kuntilennabaw ye, jamanakuntigi Zenerali darimɛ Asimi Goyita ye minnu dantigɛ gɔfɛrɛnaman
kura ye, min minisiriɲɛmɔgɔya
donna Zenerali de diwisɔn
Abudulayi Mayiga bolo. Nin kɛra
kunun minisirilajɛ fɔlɔ
senfɛ a ye min ɲɛmɔgɔya kɛ
jamanakuntigiso lajɛkɛso kɔnɔ
A tun ka surun dɔgɔkun kelen
na mininisiriɲɛmɔgɔ kura sugandilen kɔ
ka gɔfɛrɛnaman kura sigi, furancɛlafanga jamanakuntigi ka kuntilenna di u ma gɔfɛrɛnaman ka baara kɛtaw
sabatiliko la. Minisiriw bisimilalen kɔ,
minisiriɲɛmɔgɔ kura Zenerali de diwisɔn Abudulayi Mayiga donna kɛnɛ kɔnɔ nɛgɛ kanɲɛ 10 waati la. Minisiriw y’a bisimila ni
tɛgɛrɛmugu ye. Sanga damadɔ o kɔfɛ furancɛlafanga
jamanakuntigi fana bisimilala o cogoya kelen na. Baara kɛta fila tun bolodalen bɛ nin minisirilajɛ
in na : Jamanakuntigi ka dantigɛli ka ɲɛsin gɔfɛrɛnaman
kura ma ani foto tali n’u ye.
A kɛra minisiri kura 7 siɲɛ
fɔlɔ ye
minisirilajɛ kɛnɛ kan. N’o ye Bakari Tarawele jamana jɔli kura minisiri ka ɲɛsin
gɔfɛrɛnaman ni fangabulonw cɛ koɲɛnabɔ ma, Bubakari Janɛ
yeelenko ni jiko minisiri, Madamu Sall sɛki
baaradako, gɔfɛrɛnaman baara ni baaradege minisiri, Madamu Jara Jɛnɛba Sanɔgɔ muso ni
den ani denbaya ɲɛtaa minisiri, Madamu Dunbiya
Mariyamu Tangara laminisi, lasaniyali ani yiriwali kuntaala jan minisiri, Mamu
Dafe bololabaara, seko ni dɔnko, lotoliko ani ɲɛ daamuda minisiri, ani Mamanin Nasire minisiriɲɛmɔgɔ dɛmɛnni minisiri ka ɲɛsin
politiki yɛlɛma kuraw ni
kalatakow ma.
Nin lajɛ in kɛra ci
daminɛ ye gɔfɛrɛnaman
kura bolo. Furancɛlafanga jamanakuntigi Zenerali
darimɛ Asimi Goyita fɔlɔla ka hakililajigin kɛ
minisiriɲɛmɔgɔ Abudulayi Mayiga sugandili la nowanburukalo tile
21 tɛmɛnnen in,
sanni a bɛ foli kɛ dannaya
dali la a kan ka da a sekow kan baara ɲɛdɔnni an’a ka hadamadenya la.
KUNTILENNAW BƐNNI DISIDAKOW MA- An nka nsana dɔ b’a fɔ ko « sin kɔ
la, k’o ka fisa ni kɔlamini ye ». Furancɛlafanga jamanakuntigi sinna kɔ la ni jama ye. Fasojama haminanko jɔnjɔnw ye
kuntilenna minnu ye, a sinna k’u dantigɛ. Fasojama
ye laɲinin minnu kɛ sigikafɔba senfɛ jamana jɔli kura ani Malidenw yɛrɛ dama cɛ
sigikafɔba laɲininw, olu de ko don ; sinsin kɛra olu kan kosɛbɛ. Jamanakuntigi ka fɔ
la, o haminanko ninnu de farala ɲɔgɔn kan ka kɛ laɲininw ye lafasa ni basigiko, mara kɛcogo ani yiriwaliko la. A ko fasojama ka senkɔrɔmadonni kɔtigɛbali kosɔn, furancɛlafanga ɲɛmɔgɔw sera ka yɛlɛmani ɲumanw
sennaminɛ
ko dɔw la, minnu yɛrɛ jaabi ɲumanw bɛ ka sɔrɔ kaban. Jamanakuntigi Goyita y’a ɲinin gɔfɛrɛnaman
kura fɛ, a k’o jaabi ɲuman sɔrɔlenw
jiidi ka taa a fɛ. Ani fana, ka tɛmɛn ni yɛlɛma kura
sennaminɛnenw ye ; kɛrɛnkɛrɛnnenya la, k’a hakili to ko dɔw la, minnu bɛ se k’a
to furancɛlafanga bɛ tiimɛ koɲuman.
A fɔlɔ, fɛn min ye kuntilenna dantigɛlenw ye, jamanakuntigi y’a gɛlɛya gɔfɛrɛnaman kura ma, a k’a sinsin lafasa ni basigi
sabatili kan. Sabula ko jamana lakananbaaw de ye bolomadayɔrɔ ye jamana
dugukolo mumɛ lafasali ani basigi sabatiliko la. Wa ko basigi
fana de ye yiriwali ani hadamadenya ko tɔ bɛɛ jigidayɔrɔ ye. Jamanakuntigi y’a jira ko cɛsiri minnu kɛra ka kɛlɛminɛn nafamaw sɔrɔ, ka kalanw di u ma ani ka yɛlɛma ɲuman don u ka ɲɛnamaya kɛcogo la, a ko tɛmɛn ka kan ka kɛ n’o
waleyaw ye.
A filanan, Zenerali darimɛ Asimi Goyita ye ɲɛfɔli kɛ an ka
jamana ye kandili minnu kɛ yɛlɛma kuraw
kunkan, k’olu sera k’a to ale ka se ka mara kɛcogo
ɲuman baju sigi bɛɛ
b’a yɛrɛ ye min
na ni sariyasunba kura tali ye ka fara kiiriko sariyaw kan. O siratigɛ la, jamanakuntigi ye hakililajigin kɛ gɔfɛrɛnaman kura ye,
ko a ka tɛmɛn ni yɛlɛma kuraw ye kiiriko la yuruguyurugu kɛlɛcogo ɲuman kama
ani faso nafolo burujali balili. Ani
fana, ka tɛmɛn ni yɛlɛma kuraw
ye politikikow ni fangabulonw cogoyaw la, min b’a to dannaya bɛ se ka kɛ jamana
fangabulonw kan a ɲɛma ka fara u ka kɛtaw kan kow la.
A sabanan, jamanakuntigi
Asimi Goyita sinsinna fasojama wasali kan a mako jɔnjɔnw na. Walasa
ka se k’o kɛ, a y’a ɲinin gɔfɛrɛnaman fɛ a ka tɛmɛn ni dɔ farali ye nafolo sɔrɔli waleyaw fanga kan, Mali ka se k’u kun bɔ ji la kosɛbɛ. Ani fana, ka wula kɔnɔ baaraw, izininko, kuranko ni taamako yiriwali, ka
fara kunnafoni n’a dicogo kura fɛɛrɛw senkɔrɔmadonni kan.
A naaninan, jamanakuntigi
sinsinna yɛlɛma ɲuman donni kan kɛnɛyako cogoya la jamana kɔnɔ ni kɛnɛyaso ɲumanw ni baarakɛminɛn nafamaw sɔrɔli
ye, ani ka ba don ɲɔgɔndɛmɛn na kɛnɛyako nasira la ka dɛnkɛrɛfɛ kɛlɛli kɛ tiɲɛ
ye.
A duurunan, Zenerali darimɛ Asimi Goyita y’a ɲinin
gɔfɛrɛnaman kura fɛ, a ka tɛmɛn ni yɛlɛma ɲuman donni ye kalanko
cogoya la ani nɔgɔya donni na denisɛnw ka baarako la. O yɔrɔ la, a sinsinna an danbe ɲumanw donni na u kun na ; fasodenɲumanya waleyaw matarafali b’o la.
A wɔɔrɔnan,
jamanakuntigi bolo, fasojama dusu dali gɔfɛrɛnaman kɔrɔ, o bɛ dɛmɛn don kosɛbɛ jamana basigili la. O de kosɔn a ye hakililajigin kɛ bolonɔ bilali la bɛnkansɛbɛn
na gɔfɛrɛnaman n’a jɛɲɔgɔnw cɛ hadamadenya sabatili kama nafoloko ni ɲɛtaa
siratigɛ la. Ka sɔrɔ k’a ɲinin gɔfɛrɛnaman fɛ, a ka hadamadenya sigikafɔ don ba la, ani ka dɔ
fara a fanga kan.
A wolonwulanan, Zenerali
darimɛ Asimi Goyita y’a ɲinin
gɔfɛrɛnaman fɛ, a k’a
hakili to dɔ farali la ɲɔgɔndɛmɛn fanga kan dipulomasi nasira la an ka nafaw
lafasali kama diɲɛ kɔnɔ. Ani
fana, k’an ni an jɛɲɔgɔnw cɛ siraw
taama koɲuman an ka yɛrɛmahɔrɔnya bonya ani kɔkanmalidenw
lakananni kama. A y’a jira ko an bɛ don min
na, an ka jamana y’a ŋaniya ka sira taama n’a
badenjamana Burukina Faso ni Nizɛri ye, ni
sahelikungo kɔnfederasɔn sigili
y’u cɛ. Wa ko dannaya min dara an ka jamana kan o kɔnfederasɔn ɲɛmɔgɔya fɔlɔli la, an ka kan k’an jilaja k’o minɛn fa.
Hakililajigin na,
jamanakuntigi y’a jira ko furancɛlafanga ɲɛmɔgɔw ka laɲinin ye
ka fangabulon barikamaw di an ka jamana ma.
A seeginna, jamanakuntigi
y’a ɲinin gɔfɛrɛnaman fɛ, a ka cogoyaw sigi senkan, kalata nataw bɛ se ka labɛn ka kɛ jɛlenya la
cogo min na, ka dan sigi furancɛlafanga
la.
Nin kuntitilenna minnu
donnen filɛ gɔfɛrɛnaman
kura kɔrɔ Zenerali darimɛ Asimi Goyita fɛ, walasa ka se k’u tiimɛ, a y’a jɛya ko a hakili la gɔfɛrɛnaman ka
kan ka labɛn sabati a ɲɛma, ka foroba
nafolo lakanan cakɛda bɛɛ la ka kɛɲɛ ni bɛnkan talenw ye.
A y’a ɲinin gɔfɛrɛnaman fɛ fana, a k’a hakili to jamana tɔgɔlafɛnw tɔpɔtɔli la, ka
dɔ fara u kɔlɔsili dabali tigɛlenw
fanga kan. Furancɛlafanga jamanakuntigi sinsinna
fɛn min kan kosɛbɛ nin bɛɛ kɔfɛ, o ye gɔfɛrɛnaman minisiriso kelenna ka baara kɛtaw ka mabɛn ni tɔw taw ye, fɔɲɔgɔnkɔ kana ye
baara kɔnɔ ; k’o de b’a to ni jigisigi bɛ kɛ disidakow
kɛlɛli la. Nin minisirilajɛ fɔlɔ in kuncɛra ni gɔfɛrɛnaman kura ka fotota ye ni jamanakuntigi ye.
Dɔkala Yusufu JARA
Jedone JAMA
Dɔkala Yusufu Jara
Taamako cakɛdaw ka fɔ la, kasaara seereyasɛbɛn (PV) dilanni de bɛ waati jan ta. O de kosɔn k’u bɛ se ka dɔ da kalo kan tuma dɔw la fo ka se san ma, k’a sɔrɔ asurelen ma bila a hakɛ kɔnɔ.
Denmisɛnw bɛ ka kalan bila ka firi Kɔfilacɛ damanda kan Kangaba sɛrɛkili kɔnɔ kosɛbɛ sisan. Cɛmannin fara musomannin kan, u kɛlen bɛ ka Kɔfilacɛ damandaw fa tewu digɛn senni ani damanbɔgɔw koli kama sanu nɔfɛ. U bɛ firi dugukolo jalan kan i ko fɛn wɛrɛ, k’u jigi dalen to sa.
Kow gɛlɛyara Mali bolo. An tɛ se k’a fɔ fɔcogo wɛrɛ la n’o tɛ, Mali dɛsɛlen kɔ Santarafiriki la 0-0 kunun ntɛnɛn marisikalo tile 24 san 2025, kupudimɔni san 2026 ɲɛbila ntolantanw tile 6nan hukumu kɔnɔ.
Taamasiyɛnnanw jɔra Bamakɔ ani jamana marayɔrɔ caman faabaw la k’a daminɛ san 1992 la, walasa ka hakililajigin kɛ Malidenw ka wulikajɔba la demokarasi nɔfɛ.
Lajɛ in ɲɛmɔgɔya tun bɛ minisiriɲɛmɔgɔ Zenerali de diwisɔn Abudulayi Mayiga bolo. A y’a gɛlɛya cakɛdaw ma, minnu bɛna degedenw sɔrɔ, u ka baaradege sarati fɔ ka gɛlɛya u ye.
Denmisɛnninw (cɛmanw ni musomanw) bɛ nin laadalako in kɛ ni sunkalo ye tile 10 sɔrɔ. Laada min don, hakilimaw ka fɔ la, a bɛ ɲɔgɔndɛmɛn ani ku-ɲɔgɔn-kan hakilila de kofɔ.
