Zanwuyekalo tile 24 minisirilajε : Kati ni Zan Kulubali kominiw kɔneyejεkuluw cira, jatebɔba bεna kε sεnεko la

Kun jɔnjɔn minnu tun dantigεra lajε in kama, olu fεsεfεsεlen kɔfε, bεn kεra poroze dɔw waleyali kan, ka mɔgɔ dɔw sugandi ka bila jɔyɔrɔw la ani ka kumaɲɔgɔnyaw kε. Fεn min ye mara ni desantaralizasɔn minisiriso ani sεnε minisiriso fanfεlaw ye, waleya damadɔw kεra, an bεna olu ɲεfɔ.

Mara ni desantaralizasɔn minisiri ye minisirilajε ladɔnniya Kati ni Zan Kulubali kominiw kɔnseyejεkuluw cili la. Kabini furancεlafanga daminεna, gɔfεrεnaman bε k’a ɲεsin sigidaw mara lajεyali waleyaw ma ni ɲangiliw tali ye ka kɔnseyejεkuluw sεgεrε, minnu tε ka baara sariyaw labato, n’u ka wariko lajεyalen tε, hali k’a sɔrɔ kiiri ma boli u kan fɔlɔ.

O siratigε la, minisirilajε ye Kati kɔnseyejεkulu Kulukɔrɔ mara la ani Zan Kulubali kɔnseyejεkulu Dɔyila mara la, olu ci.

Cili in sɔrɔla sigidalamɔgɔw mako gεlεnw ɲεnabɔbaliya, majεw mara kεcogo la mɔgɔko ani wariko la sigida ninnu na.

Jεkulu kεrεnkεrεnnen bεna sigi teliya la a komini kelenna kunna ka tεmεn ni baara kεtaw ye.

Sεnε minisiri ye minisirilajε ladɔnniya jatebɔba la, min bεna kε sεnεko nasira la. N’a bε fɔ o waleya in ma tubabukan na « eresanzeman ». O jatebɔba in laɲinin ye ka kunnafoni jεlenw sɔrɔ wula kɔnɔ baaraw kunkan, sinsin bεna kε jate minnu kan don nataw la. O siratigε la, nin baara suguya ninnu de bεna kε :

- baara suguyaw kεbaaw bugunnatigεw ;

- baara suguya bεε kεbaaw tɔgɔ n’u bugunnatigε tɔw, an’u ka kεnεw mumε ;

- bagan suguyaw tɔgɔw kεnεw kan, u minyɔrɔw, ani mɔnnikεdagaw ;

- nakɔdayɔrɔw ani jiridenw sɔrɔyɔrɔw ;

- bagan hakε ;

- baara suguya kelenna kεbaa mumε bugunnatigε nimɔrɔw.

Jatebɔba sεnεko nasira la, o bεna kε kalo naani (04) kuntaala kɔnɔ, k’a daminε awirilikalo tile 1^lɔ la, ka taa a bila zuluyekalo tile 31 na san 2024. Mɔgɔ 6.195 bεna ta o baaraw kama ; mɔgɔ 4.760 bε jatebɔw kε, jatetebɔkuluw ɲεmɔgɔ bε kε mɔgɔ 860 ye, o kuluw kɔlɔsilibaaw bε kε mɔgɔ 255 ye, ani baganw jatebɔla 300 bε ta baganmarala dagalenw ni yaalataw jate dɔnni kama.

Dɔkala Yusufu JARA