Mali Sɛgɛ mankanw degelikaramɔgɔ Adama Jefa Jalo n’a ka cɛdenw tun fɔlɔla ka 2-0 kɛ Sɛnɛgali Waraninw na ; nka Sɛnɛgali labanna ka ku u la, fo ka balontan laban filaninbin 3-3 la u ni ɲɔgɔn cɛ. Mɔgɔ si tun ma sigi n’a ye ko Sɛgɛ mankaw tɛgɛ bɛna se ka ko ka bɔ kupu in na 2-0 kɛlen, kabini sanga 45 fɔlɔ kɔnɔ. Seyidu Danbɛlɛ ye Mali ka bi fɔlɔ don balontan daminɛnen sanga 1lɔ yɛrɛ kɔnɔ. Bakari Sɛnpara y’a dafa 2-0 la sanga 44nan na. Sɛgɛnnafiɲɛbɔ kɛra Mali k’o sebaaya kan.
Kabini tako filanan daminɛna, a kɛra i n’a fɔ diɲɛ tununna Sɛgɛ mankanw ɲɛmɔgɔ Isa Tunkara n’a tɔɲɔgɔnw na. U ma wo fosi ye Sɛnɛgali Waraninw na bilen. Sɛnɛgali ye kuru fila in jibɔ fo ka bi sabanan don k’a sɔrɔ Mali ma fɛn wɛrɛ sɔrɔ ka fara a ka fila fɔlɔ donnenw kan. Lamini Benge sanga 48nan, Musa Sise sanga 61nan ni sanga 63nan. Abubakari Kamara ye Mali ka bi dafa 3 la sanga 67nan na. A kɛra filaninbin y’u cɛ 3-3. Penalititan kuncɛra Sɛnɛgali Waraninw ka sebaaya la 5-4.
Mali Sɛgɛ mankanw kɔlila kupu tako fila la. U ka sɔrɔ bɛnna medayi warijɛlama ma ani sebaaya sɔrɔli ka ye u ka kupudafiriki nata kɛnɛ kan. Mali ni Sɛnɛgali fila de bɛna « Zoni » A jɔyɔrɔ fa o kɛnɛ in kan. A bɛ se ka kɛ Sɛnɛgali filɛ ka mɔnɛ min don u la ntɛnɛndon, u bɛna se k’o mɔnɛ bɔ o janjo senfɛ. A bɛ se ka kɛ fana, u bɛna sebaaya sɔrɔ yen ka ye u ka kupudimɔni yɛrɛ kɛnɛ kan, k’a sababu kɛ n’u sera ka jaabi ɲuman sɔrɔ o KANI in na. U17 UFOA-A kupu la Sɛnɛgali, Mali ye sebaaya naani sɔrɔ, ka filainbin kelen kɛ a bɔko duuru kɔnɔ.
Mali ye bi 12 don, 5 donna a la. Bakari Sɛnpara kelen ye bi 5 don ; demifinali yɛrɛ la a kelen ye bi saba don Ganbi la. Mali jɔkɔlɔsila Lamini Sinaba kɛra jɔkɔlɔsila ŋana ye kupu in na. Seyidu Danbɛlɛ kɛra balontanna ŋana ye, ka Bakari Sɛnpara kɛ bidonna ŋana ye.
Balontan tako fɔlɔ la kupu in senfɛ, Mali ye Seraleyɔni gosi 1-0 ka Gine-Bisawo gosi 1-0, ka Moritani gosi 4-0. Hali bi kelen ma don Mali la kuluntolantan kɔnɔ. Ganbi de y’an ka jɔ yaara demifinali la. Sɛgɛ mankanw ɲɛmɔgɔ Isa Tunkara n’a tɔɲɔgɔnw bɛna u labɛn kosɛbɛ sa, k’u ka KANI makɔnɔ ; o balontan labanw bɛna kɛ jamana min kan, o kɔni ma dantigɛ fɔlɔ, wa Sɛnɛgali Waraninw ye min da u kan U17 UFOA-A kupu la, o na kɛ walanda y’u bolo.
Dɔkala Yusufu JARA
Jɛnɛba BAGAYƆGƆ
Dɔkala Yusufu Jara
Coupe du monde.
Perturbation des transports des hydrocarbures au Mali.
Le contrôle de services publics.
Journée internationale de la Jeune fille édition 2025.
Journée internationale de la Jeune fille édition 2025.
Mali - Etats-Unis.
