Laɲinin sabatira ; Mali bɛ ye KANI Marɔku san 2025 kanjo kɛnɛ kan. Sɛgɛw sera ka sebaaya sɔrɔ o la ni Mozanbiki gosili ye 1-0 Maputo juma tɛmɛnnen in, ɲɛbila ntolantanw tile 5nan na. A don balontanna ŋana kɛra Kamori Dunbiya ye ; ale de ye Mali ka bi kelen in don sanga 19nan na u ɲɛmɔgɔ Iwu Bisuma kɛlen k’a sɔn balon na. Nin jaabi ɲuman in bɛ Mali kɛ ka waleya saba kɛ. A fɔlɔ nafa ka bon kosɛbɛ ; o ye sebaaya sɔrɔli ye ka ye KANI Marɔku 2025 janjo kɛnɛ kan. A filanan ye a kɛli ye jɔyɔrɔ fɔlɔ ye u ka ntolatankulu I kɔnɔ balontan nata jaabi mana kɛ fɛn o fɛn ye. A sabanan y’a ka tajurusara ye Mozanbiki la ; sabula a n’o tun ye filaninbin kɛ Bamakɔ 1-1 « 26Mars » la.
Ɲɛbila ntolantanw tile 6nan bɛna kɛ Mali ni Ɛsiwatini cɛ « 26Mars » la Bamakɔ sini tarata. O kɔni bɛna kɛ Mali bolo ka bɔgɔ bɔ daba da la dɔrɔn ; sabula sebaaya bɛ a bolo kaban. A bɛ se ka kɛ degelikaramɔgɔ Tɔmu Sɛnfiye n’a ka cɛdenw bɛna jigisigiba di u senkɔrɔmadonbaaw ma o ntolantan in senfɛ ; n’o tɛ halibi siga bɛ mɔgɔ caman na Sɛgɛw ka ko la.
Sɛgɛw ka laɲinin ye ka ɲɛbila ntolantanw kuncɛ ni dannayaba dali y’u kan taratadon balontan in kuncɛlen kɔ. Tile duuru fɔlɔ min tɛmɛnna, Mali ye sebaaya 3 ani filaninbinko 2 kɛ, ka bi 4 don, 1 donna a la. Ni Ala y’a kɛ, ko Mali sera ka Ɛsiwatini gosi sini balontan na, o bɛ Mali ka kuru hakɛ dafa 14 na kuru mumɛ 18 ɲininta la. Tile 5nan balontan filanan na, Gine Bisawo ni Ɛsiwatini ye filaninbin kɛ 1-1. Kuru 5 bɛ Gine-Bisawo bolo, Mozanbiki ta ye kuru 8 ye. Ale sago ye sebaaya sɔrɔli ye a ka tile 6nan ntolantan in na walasa a jigi bɛ da sebaaya sɔrɔli kan walima filaninbin walasa a ka ye KANI Marɔku janjo kɛnɛ kan. Kulu I in jɔyɔrɔ filanan ɲininni bɛ Mozanbiki ni Gine-Bisawo de ma sisan sa ; n’o tɛ Mali bɛ jɔyɔrɔ fɔlɔ la kaban.
Mali b’a ka sebaaya sɔrɔli nisɔndiya kɔnɔ, yamaruya sɔrɔlen kɔ KANI Marɔku san 2025 janjo kɛnɛ lasɔrɔli la. Sɛgɛw ɲɛmɔgɔ Iwu Bisuma y’a jira jumadon balontan kuncɛlen, k’u wasara ni jaabi ɲuman sɔrɔlen ye. A ko an bɛ waati min na, u bɛɛ ɲɛ jɔlen bɛ sini balontan de la Mali ni Ɛsiwatini cɛ, ani kudpudimɔni san 2026 ɲɛbila ntolantan tɔw la.
Iwu Bisuma k’u doncogo de ma ɲɛ o ɲɛbila ntolantanw na ; nka ko fosi ma tiɲɛ fɔlɔ, sabula k’u bɛna u fasa fili koɛbɛ a ko tɔw nɔfɛ. Degelikaramɔgɔ Tɔmu sɛnfiye ko jaabi ɲuman min sɔrɔla Maputo, o sababu bɔra balontannaw ani ɲɛmɔgɔw ka cɛsiri la. Wa ko u bɛna to balotan kɛcogo ɲuman sira kan. A ko fɛn min ye balontan laban in ye sini tarata, u sago don a kɔfɛ dannayaba ka da Sɛgɛw kan, hali n’i y’a sɔrɔ u ye caman kɛ juma tɛmɛnnen in na Mozanbiki ɲɛkɔrɔ.
Degelikarmɔhɔ ka fɔ la, hali ni senkɔrɔmadonbaaw ɲɛ ma fa Sɛgɛw la i n’a fɔ u tun sigilen bɛ ka makɔnɔni kɛ cogo min na, wasa kɔni sɔrɔla. A ye foli ni tanuni lase Kamori Dunbiya ma a kɔseginni na Sɛgɛw ma, ani, a ni Iwu Bisuma ka ɲɔgɔndafa kɛnɛ kan a don in na. A ye foli ni tanuni fana lase jɔkɔlɔsila Jigi Jara ma, « Manbas » jigi tigɛli la siɲɛ caman na a ka jɔda la.
KANI Marɔku san 2025 bɛna kɛ kupu in tako 35nan ye ani Mali siɲɛ 14nan a kɛnɛ kan, wa siɲɛ 10 ka da ɲɔgɔn kan. Nka Mali ka se KANI finali ma, o dan ye san 1972 ta ye halibi. Kongo-Barazawili ye Mali gosi o la 3-2.
Dɔkala Yusufu JARA
Seyibu S. KAMISƆKƆ
Dɔkala Yusufu Jara
Transports des marchandises.
Fin de crise de carburant.
Coup d'état en Guinée Bissau.
Sports.
Retour de l'Administration à Kidal.
Sports.
