Kandiliw kɛra jamana ka san 2026 baarakɛnafolo ŋaniya sirilen fan filanan kan kunun. Furancɛlafanga bulonba kɔnseye minnu tun b’a kɛnɛ kan, a bɛɛ jɛnna n’a ye. Nafoloko ni wariko minisiri Aluseni Sanu de tun bɛ ka sariyasɛbɛn in kɔkɔrɔmadon
Mali
furancɛlafanga bulonba kɔnseyew tun dalajɛlen bɛ Bamakɔ lajɛkɛsoba Seyisebe
(CICB) la kunun ntɛnɛn desanburukalo tile 8 san 2025 jamana ka san 2026
baarakɛnafolo ɲaniya sirilen fan filanan kunnan. U bɛɛ jɛnna ni baarabolodalen
in ye ka ɲɛsin foroba politikiw ma. Baaraw ɲɛmɔgɔya tun bɛ Bulonba kuntigi
Zenerali de kɔri darimɛ Maliki Jawu bolo.
A jirala ko
Mali ka san 2026 baarakɛnafolo ŋaniya sirilen in na, jigi dalen bɛ sefawari
miliyari 3.057,79 sɔrɔli kan, kasɔrɔ jigi tun bɛ miliyari 2.739,69 sɔrɔli kan
san 2025 ta la, o ye miliyari 318,09 faralen y’o hakɛ kan. Musakaw bɛ se
sefawari miliyari 3.057,79 ma san 2026 in na, kasɔrɔ o tun ye miliyari 3.578,68
ye san 2025, o b’a jira ko Mali ka san 2026 baarakɛnafolo ɲaniya sirilen in bɛ
dɛsɛ ni sefawari miliyari 520,42 ye.
Jɛn kɛlen ni
san 2026 in baarakɛnafolo ŋaniya sirilen fan filanan ye, o b’a jira ko bulonba kɔnseyew
ye sira di minisirisow, cakɛda kɛrɛnkɛrɛnnenw ani bolofara minnu sirilen b’u
la, olu ka porogaramuw waleyali ma. O la, porogaramu duuru minnu bɛ lafasa ni
sɔrɔdasi kɔrɔw ka minisiriso lahɔrɔma kɔnɔ, o musaka mumɛ ye sefawari miliyari 531,207
ye. Kɔnseye 125 minnu tun b’o kandili kɛnɛ kan, o bɛɛ jɛnna n’o ye.
O
porogaramuw bɛ tali kɛ marako, kɛlɛw, lakananbaaw kɔlɔsili, kalan ani kunnafoni
tɔpɔtɔli la. Fɛn min ye basigi ni siwiliw lakananni minisiriso ka porogaramuw
ye, kɔnseye minnu tun b’o kandili kɛnɛ kan o bɛɛ fana jɛnna n’o ye. A musaka
mumɛ ye sefawari miliyari 192,541 ye. A bɛ tali kɛ marako, foroba basigi ni
basigiko, gɛlɛyaw ni kasaaraw faratiw kunbɛnni ani magɛnniw labɛnni.
Juru sarataw
ma kofɔ i n’a fɔ o tun dantigɛlen bɛ san 2025 ta kɔnɔ cogo min na ; nka o
musaka kelen in sefawari miliyari 8,903 kofɔlen don baarakɛnafolo kura in kɔnɔ.
Nka fɛn min ye juru sarata kɛrɛnkɛrɛnnenw ye faso wagande la, o ye sefawari
miliyari 114,05 ye, kasɔrɔ o tun ye miliyari 113,73 ye san 2025 baarakɛnafolo
latilennen kɔnɔ, yɛlɛn kɛra o ni sancɛ dɔɔnin ni sefawari miliyɔn 321 ye.
Porogaramu 134
ninnu mumɛ na, dɔ bɔra 22 de musakaw la, dɔ farala 98 musakaw kan, yɛlɛma ma
don 14 ta la. A bɛ kɔlɔsi ko baarakɛnafolo porogaramu kɔnɔntɔn, dɔ bɔra
olu musaka bakuruba la ni 10% ye san 2026 in na. N’o ye, kɛrɛnkɛrɛnnenya la
nafoloko ni wariko minisiriso ka marako, -27,44% bɔra o la, jamana jɔli kura
minisiriso ka marako porogaramu -13,71% bɔra o la. Nka a porogaramu tɔ 17, dɔ
farala olu musakaw kan ka caya ni 50% ye. Olu la, an bɛ se ka ninnu kofɔ : Kɔkanmalidenw
ni Afiriki donɲɔgɔnna minisiriso ka kɔkanmalidenw tɔpɔtɔli porogaramu la,
67,51% farala o kan.
Furancɛlafanga
bulonba ye juru sarata minnu kofɔ san 2026 baarakɛnafolo ŋaniya sirilen kɔnɔ, o
ye sefawari miliyari 13,630 ye, kasɔrɔ o tun ye miliyari 11,451 ye san 2025
baarakɛnafolo kɔnɔ, o ye sefawari miliyari 2,17 faralen y’o kan. Fɛn min ye
jamanakuntigiso ye, sefawari miliyari 17,407 juru sarali kofɔlen bɛ yen, kasɔrɔ
o tun ye miliyari 15,672 ye san 2025 baarakɛnafolo la, o ye sefawari miliyari
1,734 faralen y’o kan.
Nafoloko ni
wariki minisiri Aliseni Sanu de tun b’a la ka sariyasɛbɛn in kɔkɔrɔmadon. A ka
fɔ la, nin baarakɛnafolo in bɛ sin an ka jamana ka yɛrɛya an’a sɔrɔ yiriwali ma.
A ko basigi, kɛnɛyako ani kalanko minisirisow jɔyɔrɔ ka bon kosɔbɛ san 2026
baarakɛnafolo ŋaniya sirilen in na. Aluseni Sanu y’a faranfasiya, ko nin
baarakɛnafolo in bɛ jɔyɔrɔba di yɛlɛma kuraw ma.
A ko
Malidenw ye fɛn o fɛn dantigɛ sigikafɔbaw, jamana jɔli sigikafɔbaw, Malidenw
yɛrɛ dama cɛ sigikafɔbaw senfɛ olu bɛna waleya. A ye layidu ta fana, ko nin
baarakɛnafolo in bɛna waleya jɛlenya kɔnɔ min b’a to jigi dalen bɛ jaabi ɲuman minnu
kan, olu ka se ka sɔrɔ. Ni nin kandili in ye jamana ka san 2026 baarakɛnafolo
ŋaniya sirilen in fan filanan kan, minisiri Sanu ka kɔrɔfɔkuncɛ la, a y’a jira
ko furancɛlafanga bulonba ye baarakɛminɛn don gɔfɛrɛnaman bolo, min b’a to a ka
se k’an ka jamana basigili an’a yiriwali laɲininw sabati san nata in kɔnɔ.
Dɔkala Yusufu
JARA
Bɛnbabilen
DUNBIYA
Dɔkala Yusufu Jara
Visite du PM du Niger.
Réflexion sur la démocratie.
Transfert de compétence.
Semaine nationale de l'harmonisation des symboles de l'Etat.
Rencontre sur l'AES.
Rencontre Primature.
