Faso tɔgɔla falatɔw tɔgɔladon tako 3nan : Hinε ani makari !

Hinεtɔko dan bεε don ! Nin denyεrεnin in si hakε bε kalo kelen ɲɔgɔnna na a ba bolo faso tɔgɔla falataɔ tɔw cεla. Jɔnnin tun b’a miiri don kelen, ko jamanakuntigi masurunnamɔgɔ dɔ bεna kε faso tɔgɔla falatɔ ye ? Nka awɔ, nin den in don dε. Furancεlafanga jamanakuntigi ka baarakεjεkulu kuntigi Adizudan Umaru Tarawele min fagara kojugubakεlaw ka binkanni dɔ senfε k’u to faso ka ci la Nara mara kɔnɔ.

Den in n’a badenkε kodɔbalinin, u fila filε u ba bolo. Nin kεra kunun jamanakuntigiso lajεkεso kɔnɔ Kuluba, faso tɔgɔla falatɔw tɔgɔladon tako 3^nan laɲεnamayali kεnε kan. Kasɔrɔ u fa Adizudan Umaru Tarawele ye wulikajɔba kε a ko la, san 2022, cakεda minnu ɲεsinnen bε a den suguyaw ladonni ma an ka jamana kɔnɔ, ka foli ni waleɲumandɔn k’olu ye. O b’a jira, ko an kεra mɔgɔ suguya o suguya ye, a bε wajibiya an kan, k’an wasa don falatɔw la.

Furancεlafanga jamanakuntigi Kolonεli Asimi Goyita ye lajε in ɲεmɔgɔya kε. Minisiriɲεmɔgɔ D^r Sogεli Kokala Mayiga, bulonba kɔnseyekulu kuntigi Kolonεli Maliki Jawu, minisiriw, ka fara Mali falatɔw tɔgɔla cakεda (Onapuma) ɲεmɔgɔba Madamu Kɔnε Sisi Odili Dakuwo kan, nin bεε tun b’a kεnε kan. Ɲɔgɔndεmεn ani dεnkεrεfε kεlεli kalo denba Madamu Ture Lɔbɔ Tarawele fana tun bε hinεtɔkεnε in kan.

Tuma min na jamanakuntigi sera kεnε kan, a ye foli di denba ni falatɔw ma, k’a ka hinε ni makari jira u la. O denmisεnnin minnu mansaw ni tora faso kunmabɔli kεlε la. Komaɲaganna fila kεlen kɔ k’u seko jira kεnε kan, Kolonεli Asimi Goyita ye falatɔya waritasεbεnw di falatɔ ninnu somɔgɔw ma. Falatɔw cεla, denmisεnnin min kεra ŋana ye u ka kalanso kiimεni na, ladiyalifεnw dira o ma.

Kεnεya ani hadamadenya sabatili minisiri Kolonεli Asa Bajalo Ture ka fɔ la, donba in ye jigiya, dusukungεlεya ani minε-n-yεrε-ma laɲεnamayali don ye. Jamana kuntilenna jirali don lafiya, yaafa ani an danbew mabεnni sira tilennen kan, ka bɔ cakεdaw la ani Maliden bεε yɔrɔ, ka ɲεsin faso tɔgɔla falatɔw ma.

Hakililajigin na, « Onapuma » bε wari di faso tɔgɔla falatɔ 1.356 ma kalo saba o saba, minnu lakodɔnna san 2019 ni bi cε. O musaka bε se sefawari miliyari 1,5 ma. Falatɔ 266 farala o hakε in kan ɔkutɔburukalo tile 18 tεmεnnen in. O ye faso tɔgɔla falatɔ hakε se denmisεnnin 1.622 ma. O bε gɔfεrεnaman ka dεmεn kofɔ ka ɲεsin denntanninw ma u ka ɲεtaa sabatiliko la. Kolonεli Asa Bajalo labanna ka foli ni tanuni lase « Onapuma » ɲεmɔgɔba, an’a baarakεɲɔgɔnw ma u ka dεmεn na.

A ye foli fana lase furancεlafanga jamanakuntigi ma kaare fila ani ci misεnninw kεli mɔbili dɔ dili la « Onapuma » ma, k’a ka taakaseginw nɔgɔya. A ye ɔridinatεri ɲεnmaw fana di a ma denmisεnnin falatɔ ninnu degeli kama. An ka nasa dɔ b’a fɔ ko ji bε don kɔ la dɔɔnin-dɔɔnin. Kolonεli Asa Bajalo Ture ye wele bila baara kεbaa bεε ma, faso tɔgɔla falatɔw tɔgɔlaso dɔ jɔli la. O furancε la, furancεlafanga jamanakuntigi yaalala ni falatɔ ninnu ye jamanakuntigiso nakɔ kɔnɔ, ka laban ka kulufotow ta n’u ye.

Jamanakuntigi laadibaa kεrεnkεrεnnen Agibu Danbεlε ye laseli kε jamanakuntigi ka hadamadenya sabatili waleyaw kan ɲɔgɔndεmεn ani dεnkεrεfε kεlεli hukumu kɔnɔ. O waleyaw la, a ye kaari kelen di « Amalidεmu » ma, ka kaare fila di sɔrɔdasiw ka hadamadenya sabatili ɲεmɔgɔso ma, ka pikɔpu fila di Kati Piritane militεri ma, ka kaare fila fana ni mɔbili kelen wεrε di « Onapuma » ma. Kolonεli Asimi Goyita hami ye k’a ka ɲɔgɔndεmεn jira denmisεnnin ninnu na, k’u bila garijεgε ɲuman sɔrɔli sira kan, yεlεma ɲuman donni na u ka ɲεnamaya la.    

Umaru JAKITE

Dɔkala Yusufu JARA