Minisiriɲɛmɔgɔ
fila ninnu y’u bolo don piyoniyew ka palɛ lasɔrɔsira dali dali baara la
Mali
fasodenya lakanankulu ka baaraw tako 2nan daminɛna arabadon CICB la. O hukumu kɔnɔ,
baaralajɛ dɔ kɛra Burukina Faso minisiriɲɛmɔgɔ Rimutaliba Zan-Emanuyɛli
Wedarawogo ni Mali minisiriɲɛmɔgɔ Zenerali de diwisɔn Abudulayi Mayiga cɛ kunun
minisiriɲɛmɔgɔso la. Mali gɔfɛrɛnaman minisiriw ka fara Burukina Faso taw kan,
olu tun b’a kɛnɛ kan. A kɛra waati ye fan fila bolo ka kuma jamana fila in cɛ jɛkabaara
cogoyaw kan, ani fana, ka hakilila falen kɛ an ka marayɔrɔ ani diɲɛ kow kan.
Mali
gɔfɛrɛnaman ɲɛmɔgɔ ye lajɛ in kɔnɔko dantigɛ, k’a jira ko nin lajɛ in jamana
fila in cɛ, o ye seeere ye teriya ni jɛkabaara siraw la ; ko tariku,
dugukolo, an’an foroba danbew de b’an kala ɲɔgɔn na. An ka zewopolitiki kɛnɛ
nafana ni saheli kungo jamanaw ka kɔnfederasɔn sigili ye senkan. O min, san
kelen kɔnɔ dɔrɔn, a ye jɔyɔrɔba sɔrɔ n’a ka baara kɛta kɛrɛnkɛrɛnnenw ye, ka
bɛn, basigi, kojugubakɛ kɛlɛli ani sɔrɔ ni hadamadenya yiriwali disidako caman
latɛmɛn, Zenerali de diwisɔn Abudulayi Mayiga ka fɔ la. O kɛra waleya ye, min
bɛ dɛmɛn don bɛn ani jɛkabaara la an ka marayɔrɔ AES, Afiriki tilebinyanfan ani
diɲɛ na.
Burukina Faso
minisiriɲɛmɔgɔ y’a jira ko nin lajɛ in sera k’a to tiɲɛ yɛrɛ la, ka kow cogoya
dɔn. Rimutaliba Zan-Emanuyɛli Wedarawogo ko a b’a sinsin nin kɛnɛ in kan, ka
hakilila falen kɛ foroba masalakunw kan. A y’a jira ko a ka gɛlɛn ka jamana
fila in cɛ ko fɔ ; ka da a kan an bɛ kɔnfederasɔn kɛnɛ min kɔnɔ, an jamana
saba de bɛ k’an kandi foroba dakan kelen kama.
A sɔrɔla k’a
jira ko nin ye kɛnɛ ye, masalakunw bɛ dakun min na, ka dɔ fɔ o la baara kɛtaw
waleyali hukumu kɔnɔ, minnu bɛ jamanakuntigi saba ninnu ka yecogo
sɛmɛntiya ; Burukina faso jamanakuntigi Kapitɛni Ibarahimu Tarawele, Mali
jamanakuntigi Zenerali darimɛ Asimi Goyita ani Nizɛri jamanakuntigi Zenerali
darimɛ Abudurahamani Tiyani. A ko an wasalen don ni jaabi sɔrɔlenw ye, ka da a
kan an b’a dɔn ko o ye fangaw kafoli nafa ye juguya tile in na, Burukina faso
minisiriɲɛmɔgɔ ka fɔ la, ani a tɛ ɲɛ ni an ma an sekow an’an fangaw fara ɲɔgɔn
kan.
A ye
jigisigi kɛ, ko cidenkulu fila in bɛna bɔ ni nafa ye lajɛ in na, min bɛna dɔ
fara u ka kandili fanga kan, saheli fasojama bɛ kannabila, danbe ani
kɛrɛnkɛrɛnnenya la ɲɛtaa sɔrɔ cogo min na.
TUFADEN FƆLƆ DALI- Baaralajɛ kɔfɛ, fasodenya lakanankulu
ka baaraw hukumu kɔnɔ, minisiriɲɛmɔgɔ fila in taara u ɲɛ da piyoniyew ka palɛ
kan Maɲanbugu, Bamakɔ faaba komini 6nan na ani ka o lasɔrɔsira dali dali
tufaden fɔlɔ da.
O
dalidabaara in tufaden fɔlɔ dalen kɔ, Burukina Faso minisiriɲɛmɔgɔ y’a jira
kunnafonidilaw la, ko a ye nisɔndiya ani wasa sɔrɔ a minisiriɲɛmɔgɔ ɲɔgɔn Zenerali
de diwisɔn Abudulayi Mayiga fɛ. a nanen taama in na. A ko a bɛna kɛ seere ye
nin hakilila ɲuman in na. Rimutaliba Zan-Emanuyɛli Wedarawogo ko fana,
fasodenya lakanankulu kɔfɛ, a y’a dɔn ko wulikajɔkulu don. A ka fɔ la, fasodenw
don, minnu ye hakili ɲuman sɔrɔ k’a dɔn k’u ka wulikajɔ bɛ se ka fura sɔrɔ
gɛlɛyaw la.
A ko an ɲɛ
bɛ sira dɔ la, min labɛnna sigidalamɔgɔw yɛrɛ fɛ, o ye wulikajɔ ye, tɛmɛn bɛ kɛ
ni min ye walasa ka se ka ɲɛda kura di sira in ma, dunanba in ka kɔlɔsili la. Ale
bolo, jaabi ɲuman sɔrɔlenw kɔfɛ siraw labɛnni na, kalanw b’a kɔnɔ minnu ni foli
ka kan. A ko wajibi don an ka hakili ɲuman sɔrɔ ; Mali, Burukina Faso ani
Nizɛri fasoden bɛɛ. A ka fɔ la, k’an sigi ka makɔnɔni kɛ, o tuma tɛmɛnna. Burukina Faso
minisiriɲɛmɔgɔ y’a jira ko an yɛrɛ de ka kan ka an wasa don an yɛrɛ la, ka
furaw ɲinin an ka gɛlɛyaw la.
Rimutaliba Zan-Emanuyɛli Wedarawogo y’a jira ko denmisɛnya ye wuli ka jɔ ye. A ko n’an farala ɲɔgɔn kan, an bɛ furaw sɔrɔ gɛlɛyaw la. Ko nafa bɛ an kelenna na n’an ka kɛta ye, ani n’an seko ye an ka dɔnniya la, walasa an ka se k’an sigidaw, an ka kinw an’an ka siraw bayɛlɛma. Burukina faso minisiriɲɛmɔgɔ b’o ɲinin an bɛɛ fɛ. A ye wele bila faraɲɔgɔnkan ma walasa Mali ye dusu min ta, o hakilila in bɛ se ka walangata cogo min na ka AES kɛnɛ labɔ.
Dɔkala Yusufu Jara
Sama mana kɛ kungo dankelen ye cogo o cogo, a tɛ bonya a jugu ma. Kɔnɔwari Samaw tɛna se ka nin kuma in nkalontigiya, walanda dilen kɔ u ma kunun Mali Sɛgɛw fɛ cɛw ka Angola san 2025 Aforobasikɛti karidefinali la..
Diɲɛ teriyantolantan janjo min labɛnna Ɛndonezi fɛ, a kuncɛra ntɛnɛn tɛnɛnnen in na. Mali Sɛgɛninw ye a ŋanaya sɔrɔ jamana 3 ɲɛkɔrɔ..
Baaraw daminɛna kunun minisiriɲɛmɔgɔ Zenerali de diwisɔn Abudulayi Mayiga fɛ, Burukina faso minisiriɲɛmɔgɔ Rimutaliba Zan-Emanuyɛli Wedarawogo ɲɛna. Minisiriɲɛmɔgɔ ye ɲɛfɔli kɛ, ko nin jɛkulu in sigili senkan o ye jaabi dɔ ye, ka wulikajɔkulu dɔ bila an ka jamana ka bolo ka.
Rintaliba Zan Emanuyɛli Wedarawogo ka teriyataama in senfɛ, a bɛna taa a ɲɛ da yɔrɔ dɔw kan, ka ye Mali fasodenɲumanya lakananso ka baaraw tako 2nan daminɛni kɛnɛ kan. Dunanba in ni gɔfɛrɛnaman bɛna baara kɛ. Furancɛlafanga jamanakuntigi Zenerali darimɛ Asimi Goyita fana b’a bis.
Laelisɛbɛn dɔ kɔnɔ min bolonɔbilala tarata utikalo tile 19 san 2025, jamana ka hakɛw lafasabaa (korokirɛri zenerali) kiiritigɛso sanfɛdan na Mamudu Tinbo y’a jira, ko sɛgɛsɛgɛli kiiriso ye kiiri kunnafoni dɔ dayɛlɛ ka kɛɲɛ ni kumakan juguw ye, minnu bɛ se ka jate « namara, fo.
An bɛ don min na baarakɛla 122.166 de bugunnatigɛra mɔgɔ mumɛ kofɔlen 158.317 la, o ka surun jama kofɔlen in 80% na.
