Joliba sera k’a to Mali ntolantan ka dan sigi san 27 sesɔrɔbaliya la
Tariku. Karidon
sɛtanburukalo
tile 22 san 2024 na mɛɛn
Mali ntolantan senkɔrɔmadonbaaw kɔnɔ, kɛrɛnkɛrɛnnenya la, Joliba AC kanubaaw. Ka
da mun kan ? San 27 wulikajɔw
kɔfɛ fɛn kelen min nɔfɛ ni wasa tun
t’a la ka sɔrɔ o la, Mali ntolantantɔn dɔ sera ka sebaaya sɔrɔ o ko la, ka dan
sigi o sesɔrɔbaliya la, ka don Afiriki Ligiw ka ŋanaɲinin kɔnɔ.
N'o ye Joliba ko ye. O min ye sebaaya sɔrɔ 1-0 so yan ɲɛbila ntolantanw tako laban taali la,
ka segin ka taa a kɔmaseginni
kɛ ka sebaaya sɔrɔ tuguni n’o 1-0 ye karidon, Togo
Kara « ASKO » kan o ka farikoloɲɛnajɛkɛnɛ na. Joliba ka bi ninnu bɛɛ donna mɔgɔ kelen fɛ ; n’o ye Zumana sɛnpara ye.
Ni nin
sebaaya in ye, Joliba y’a tɔgɔ don Mali ntolantan tariku kɔnɔ, ka dan sigi
san caman sesɔrɔbaliya la, kabini Afiriki Ligiw ka ŋanaɲinin kupuko sigira
senkan san 1997. O ni
bi cɛ, Joliba,
Sitadimaliyɛn ani Ereyali
tun b’a ɲɛbila
ntolantanw kɛ ; nka
wasa tun ma se ka sɔrɔ a ko la fɔlɔ.
Afiriki
Ligiw ka kupu ɲɛbila
ntolantanw tako fɔlɔ la, Joliba ni Kara
« ASKO » fila bɛɛ
ye a da to Santarafiriki « Red star » la. O ntolantanw taali kɛra Kameruni, Duwala farikoloɲɛnajɛkɛnɛ na ; sabula Togo ta si tɛ « Caf » ka saratiw dafa
ntolantanko la. Joliba ni « Red Star tun ye filaninbin k’o la 0-0, ka sɔrɔ ka sebaaya sɔrɔ a kɔmaseginni na k’a sɔrɔ hali a ma ntolantan kɛ ; sabula « Red Star » ye
walan sɛmɛn a ko tɔw la.
Bɔko saba kɔnɔ, Joliba ye bi fila don, fɛn ma don a la. Foli ni tanuni bɛ kɛ a ka degelikaramɔgɔ Dɛnba Mamadu Tarawele n’a ka cɛdenw ye. Siga t’a la, u bɛna kunbɛn ni wasa ye Joliba kanubaaw fɛ Karunga Keyita tɔgɔla farikoloɲɛnajɛkɛnɛ kan Bamakɔ.
Lɛrɛ 48 yanni Joliba ka sesɔrɔ in cɛ tariku kɔnɔ, Sitadimaliyɛn fɔlɔ de ye sebaaya sɔrɔ kɔnfederasɔn kupu ɲɛbila ntolantanw na. Ale ye Liberiya
« Paynesville FC » gosi 3-1. Kasɔrɔ a taali la, Liberiya tun y’a gosi
1-0. Sitadimaliyɛn
delila ka nin kupu in ta san 2009. Kɔmaseginni na Bamakɔ yan, Sitadimaliyɛn ye Liberiya « Paynesville
FC » gosi 3-1.
Kabini ntolantan sanga 90 fɔlɔ kɔnɔ, degelikaramɔgɔ Mamutu Kanɛ n’a bɛ wele Murule, an’a ka cɛdenw tun ye ko ban ni 3-0 kɛli ye, hali ni Liberiya ye malo bɔ a yɛrɛ la ni bi kelen donni ye sanga 90
laban kɔnɔ. Mali ka ntolantantɔn fila bɛna Afiriki ntolantantɔnw ka janjoba fila kɛ ɲinan. Wa an jigi b’a kan, ko Joliba
ni Sitadimaliyɛn
bɛ taa yɔrɔ jan na u ka kupuw ɲɔgɔndanw na, walasa k’u tɔgɔw don tariku kɔnɔ. O la, an b’a fɔ ko, nin Fiɲɛ bɔra minni ? Fiɲɛ Duman !
Dɔkala Yusufu JARA
Soulemane Bobo Tounkara