Ŋununŋununw tun bɛ sen na, nka a kɛra tiɲɛ ye kabini kunun. Dr Sogɛli Kokala Mayiga bolo bɔlen a jɔyɔrɔ baara la furancɛlafanga jamanakuntigi Zenerali darimɛ Asimi Goyita fɛ arabadon, o dugu jɛ bɛɛ, a ye Zenerali de diwisɔn Abudulayi Mayiga sugandi o nɔ na ka kɛ minisiriɲɛmɔgɔ ye. Ale tun ye mara ni desantaralizasɔn minisiri, gɔfɛrɛnaman ka kumalasela ye. Nin kɛra a seginnen y’o jɔyɔrɔ in na ; sabula minisiriɲɛmɔgɔ kɔrɔ ka farigan lafiɲɛbɔ waati la, a tun kɛra minisiriɲɛmɔgɔ ye sanni k’o ka lafiɲɛbɔ sarati dafa. A ye kalo naani kɛ o la san 2022 kɔnɔ. Minisiriɲɛmɔgɔya de farala Zenerali de diwisɔn Abudulayi Mayiga ka baara kan ; sabula halibi mara ni desantaramlizasɔn minisiriya, gɔfɛrɛnaman ka kumalase tora a bolo.
A bangera Bamakɔ mɛkalo tile 12 san 1981. Dipulɔmu min bɛ wele tubabukan na « Dɔkitora », a y’o sɔrɔ san 2011 diɲɛ basigi ni lafasa nasira la Zan Liyɔn de Mulɛn (Faransi) Iniwɛrisite la. O y’a sɔrɔ « Masitɛri 2 » sɔrɔla a fɛ hadamadenw ka hakɛw ani dununya hadamadenyakow hakɛw la. O sɔrɔla Ewriri Wali de Sɔmu Iniwɛrisite la san 2008. Kabini san 2016, minisiriɲɛmɔgɔ kura in b’a la ka dɔkitora wɛrɛ sɔrɔli kalanw kɛ marako makow ɲɛnabɔli (DBA) kan Alizeri kalansoba dɔ la.
« Masitɛri 2 » fana b’a bolo politiki dɔnniya ɲininni kan ka ɲɛsin basigi ni lafasa ma. A y’o sɔrɔ san 2007 Zan de Mulɛn de Liyɔn Iniwɛrisite la Faransi, ka laban ka dipulɔmu dɔ fana sɔrɔ san 2006 Pari dununyakow kalansoba la. Dipulomasi ni dununya hakɛw faamuyali dipulɔmu sɔrɔla a fɛ Alize Iniwɛrisite la san 2005. Nin dɔnniya minnu bɛ Zenerali de diwisɔn Abudulayi Mayiga la, o y’a to a ka kɛ zandarama jalatigiba ye kojugubakɛ ni dansagonwale kɛlɛli ani jikantaama basigi baarabolodalen fɛsɛfɛsɛlikɛla Sedeyawo tɔgɔ la ɲɛmɔgɔso min ɲɛsinnen bɛ kɔnkoma ma k’a daminɛ san 2016 desanburukalo la. San 2014 ni 2016 furancɛ la, a kɛra fɛsɛfɛsɛlikɛla ni ɲɛsigilikɛla ye Afiriki kelenya tɔnba tɔgɔ la kalanyɔrɔ min ɲɛsinnen bɛ kalanw ni ɲinini ma kojugubakɛ kunkan.
Zenerali de diwisɔn Abudulayi Mayiga ye zandaramaya dipulɔmu sɔrɔ Bamakɔ zandarama kalanyɔrɔ la san 2010, ka dipulɔmu sɔrɔ Kulukɔrɔ sɔrɔdasikalanyɔrɔba « EMIA » fana na san 2001. San 2014, a kɛra Bamakɔ zandaramaso kuntigi ye. O san kelen yɛrɛ la, a kɛra Mali zandaramaw ɲɛmɔgɔso baarakɛjɛkulu (sɛfu de kabine) kuntigi ye. K’a daminɛ san 2011 ka se 2014 ma, minisiriɲɛmɔgɔ kura in tun bɛ basigi sabatili lakananbaaw cɛla ONU ka ciw hukumu kɔnɔ RD Kongo (Monusco) tɔgɔ la. K’a daminɛ san 2009 nowanburukalo la ka se san 2011 nowanburukalo ma, jɛkulu min ɲɛsinnen bɛ kojugubakɛ kɛlɛli ma, a kɛra o kuntigi ye. Ka kɛ bolomadamɔgɔ ye Afiriki kalanyɔrɔba min ɲɛsinnen bɛ kalanw ni ɲininniw ma kojugubakɛ kan, o bolo, ani ka kɛ bolomadamɔgɔ ye Sedeyawo bolo kojugubakɛ kɛlɛli la basigi ni siwiliw lakananni minisirisiso la.
San 2022 utikalo la, k’a sɔrɔ mara ni desantaralizasɔn minisiri don, furancɛlafanga jamanakuntigi y’a sugandi ka kɛ minisiriɲɛmɔgɔ ye Dr Sogɛli Kokala Mayiga nɔ na, tuma min na o ka dɔgɔtɔrɔ tun y’a wajibiya o ka waati jan kɛ lafiɲɛbɔ la. A ye kalo naani k’o jɔyɔrɔ la. O kɔfɛ a seginna a ka mara ni desantaralizasɔn, gɔfɛrɛnaman ka kumalase minisiriya ma, fo ka se a sugandili ma kunun, ka kɛ minisiriɲɛmɔgɔ ye. Medayi caman bɛ Zenerali de diwisɔn Abudulayi Mayiga bolo ; i n’a fɔ ONU ye min di a ma k’a to Monusiko kɔnɔ RD Kongo, Sɔrɔdasiya medayi (medayi de merite militɛri), sewaliye de lɔrɔduru nasiyonali, Mali ka (le garadi de komandɛri de lɔrɔduru nasiyonali.
Dɔkala Yusufu JARA
Jedone JAMA
Dɔkala Yusufu Jara
Minisiriw y’u ka laadalatɔnsigi kɛ araba sɛtanburukalo tile 10 san 2025, jamanakuntigiso la Kuluba. A ɲɛmɔgɔya tun bɛ Zenerali darimɛ Asimi Goyita bolo..
Walasa ka se ka dɔ fara jago ni baarabaw kɛli fanga kan diɲɛ silamɛdiinɛ tɔnba ni silamɛdiinɛ cakɛda min ɲɛsinnen bɛ jago yiriwali ma, ni jago ni izininko minisiriso ka jɛɲɔgɔnya ye, u bɛna baarabaw kɛli Afiriki kɔnɔ, o lajɛba 1lɔ kɛ k’a daminɛ desanburukalo tile 2 la ka s.
Sɛtanburukalo tile 22 wulikajɔw labɛn hukumu kɔnɔ jamana lakananbaaw fɛ, lakananbaaw ɲɛmɔgɔba ye laseli kɛ, k’a jira ko sira dɔw bɛ ka tigɛ Bamakɔ kɔnɔ, a daminɛna bi tarata la sɛtanburukalo tile 16 san 2025 sɔgɔmadaw fɛ..
Minisiriɲɛmɔgɔ ye balikukalan tɔgɔladon laɲɛnamayali lajɛ ɲɛmɔgɔya kɛ Bamakɔ lajɛkɛsoba Seyisebe (CICB) la. A ye hakililajigin kɛ, ko an bɛ don min na, a fasoden ɲɔgɔn ba caman ye balikukalan kɛ k’a sababu kɛ gɔfɛrɛnaman, sigidaw ani jɛɲɔgɔnw yiriwaliko la, olu ka c.
Kojugubakɛlaw b’a la ka bin tajidoni kamiyonbaw ni « Jara taransipɔri » kaarebaw kan sisan k’u tajiw bɔ. O ye k’a ɲinin ka jamana nafoloko don nkalama na. Ka da u ka nin binkannibaw kan, jamana lakananbaaw fana jɔlen b’u ɲɛ k’u ŋaniya jugu jigin u yɛrɛ kɔnɔ.
Supɛri kupu Asimi Goyita dako 5nan finali tanna kunun kari sɛtanburukalo tile 7 san 2025 Mamdadu Konate tɔgɔla farikoloɲɛnajɛkɛnɛ kan. A tun bɛ marayɔrɔ fila balontantɔnw cɛ : Kulukɔrɔ ani Moti. Moti delila k’a ta san 2022, Kulukɔrɔ tun delila k’a ta san 2024. Nin sen in na, Ku.
