Demokarasi
kiimɛni kɛnɛ sigiko 29nan kɛra araba desanburukalo tile 10 san 2025 Bamakɔ
lajɛkɛsoba Seyisebe (CICB) la. Baaraw daminɛni ɲɛmɔgɔya tun bɛ kiiriko, hadamadenw
ka hakɛw labatoli ni jamana taamasiyɛnw marali minisiri Mamudu Kasoge bolo, jamana
cɛfɔlaba Madamu Sanɔgɔ Aminata Male ani jamana in maaba caman wɛrɛw ɲɛna.
Nin tako
29nan hukumu kɔnɔ (EID) sekeretariya ye laɲininsɛbɛn 452 sɔrɔ, kasɔrɔ san 2024
ta tun ye 554 ye. Jamana cɛfɔlaba ka fɔ la, ɲinan sɛbɛn hakɛ dɔgɔyali sababu dɔ
ye mɔgɔw galabubaliya ye a ko la marayɔrɔ dɔw la. O n’a ta bɛɛ, Madamu Sanɔgɔ
Aminata male y’a jira ko k’u ka kologɛlɛya sera k’a to u bolofara ka se ka
masurunya sigidalamɔgɔw la. O bolofara minnu bɛ sigidaw, Bamakɔ faaba ani
kɔkan jamanaw na, olu de bɛ laɲininsɛbɛnw bisimila k’u lase EID sekeretariya la.
Kolabɛnjɛkulu
dalajɛra ɔkutɔburukalo tɛmɛnnen in na ka laɲininsɛbɛn sɔrɔlenw woloma, k’u sigi
kulu saba ye. Sɛbɛn 24 sugandira u cɛla ka kalan kɛnɛ kan, 340 kunnafoni ka kan
ka dafa, minɛ ma kɛ 72 ma, ka da u mabɛnbaliya kan ni sarati kofɔlenw ye, EID
ye minnu dantigɛ, kolabɛnnaw ka fɔ la.
Jamana cɛfɔlaba
y’a jira ko a ɲuman ye k’a faranfasiya, ko laɲininsɛbɛnw wolomani senfɛ, wasa sɔrɔla 16 kunkanko la k’a
sababu kɛ bolofaraw ka cɛsiri ye. A ye jigisigi di laɲininkɛlaw ma, minnu ka
sɛbɛn tara ka minɛ k’u ma, u kunnafon tɔ ka dafa walasa u ka se ka sɛgɛsɛgɛ
koɲuman minisirisow fɛ u bɛ minnu kunkan. Madamu Sanɔgɔ Aminata Male ko o
sɛgɛsɛgɛli kunnafoni b’u sɔrɔ fana.
Laɲininsɛbɛn
minnu sɔrɔla ɲinan EID hukumu kɔnɔ u bɛ dugukoloko fɔɲɔgɔnkɔw, bilali hakɛw
kɔnɔ ani hadamadenya lakannani kan. Suguw dili, kiiriko ani kalanko fana b’a la.
Madamu Sanɔgɔ
Aminata Male ka fɔ la, laɲininsɛbɛn sɔrɔlenw sɛgɛsɛgɛli ye dugukoloko fɔɲɔgɔnkɔ
cayako jugu jira, kɛrɛnkɛrɛnnenya la laadaladugukolow tigiyakow, nɔnadilanni
yɔrɔ dilenw kunkankow ani mɔgɔ tɔɲɔnenw nɔnadilanni u tɛgɛ kolen ka bɔ u ka
yɔrɔ la k’a sababu kɛ foroba mako dɔ kɛli ye yen.
O siratigɛ
la, kolabɛnjɛkulu y’a ɲinin ka ladamuniw kɛ ani ɲangiliw ka ɲɛsin gɔfɛrɛnaman
tɔgɔla baarakɛlaw walima sigidaw taw ma, minnu tɔgɔ tiɲɛnen don dugukoloko la. Ɲinɛ
ma kɛ mɔgɔ dɔ ka tiɲɛni dɔ nɔ ladilan a ma min kɛ ka sɔrɔ ka wuli a ka hakɛ
nɔfɛ jamana fɛ walima o bolofaraw fɛ. Nin sigiko 29nan in na, jalatigɛlaw
ɲɛmɔgɔya tun bɛ gafesɛbɛnna Kaɲumɛ Zan Bɔsiko Konarɛ bolo.
Dɔkala
Yusufu JARA
Bɛnbabilen DUNBIYA
Dɔkala Yusufu Jara
Visite du PM du Niger.
Transfert de compétence.
Semaine nationale de l'harmonisation des symboles de l'Etat.
Vote de loi de finances 2026.
Rencontre sur l'AES.
Rencontre Primature.
