Bulonba kɔnseyejɛkulu jɛnna ni poroze ŋaniya sirilen dɔw waleyali ye alamisa tɛmɛnnen in Bamakɔ lajɛkɛsoba Seyisebe (CICB) la. A lajɛ ɲɛmɔgɔya tun bɛ furancɛlafanga bulonba kuntigi Zenerali de kɔri darimɛ Maliki Jawu bolo. U jɛnna ni dan sigili ye gɔfɛrɛnaman minisiri hakɛ la, k’o cayalenba kɛ mɔgɔ 30 ye. Jamanadenw ye laɲinin min kɛ dɔ bɔli la jamana ɲɛmɔgɔw ka n-bɛ-n-diyaba la sɔrɔ ka se ka labɔli kɛ, a bɛ dabɔ k’o waleya.
Jamana ka san 2023 zuluyekalo tile 22 sariyasunba sariyasen 75 b’o kofɔ : Gɔfɛrɛnaman mɔgɔw ye minisiriɲɛmɔgɔ ani minisiri tɔw ye. Minisiriɲɛmɔgɔ dɛmɛnni minisiri Mamanin Nasire ka ɲɛsin politiki yɛlɛma kuraw ani kalata tɛmɛnsira senkɔrɔmadonni ma, o tun bɛ kɔnseyew ɲɛkɔrɔ ka poroze in lafasa. Wote kɛlen, kɔnseye 129 jɛnna n’a ye, fɛn ma ban a ma, wa fɛn fana m’a sɔminɛ.
Kɔnseyew y’u kandi fana, k’u jɛnna ni jamana sariyasunba sigicogo an’a labaaracogo ye. Ale de ye kiiritigɛso ye, min bɛ jamana sigikan sariyakow, hadamadenw ka hakɛw ani foroba kannabilakow ɲɛnabɔ.
Jamana sariyasunba tun bɛ jamanakuntigi sigili, kandili sariyasunba ma ani depitesigi walima Senatɛriw sigili kalataw kunkankow kiiriw tigɛ, k’u jaabi labanw di. Ni sɔsɔli donna nin waleya kofɔlen ninnu na, k’u ma kɛɲɛ ni sariyasunba kɔnɔko ye, jamana kiiritigɛso sanfɛdan bɛ sarali kɛ sariyasunba lafasabulon na, a ka kiiri laban tigɛ.
Min ye sariysunba sigicogo ye, ka dantigɛ sariyasunba kura fɛ, a mɔgɔ hakɛ bɛ kɛ kɔnseye kɔnɔntɔn ye, minnu bɛ sugandi san wolonwula sarati kuntaala kama. A tɛ mɔɔnɔbɔ, fɛn tɛ fara o kan. O kɔnseye 9 sugandicogo filɛ : jamanakuntigi bɛ fila di, bulonba kuntigi bɛ kelen di, Sena kuntigi bɛ kelen di, mazisitaraw ka jɛkuluba bɛ fila di, sariyakow Iniwɛrisitew ka jɛkuluba bɛ karamɔgɔ-ɲininnikɛla fila di foroba hakɛw kunkan, soronadonnaw (awokaw) ka jɛkuluba bɛ kelen di.
Fɛn min ye sariyasunba ka kɛta ye kalatako la, fo n’a bɔra jamanakuntigi sigili kalata jaabi dili la, a sen tɛ depitesigi ani Senatɛriw sigili kalataw jaabiw dili la. Sɔsɔli minnu mana kofɔ o kalataw la, a dan ye olu kiiriw tigɛli ye. Ko kura minnu donna sariyasunba kɔnɔ, a da b’olu fana na. Kiiriko, jamana taamasiyɛnw marali ani hadamadenw ka hakɛw labatoli minisiri Mamadu Kasoge tun bɛ kɔnseyew ɲɛkɔrɔ ka poroze in lafasa. Wote kɛlen, kɔnseye 131 minnu tun bɛ kɛnɛ kan, o bɛɛ jɛnna n’a ye.
NI SARIYA SƆSƆRA- Bulonba jɛnna ni jamana kiiritigɛso sanfɛdan sigicogo, a labaaracogo an’a ka kow tɛmɛnsira ye. Sariyasunba kura y’a jira ko kiiriso ka sigi ka ɲɛsin faso nafolo ladonni ma ani kiiritigɛso sanfɛdan kura, min b’a to bɛnbaliya ni sariyakow ye, o kiiriw ka se ka tigɛ. Jamana kiiritigɛsoba n’o bɛ wele tubabukan na « hɔti kuuru de zusutisi », o jɔɔsira ka bɔ kiiritigɛsow cɛla. A ka kɛtaw donna jamana kiiritigɛso sanfɛdan bolo. Gɔfɛrɛnamanan minisiriw mana sariya sɔsɔ u ka baara kɔnɔ, o koɲɛw kiiri tigɛli kama.
O de nana ni bolofara kura bɔli ye jamana kiiritigɛso sanfɛdan na, ko kuraw tɔpɔtɔli kama, walasa ka se ka dantigɛli kɛ a mazisitaraw ka yɛrɛmahɔrɔnya an’u ka kɛtakɛ la. Kiiriko, jamana taamasiyɛnw marali ani hadamadenw ka hakɛw labatoli minisiri tun bɛ k’o poroze in fana kɔkɔrɔmadon. Kɔnseye minnu tun bɛ kɛnɛ kan, a bɛɛ jɛnna n’a ye.
Minisiri Kasoge ye damakasili kɛ fana, kɔnseyew ka kandili kɛ foroba nafolo tɔpɔtɔli kiiritigɛso (kuuru dɛ kɔnti) sigicogo, a labaaracogo an’a ka kow tɛmɛnsira kan. San 2023 zuluyekalo tile 22 sariyasunba sariyasen 36 bɛ ɲɛsigili kɛ kuuru dɛ kɔnti sigili la. Ale de bɛna faso kunkan nafoloko bɛɛ kiiriw tigɛ. A ka kɛtaw bɛ yen sariyako nasira la, kɔlɔsili ani hakililaɲinin nasiraw la.
A bɛ gɔfɛrɛnamanan ni bulonba dɛmɛn jamana ka baarakɛnafolo labaarali kɔlɔsili la ani foroba politikiw kiinɛni na. Mɔgɔ minnu wajibiyalen don k’u ka sɔrɔw dantigɛ, o dantigɛliw bɛ kɛ faso nafoloko kiiritigɛsoba in ye. A bɛ politikitɔnw fana ka nafolokow cogoyaw sɛgɛsɛgɛli kɛ. Kɔnseye hakɛ min tun bɛ kɛnɛ kan, o bɛɛ jɛnna ni poroze in ye.
Bulonba jɛnna ni sariyasunba sariyasen 153 kɔnɔko fana waleyali ye, ni sariya sɔsɔra. O poroze in waleyali b’a to mɔgɔ o mɔgɔ mana sariya sɔsɔli kɔlɔsi ko min na, o ka kofɔli kɛ min b’a to mabɛnni bɛ se ka kɛ ni sariya ye. Kiiriko minisiri tun bɛ k’o poroze in fana lafasa. Kɔnseye 128 minnu tun bɛ kɛnɛ kan, a bɛɛ jɛnna n’a ye.
Dɔkala Yusufu JARA
Bɛnbabilen DUNBIYA
Dɔkala Yusufu Jara
Sports.
Retour de l'Administration à Kidal.
Sports.
Concours fonction publique.
Vente de carburant.
Vente des produits phytosanitaires.
