Mali-Afirikidisidi 2-0 : KANI 2023 daminεcogo ɲεna Samatasεgεw bolo

Mali k’o bi fila in donbaaw kεra Samatasεgεw ɲεmɔgɔ Hamari Tarawele ye, ka Seku Koyita ka baara tɔ lase sanga 60nan na, sabula o ka baton tun ye poto minε ka kɔsegin ; ani Lasinε Sinayɔkɔ sanga 66nan na, a sɔnnen ka ɲε Kamori Dunbiya  fε a sagolabalon na. Nin kεra Lasinε Sinayɔkɔ bidonko 4nan ye ntolantan 12 kɔnɔ Samatasεgεw fε.

Sanga wɔɔrɔ kuntaala kɔfε, Eriki Seku Sεli ka cεdenw ye kεnε tunun Afirikidisidi mɔgɔw la, o ka ntolantanna Pεrisi Muzi Tawo kεlen kɔ ka penaliti kelen tan k’o jε ; kasɔrɔ u ka bidonna ŋana don. A kelen ka bi donnen hakε ye 22 ye Bafana-Bafana ka ntolantanw na. Mali tun ye kεnε k’a sago ; wa a tun bε se ka bi caman don ka tεmεn nin kan, ni Lasinε Sinayɔkɔ tun ma balan u ka jɔkɔlɔsila Wiliyamu na sanga 45nan dafalen ka sanga 1 yεlεn o kan.

Nka o m’a tiɲε ; sabula Hamari Tarawele n’a tɔɲɔgɔnw ŋaniya min tun ye balontan in sebaaya sɔrɔli ye, o sabatira. A kεra hεrε ye ; Amadu Hayidara kεra Mali-Afirikidisidi ntolantan in cε ŋana ye.

Sebaaya sɔrɔli Bafana-Bafana kan, nafaba yera o la. A y’a to Samatasεgεw ka kε fɔlɔ ye u ka kulu E kɔnɔ ni kuru 3 ye. Kuru 3 bε Namibi fana bolo ; ale ye Tunizi gosi 1 ni 0, ka kɔn Mali-Afirikidisidi ɲε. Wasayɔrɔ dɔ kεra degelikaramɔgɔ ka hakilitigiya ye ; Sanga 45 filanan na, a ye Lasana Kulubali don Iwu Bisuma nɔ na. O bεnna jama ma ; mɔgɔ si ma o waleya in lagosili kε. Hali a fɔlɔli ka Seku Koyita don kabini ntolantan daminε na, o bεnna sen ma ; kasɔrɔ siga tun b’o kunkan k’a sababu kε a jɔyɔrɔ tun ka dɔgɔ tile damadɔ in na. Ale bε ntolantan na Otirisi jamana na ; wa a y’a jeninyɔrɔ fin kosεbε kunun.

Samatasεgεw ka nin bɔko fɔlɔ in na, degelikaramɔgɔ Eriki Seku Sεli tora a ka fεεrε sirilen kan ; n’o ye 4-4-2 ye ; ntolantannaw fana tora ka ɲɔgɔn jɔyɔrɔw ta balontan kuntaala kɔnɔ. Jaabi sɔrɔlen kεra jama sago ye. An jigi b’a kan k’u bεna to nin cogo la sebaayako la Malidenw ka hεrε kama.

Hakililajigin na, Mali siɲε 13 ye nin ye KANI janjo la ; a si la, a ma deli ka gosi a bɔko fɔlɔ la. Surɔ, Hamari Tarawele n’a tɔɲɔgɔnw y’an wasa ; n’an taara nin cogo la sebaaya bε sɔrɔ ka wicεmudefinali ntolantanw kε. Mali ni Tunizi bε ɲɔgɔn sɔrɔ a bɔko filanan na sibiri nata zanwuyekalo 20 san 2024, Afirikidisidi ni Namibi fana bε ɲɔgɔn sɔrɔ. Jamana fila minnu mana kε ten kan u ka kulu E in kɔnɔ, olu de bε yamaruya wicεmudefinali la.

Laji M. JABI

Dɔkala Yusufu JARA