Sirabaw dilanni : Baaraw taacogo ka ɲi gɛlɛyaw n’u ta bɛɛ

Nin kɛra ntɛnɛn tɛmɛnnen zuluyekalo la siraba n°27 (Bamakɔ-Kulukɔrɔ) furancɛ la. Kamiyonbaw tun bɛ ka bɔgɔ cɛ k’u ton u bɛ ka yɛrɛkɛ Jelibugu ani Bulukasunbugu yɔrɔw la. Sira fan fila fɛ, baarakɛlaw b’u sɔn, jɔli baaraw ni daliw dali jibolisiraw la. Samiyɛ kama, baaraw bɛ ka kɛ ka kɛɲɛ n’u sogoyaw ye.

Sira bɛ ka boli a ɲɛma, nka baaraw fana bɛ sen na. O b’a jira ko sira sinnen tɛ ka tigɛ bolibaaw la. Ni baarakɛlaw bɛ fan dɔ kan, boli bɛ kɛ fan dɔ kan. Jama de ka ca waati minnu na sorobaɲagami bɛ kɛ sira in bolibaaw cɛ. A tuma dɔlamaw bɛ kɛ degun dan bɛɛ ye. O n’a ta bɛɛ, mɔgɔw timinangoyalen tɛ ; sabula ko don dɔ la a bɛna ɲɛnabɔ ni sira in banna.

O la, poroze nafama in ɲɛsinnen bɛ furancɛ km9,68 ɲɔgɔnna ma ; n’o sera ka ban nɔgɔya bɛ sɔn ka don a bolili la. Mɔgɔ minnu ka sow walima feerelikɛyɔrɔw bɛ siraba in da la, olu ka kan k’a faamuya ko ni sira in dilanni banna, a nafa bɛ jama kan. U ka kan ka sariyaw labato baarakɛlaw kana degun u kosɔn.

Baarakɛlaw filɛ u tan ni fili fili la siraba n°27 dilanni na

Nin don y’a sɔrɔ mɔgɔ minnu ka kan k’u sigiyɔrɔw labila sanni baaraw ka ban, olu kɛlen tɛ k’o kɛ ka se a dan na fɔlɔ. Nka o n’a ta bɛɛ yɔrɔ minnu ka kan ka ci, olu b’a la ka ci dɔɔnin-dɔɔnin ka kɛɲɛ ni baaraw taacogo ye. O waleyaw ɲɛsinnen bɛ mɔgɔ 548 ma furancɛ in kan. Olu la sudalisɛbɛn donna mɔgɔ 457 bolo kaban kiiriso fɛ. Nin kunnafoniw lasera taamakow ni sira dilan minisiriso fɛ. Lafaamuyaliw n’u ta bɛɛ, mɔgɔ dɔw selen tɛ halibi ka wuli. O de bɛ ka baaraw sennasumanya yɔrɔ dɔw la.

JAMA NAFAFƐNW SIRAW FƐ- O gɛlɛyaninw n’u ta bɛɛ, k’a daminɛ Garan hotɛli dankun na ka se Palɛsitini taamasiyɛnnan ma, gitɔrɔnbɛlɛ bɔnnen bɛ mɛtɛrɛ 640 ɲɔgɔnna kan. Wa baaraw bɛ ka sira sɔrɔ yɔrɔ caman na, mɔgɔw wulila ka bɔ yɔrɔ minnu na. O kɔlɔsira yɔrɔw lajɛdon zuluyekalo tile 3 san 2025.

Taamakow ni sira dilan minisiri Madamu Danbɛlɛ Madina Sisɔkɔ ka ɲɛfɔli la, sarati min dalen don sira dilanni na, o 43% bɛ ɲinin ka tɛmɛn, nka baara yɛrɛ kɛlen tɛ tɛmɛn 18,33% kan fɔlɔ. O sennasumanyali in tɛ ka sɔrɔ dɔwɛrɛ fɛ mɔgɔw wulibaliya kɔ ka bɔ yɔrɔlabilataw la. Fɛn caman bɛ yen minnu ye jama nafafɛnw ye sira in fɛ ; n’o ye « Somagep », « EDM » ani « Moov Africa » ni « Orange Mali » taw ye. Siraba kɔrɔ don, min kɛrɛfɛlanw maminɛnen don mɔgɔw fɛ a mɛɛnna ; dɔw yɛrɛ bɛ ka sow jɔ yen. Jateminɛw kɛra ka kɔn, k’o sow hakɛ an’u cogoyaw dɔn jɛkulu kɛrɛnkɛrɛnnen dɔ fɛ. O ka seereyasɛbɛn dilannen bɛ yen o jateminɛw kan. Minisiri ka fɔ la, ni siradaw ma labila a ɲɛma, baara bɛ cakɛda min bolo o tɛna se ka baara kɛ a sago la.

O siratigɛ la, minisiri ko sira in dilanni baara degun ka kan ka se mɔgɔ kofɔlen minnu ma ni donbolo ka kan ka di u ma u sigiyɔrɔw labilali kunkɔrɔ, u ka se jɛkulu kɛrɛnkɛrɛnnen in ma soko ni dugukoloko minisiriso la walasa u ka koɲɛw ka se ka ɲɛnabɔ teliya la, u ka yɔrɔw labila. Samiyɛ kosɔn, a ɲininna sira dilan cakɛda fɛ, a ka bolodalisɛbɛn kura dilan ka dajira, min b’a sɛmɛntiya ko a bɛna se ka sarati dalen labato. Fɛn dɔw bɛ dilan ka kɔn u labaarali ɲɛ ; o la, minisiri b’a ɲinin cakɛda « COVEC-Mali » fɛ a k’o caman dilan ka to a bolo kɔrɔ sanni u mako ka jɔ.

Gitɔrɔnbɛlɛ bɔnnen filɛ sira kan k’a daminɛ Garan Hotɛli dankun na ka se palɛsitini taamasiyɛnnan na

O bɛ sɔn k’a to sumanya min bɛ baara kɔnɔ, o gɛlɛya ka wuli. Fɛn min ye Bamakɔ-Kuluba-Kati furancɛ taa siɲɛ 2 ani seginni siɲɛ 2 ye (km11,481) ka bila « Point G » sira (km1,7) la, Kati dugu kɔnɔ km7 ka se « GMS-Same-Kati dankun ma, jateminɛw y’a jira ko (Somagep, EDM, ani SMTD) ka fɛnw ka ca yen. jɛkulu kɛrɛnkɛrɛnnen sigilen in y’a ka seereyasɛbɛn di o koɲɛ kan kaban, wulikajɔw bɛ sen na a nɔladilanwariw dili kama ka yɔrɔw ci.

Mɔgɔw bɛ ka yɔrɔ minnu maminɛ siradaw la o gɛlɛya kelen bɛ fan wɛrɛw fɛ, kɛrɛnkɛrɛnnenya la Moti mara kɔnɔ. Madamu Danbɛlɛ Madina Sisɔkɔ ka fɔ la, Sewarɛ-Moti furancɛ ani sira mununmununyɔrɔ ka taa pankurunjiginkɛnɛ Anbodeio la, o baaraw jɔra siɲɛ fila k’a sababu kɛ mɔgɔw wulibaliya ye ka bɔ yɔrɔw la. Nka bɔgɔ b’a la ka kɛ Sewarɛ-Moti furancɛ sira kan. O furancɛ in dilanni degun bɛ se mɔgɔ minnu ma, lafaamuyaliw bɛ sen na.

Siraw ka kan ka dilan dugubaw yɔrɔ minnu na, o gɛlɛya sababuba ye yɔrɔw maminɛni ye sigidalamɔgɔw fɛ ka baaraw bali ka kɛ u kɛcogo ɲuman na. O n’a ta bɛɛ, baaraw bɛ sen na, jama fana bɛ ka siraw taama. O siratigɛ la, minisiri b’a ɲinin mɔgɔw fɛ, u ka muɲun baaraw degun kɔrɔ yanni waati cɛ, sɔɔnin u bɛ ban. Cakɛda min ɲɛsinnen bɛ basigiko ma siraw kan (Anaser) o wasa donnen bɛ sigidalamɔgɔw lafaamuyaliw la sira dilanta ninnu kan.

Dɔkala Yusufu JARA

Baba KULUBALI

Babba COULIBALY