Mali lakananbaaw ɲɛmɔgɔso kuntigi Zenerali de diwizɔn Umaru Jara, ye laseli kɛ kunnafonidilaw la
Kojugubakɛlaw ye ŋaniyajuguyawalew
ta ka Bamakɔ sɛgɛrɛ tarata sɔgɔma joona sɛtanburukalo
tile 17 san 2024. U binna zandarama kalanyɔrɔ kan Falajɛ ani pankurunjiginkɛnɛ sɔrɔdasiw
dagayɔrɔ ni kɛlɛkɛmarifa juguw ye, Bamakɔ komini 6nan na. A kɛra kɛlɛ bulen
ye kojugubakɛla ninnu ni Mali lakananbaaw
cɛ tile
waati dɔ kɔnɔ. Nka ko tora Mali
lakananbaaw ta la.
D.K ye Senuka ye. A ka fɔ la, nɛgɛ kanɲɛ 5
waati la, ale ye marifa cikanw mɛn
pankurunjiginkɛnɛ fan fɛ. Mɔgɔw tora
u ka sow kɔnɔ. O kɔfɛ, ale bɔra ka
dugukɔnɔna sira
ta ; o y’a sɔrɔ kɛlɛ tɔ bɛ sen na. Yɔrɔ bɛɛ tun
daminɛnen don Mali lakananbaaw fɛ, u tɔw tun b’a la ka na
dɛmɛn don u la. Bolifɛnkow ni taamakow minisiri Madamu Danbɛlɛ Madina
Sisɔkɔ ye
laseli kɛ binni na zandarama kalanyɔrɔ kan
Falajɛ, pankurunjiginkɛnɛ sira
tun datugura siwiliw ɲɛ ka sanganin kɛ faratiw kunbɛnni kama. O kɔfɛ u ye laseli kɛ ko
sira in labilala.
Mali lakananbaaw ka kɔnkoma sera k’a to u ka se ka kow tigiya ta. Kojugubakɛlaw ye dogo ka donni min kɛ Bamakɔ nin
cogo la, a kɛra sababu ye ka Bamakɔ bajoliba kininbolo sira caman fɛtaama gɛlɛya waati dɔ kɔnɔ. Mali
lakananbaaw ɲɛmɔgɔso
kuntigi ye laseli kɛ k’a jira ko yɔrɔw
larawulili bɛ sen na, dugumɔgɔw k’u
hakili sigi.
Nɛgɛ kanɲɛ 11 y’a sɔrɔ halibi mugukanw bɛ yɔrɔw la, kojugubakɛlaw
binna minnu kan. Falajɛ « Turudefiriki » yɔrɔ la,
lakananbaaw tun ye sira tigɛ mɔgɔ suguya
wɛrɛw kana
se ka zandarama kalanyɔrɔ lasɔrɔ. Nka jama tun jɔlen b’o masurunna na ɲɛnabana na. O dɔw yɛrɛ tun
faralen bɛ polisiw kan ka sira tɛmɛnni ɲɛnabɔ mɔgɔw ye. Mɔgɔw
dabali bannen tun b’a la ka kojugubakɛla dɔ su lajɛ.
Seerew y’a jira ko a fagara a kolitɔ bin kɛlen zandarama kalanyɔrɔ kan. Isa
Kulubali y’o seere dɔ ye. Takisibolila don.
Ale ko mugu jugu bɛ don cɛsirilan minnu na k’o pɛrɛn jama
cɛla, o tun b’a cɛla, wa ko kisɛkunbɛnfini fana tun b’a kanna. Mɔbili minnu bɛ banabaatɔw doni, olu tun bɛ kaa ka segin na. A bɛ se ka kɛ u tun b’a
la ka mɔgɔ joginnenw doni. U tɛmɛn o tɛmɛn,
lakananbaa fara filɛlikɛla gansan kan, bɛɛ tun bɛ tanu
lase lakananbaaw ma, ka Kolonɛli Asimi
Goyita fo k’a waleɲumandɔn. Nin bɛ
fasokanu taamasiyɛn jamanadenw fɛ lakananbaaw senkɔrɔmadonni
siratigɛ la. Lakananbaaw sera ka kojugubakɛlaw mantɔɔrɔ ɲɔnin ka bɔ an kan, k’u
daga bɔ an dala.
Tilesenkuncɛ waati la, Mali lakananbaaw ɲɛmɔgɔso kuntigi zenerali dediwizɔn Umaru Jara n’a nɔfɛjama
taara u ɲɛ da zandarama kalanyɔrɔ kan. U
tun kɛlen bɛ ka
kojugubakɛla ninnu caman minɛ. Minnu tora sisi la, olu suw tun sɛɛnɛnen bɛ ɲɔgɔn kɛrɛfɛ. Mali
lakananbaa dɔw fana ni tora a la, ka
yɔrɔ caman
fana tiɲɛ.
A ye laseli kɛ kunnafonidilaw la, k’a jira ko, kotigiya bɛ lakananbaaw bolo. O siratigɛ la, a y’a ɲinin
dugumɔgɔw fɛ, u ka taa u ka baaraw la. A ko kojugubakɛla minnu tun y’u ɲagami mɔgɔw cɛla, a
caman fagara, larawulili tɔ bɛ sen na, wa k’u dɛmɛnbaaw
b’a la ka ɲinin. Zenerali dediwizɔn Umaru Jara y’a ɲinin bɛɛ fɛ, n’i ye kunnafoni sɔrɔ
sigalamɔgɔ kan, i ka kofɔli kɛ. Kojugubakɛla minnu minɛna,
olu ka koɲɛ bɛ don zandaramaw bolo sɛgɛsɛgɛliw kama.
Nka, a y’a gɛlɛya mɔgɔw ma, u
k’u janto, u kana baga mɔgɔ ma u ka kofɔli baaraw
kɔnɔ. A ko kojugubakɛla ninnu ŋaniya
de tun ye k’an kɔ don ɲɔgɔn na. An
tɛna a to u k’o ɲɛsɔrɔ abada.
Bin kɛlen min filɛ Bamakɔ kan,
zenerali ka fɔ la, o b’an hakili jigin binkanni caman na, minnu tara ka Bamakɔ
n’a lamini sɛgɛrɛ ka tɛmɛn. U
binna lotoli « Terasi » kan san 2015 marisikalo tile 7 miniwi tɛmɛnnen kɔfɛ, dunanw
taayɔrɔba y’o
baari in ye. O kɛra kojugubakɛlaw binko fɔlɔ ye dunanw kan Bamakɔ kɔnɔ. Mɔgɔ caman ni tora o la. O kɔfɛ
nowanburukalo tile 20 san 2015, u binna Bamakɔ lotoli « Blu Radison » kan. O kɛra muguko dan ye, ka mɔgɔ caman
jaso ka to u bolo.
Mɔgɔ de 22
ni tora dan karili la « Blu Radison » na. Kojugubakɛkulu min bɛ wele
« Al-Murabituni », o ye laseli kɛ k’a jira k’ale de ka baara y’o ye. An ma ɲinɛ dan
karili kɔ Kangaba lakananbaaw
dagayɔrɔ la, Bamakɔ masurunya na zuwɛnkalo tile 18 san 2017, mɔgɔ caman
fana ni tora o la k’a sɔrɔ u m’a min, u m’a bɔn. San 2022 zuluyekalo fana na, kojugubakɛlaw binna Kati sɔrɔsiw
dagayɔrɔ
kan ; o ni Bamakɔ cɛ janyanenba ye km15 ye. Mɔgɔ seegin
ni tora o la. Mali lakananbaaw sera ka nin binkanni bɛɛ masiba dɔgɔya.
Dɔkala
Yusufu JARA
Sidi WAGUE
« DEF » ka kan ka kuncɛ bi. Don fɔlɔ kɛlen kɔ basigiba kɔnɔ, ŋunuŋunu cayara dugu kɔnɔ ntɛnɛn su k’a dugu jɛ tarata la ; ka da a kan matematiki kiimɛnisen tun kɔnna ka sidɔn kiimɛnikɛyɔrɔ ɲɛmɔgɔw ka fɔ la..
Ɲinan, kalanden hakɛ min b’a la ka kalanso 9nan kuncɛli kiimɛniw kɛ, o ye mɔgɔ 350.409 ye ; musomannin y’o la 173.767 ye. U tilalen don kiimɛnikɛyɔrɔ 1.842 cɛ. Maliden minnu bɛ yɛrɛkunkalifayɔrɔ la Basikunu (Moritani), kalanden 233 b’a la ka kiimɛ yen.
San 2024-2025 kalanta bolodalen don ka bila tarata ɔkutɔburukalo tile 1lɔ kan. Walasa ka bisigiyaw kɔlamunun, sabula ŋununŋunun na, a bɛ ka fɔ ko don fɔlɔ bɛ sɔn ka bɔ a dɔgɔ kɔrɔ. O siratigɛ la, kalanko minisiri ye laseli kɛ sɛtanburukalo tile 24 tɛmɛnnen in, k’a jira ko don.
