen bɛ jiriw kunnan, ka ji ni cɛncɛn don ɲɔgɔn na ni fanga ye. A ɲɛ mɔsɔnnen b’a la ka jeteminɛ kɛ sanuko la. Hali n’a ɲɛ sura fɛnnin yeleyeletɔ kan, a bɛ sin ka nisɔndiyakule kɛ, ko « n ye dɔ sɔrɔ » ; a tɔɲɔgɔnw bɛ girin ka na. A b’o kɔrɔta ka jira jama na i n’a fɔ a ye kupu ta. Mɔgɔ minnu bɛna a lajɛ, o dɔw bɛ keleya a la, dɔw b’a tanu cɛsiri la. U bɛ tulon bila ɲɔgɔn na. O dɔw b’a fɔ ko « e garijɛgɛ diyara ; ne kɔni ma fɛn sɔrɔ fɔlɔ ». Kasɔrɔ tuma dɔw la, a b’o kɛ k’a sɔrɔ a ma fosi sɔrɔ. A bɛ a tɔɲɔgɔnw hawuja ten dɔrɔn, k’u dalakɔrɔbɔ. Damanda fɛn yeleyeleta bɛɛ tɛ sanu ye. Timinandiya baara don ; mɔgɔ tɛ garijɛgɛ bɔfan dɔn. Bɔgɔton dɔ sanfɛ, Bakari Keyita san 18, o cookolen bɛ yen i ko kɔlɔsilikɛla. Ale de y’u bɛɛ la kɔrɔbalen ye, kulu kuntigi don. A sigilen bɛ bidɔn kɔrɔ dɔn. Sɔli kɔrɔnin dɔ b’a bolo, a b’a la k’o da cɛnkɛ fara la. A ka kuma man ca, nka a sɛbɛ dɔnnen don, bɛɛ b’a bonya ka ko to a ta la. Ni mɔgɔ fila kɛlɛla duguma yɔrɔ dɔ nɔfɛ, a bɛ sin ka wuli k’a jɔ, ka girin ka na olu bɔ ɲɔgɔn na. A b’a fɔ u ye, ko « an nana baara de la, an ma na kɛlɛ la ». Kɛlɛ bɛ jɔ yen, tɛmɛn bɛ kɛ ni baara ye. O waati la i tɛ fosi mankan mɛn kabacikanw kɔ. N’i sera yɔrɔ in na, i bɛ tarikuw mɛn. Bɛɛ b’i ta fɔ a ka dɔncogo la. Bakari ta tɛ fila ye. Ale kelen ye cɛman ye a badenw na ; a ni musomannin 7 bɛ ba la. Saba b’olu la minnu ye hakilila banatɔw ye. Bɛɛ jigi dalen b’ale kelen de kan du kɔnɔ ; wajibi la ale bɛ wuli k’a ɲɛɲinin. A ko a n’a tɔɲɔgɔnw ye kalan bila, ka na damanda la yan. U bɛ jɛ ka digɛn senni, don o don, k’u jigi to sanu sɔrɔli kan don dɔ la, hali ni baara in ka gɛlɛn. U kannan finiw nɔgɔlenba bɔgɔ fɛ, samara kɔrɔw b’u senw na, fo wo b’a dɔw taw la. Fugulan kolonninw b’a dɔw yɛrɛ kun na ka tile kunbɛn, dɔw bɛ ka fini melenke u kun na. U bɛ to ka ɲɔgɔn dalakɔrɔbɔ ni baroninw ye, ani ka sangaɲɔgɔnma koninw kɛ. U bɛ to k’a fɔ ɲɔgɔnn ma ko, « jɔnnin de bɛna kaba sɛbɛkɔrɔ ci, ka kuru sɔrɔ bi ? ». U mankan duurulen bɛ, baara bɛ sen na. Sanu kuturu kelen o kelen sɔrɔli ye nafolonin ye u ka denbayaw bolo, ka dumuni sɔrɔ ka juruta bali. Baara dan y’u ta ye ; fo k’u tɛgɛw guwada-guwada k’u kɔw suuli, nka o n’a ta bɛɛ u nisɔn ka di u bɛ keleya ɲɔgɔn na baara la ; sabula u t’a fɛ k’u yɛrɛ to faantanya bolo. U ka ɲininta tɛ dɔwɛrɛ ye sanu kɔ damanda in na ; o de la u sɛbɛ donnen b’a baara kɛtaw fɛ. Dɔkala Yusufu JARA Amara Bɛni Yaya TARAWELE Esɔri sɛbɛnnijɛkulu
Dɔkala Yusufu Jara
Visite du PM du Niger.
Réflexion sur la démocratie.
Transfert de compétence.
Semaine nationale de l'harmonisation des symboles de l'Etat.
Vote de loi de finances 2026.
Rencontre sur l'AES.
