Ligi 1 Oranzi san 2024-2025 kuncɛra kunun n’a tile 26nan balontanw ye. Sitadimaliyɛn kɛra tɔn ŋana ye kabini a tile 24nan balontanw na, tile fila ka kɔn a laban ɲɛ. Sitadimaliyɛn ni « ASKO » ye filaninbin kɛ (1-1) Mamadu Konate tɔgɔ la farikoloɲɛnajɛkɛnɛ na. Sitadimaliyɛn ka bi donbaa kɛra cɛmancɛmɔgɔ Lasinɛ Kuma ye sanga 39nan na, ASKO ta kɛra Amadu Kɔnɛ ye sanga 86nan na. Sotuba jɛmanw ye janjo kuncɛ ni kuru 68 ye Joliba ɲɛkɔrɔ kuru 54, ka Usfas da o kan kuru 44. Nin kɛra Sitadimaliyɛn siɲɛ 21 ye ka kɛ Mali tɔn ŋana ye.
A don balontan kuncɛlen
ni Korofinna tɔn ye, Mali ŋana kuraw ka jonjon donna u bolo Femafuti
ɲɛmɔgɔ-dankan fɔlɔ Musa Siliwɛn Jakite fɛ. Ŋanaŋinin kolabɛnkulu ɲɛmɔgɔ
Zenerali de birigadi Berehima Jabate tun b’a kɛrɛfɛ ka fara Oranzi ka
kunnafoniko ni senkɔrɔmadonni ɲɛmɔgɔ muso Afiriki ni Muwayɛn-Oriyan tɔgɔ la
Miriyɛki Sise kan. Sitadimaliyɛn senkɔrɔmadonbaa caman tun bɛ kɛnɛ kan ka
ɲɛnajɛ in kɛ. U tun bɛ k’a sɛbɛn banderiw kan ko : «Sitadimaliyɛn ye Mali ka
san 2024-2025 ŋana ye».
A kɔlɔsira k’o
senkɔrɔmadonbaa bɛɛ tun kɛlen bɛ ka Sitadimaliyɛn ka fini don. U mɛɛnna
dɔnkilidaw ni dɔnkɛw la sanni jonjon ka di, o ditɔ an’o dili kɔfɛ. Usumani
Jakite n’a bɛ wele Maraka ni Sitadimaliyɛn tɔn ɲɛmɔgɔ don, o y’a jira ko kow
daminɛ tun gɛlɛyara u bolo kosɛbɛ ; nka ko taalen ɲɛfɛ kow ɲɛ sɔrɔla. A ye
foli di fɛɛrɛtigiw ma ŋanaya in sɔrɔli la. A k’a ma ɲinɛ senkɔrɔmadonbaaw ka
foli kɔ, olu minnu bɛ wulikajɔ la su ni tile tɔn in kɔkɔrɔ.
Sitadimaliyɛn
balontannaw ɲɛmɔgɔ kɔfɛmɔgɔ Mamadu Dunbiya ko nin ŋanayajɔyɔrɔ in ye san baara
tɔnɔ ye. Wa ko jonjon in ye senkɔrɔmadonbaaw ani tɔn ɲɛmɔgɔw ta ye. A ko
ŋanɲinin daminɛ na u tun ma sigi n’a ye cogo si la k’u bɛna laban kotigiya la.
Nin jonjon ka fara kupudimali kan, o ye belebele ye ale bolo. A k’u bɛna tɛmɛn
ni baara ye tile damadɔ sɛgɛnnafiɲɛbɔ kɔfɛ ka Afiriki jamanaw ka ŋanaw ka ligi
balontanw labɛn.
Femafuti ɲɛmɔgɔ-dankan fɔlɔ ye foli kɛ balontan tɔn bɛɛ la u sendonni kosɔn nin ɲɔgɔndanba in na ; ka sɔrɔ ka Sitadimaliyɛn tanu kosɛbɛ ŋanaya sɔrɔli la. A ko baton sera dankan na koɲuman, wa k’u ye walanda caman sɔrɔ a kɔnɔ. Fili minnu kɛra u bɛna latilencogo ɲinin olu la. A ye foli di jamama kɛnɛ inlasɔrɔli la kabni ŋanaɲinin tile fɔlɔ fo a tile laban.
Musa Siliwɛn Jakite k’u jigi b’a kan k’u ni senkɔrɔmadonbaaw bɛna ɲɔgɔn sɔrɔ
kokura san 2025-2026 ta la, jonjon donnen kɔ Sitadimaliyɛn balontannaw ɲɛmɔgɔ
Mamadu Dunbiya bolo. Oranzi Afiriki ni Muwayɛn Oriyan ɲɛmɔgɔ muso Miriyɛki
Sise ye foli di san 2024-2025 baara kɛcogo ɲuman na, ka sɔrɔ k’a lase, ko u ni
Femafuti ka jɛkabaara bɛ kɛ ɲɛtaa ye.
A ko balontan y’u
sinsinbɔlɔba dɔ ye, ka da a kan balontan de bɛ malidenw sɔgɔ ɲɔgɔn na ani k’u
ni Oranzi jamana tɔ bɛɛ sɔgɔ ɲɔgɔn na. A k’u wasara ni Mali tɔnw senkɔrɔmadonni
ye. A ye foli di ŋana Bamakɔ Sitadimaliyɛn ma, ka sɔrɔ ka k’an bɛn da tɔn tɔw
ye san nata kama. Sitadimaliyɛn degelikaramɔgɔ Mamutu Kanɛ ye foli di a ka
balontannaw ma u ka baara ɲuman na san in kɔnɔ ani ka foli di fɛɛrɛkulu
dɛmɛnbaa bɛɛ ma.
A y’a jira ko ale kɛra degelikaramɔgɔ kunnandi ye, wa ko a wasara. A ka foli bɛ bɛɛ ye ; sabula ko jaabi sɔrɔlen in tɛ mɔgɔ kelen ka ko ye, ko ɲɛmɔgɔkulu ni kɔmɔgɔ bɛɛ jɛ don. A ye foli di senkɔrɔmadonbaaw ma, olu minnu ka wulikajɔ ma kɔtigɛ tɔn in na kabini ŋanaɲinin daminɛ fo ka se a kuncɛli ma. Murule ko a ka foli bɛ jama ye.
Mali ka sani 2024-2025 ŋana ye sefawari miliyɔn 30 waritasɛbɛn sɔrɔ ; Joliba ta kɛra miliyɔn 15 ye a ka jɔyɔrɔ 2nan kosɔn, Usfaw ta kɛra miliyɔn 10 ye a ka jɔyɔrɔ 3nan kosɔn.
Dɔkala Yusufu JARA
Djeneba BAGAYOGO
Kabini ntɛnɛn tɛmɛnnen in, Mali Sɛgɛ musow ye farifoniw daminɛ Mamadu Konate tɔgɔla farikoloɲɛnajɛkɛnɛ na u ka degelikaramɔgɔ Mohamɛdi Salumu lahɔrɔma kɔnɔ. O ye jigisigi kɛ, ko baaraw taacogo ka ɲi kosɛbɛ.
-.
U gosira 2-0 Sɛnɛgali fɛ u bɔko fɔlɔ la. O siratigɛ la, Mali ka ko b’a yɛrɛ bolo kari nata in sɛtanburukalo tile 22. A ni Ganbi de bɛna ɲɔgɔn sɔrɔ nɛgɛ kanɲɛ 16 waati la, Mɔrɔbiya Antuwanɛti Tubuman tɔgɔla farikoloɲɛnajɛkɛnɛ na. Ka sɔrɔ kow bɛ sɔn ka nɔgɔya dege.
Afiriki ntolantantɔnw ka ɲɔgɔndanw taali tako filanan daminɛna jumadon. Mali ka cɛbɔ fila, n’o ye Joliba min bɛ ntolantantɔnw ka ŋanaɲinin na ani Sitadimaliyɛn min bɛ kɔnfederasɔn kupu la, u y’u ka balontanw kɛ sibiri tɛmɛnnen in sɛtanburukalo tile 14 san 2024.
O furu suguya in, ni dɔw b’a wele « yɛrɛfuru », a bɛ kɛ tuma caman na, nka a caman fana tɛ mɛɛn si la. Sababuw : bɛnbaliya duw cɛ, furuɲɔgɔn dɔnbaliya a ɲɛma ani kɛlɛ misɛnninw. Furuɲɔgɔn dɔw bɛ bala ko kolonw na ɲɔgɔn na ; i n’a fɔ bana dogolenw, walima jogo kolon.
Ntolantanna 27 welelenw na degelikaramɔgɔ nɔnabila Badara Alu Jalo fɛ, seegin de ma ye. Olu ma se ka ma ka da kun dɔw kan. I n’a fɔ ntolantannaw ɲɛmɔgɔ Hamari Tarawele, Amadu Hayidara n’a bɛ wele Dudu, Nene Dɔrizelɛsi, Masajo Hayidara.
