Jamana lakananbaaw ka bala kɔrɔ kunun sɔgɔma jamanakuntigiso la Kuluba, furancɛlafanga jamanakuntigi Zenerali darimɛ Asimi Goyita min ye AES kɔnfederasɔn ɲɛmɔgɔba ye, a ye faso ani kɔnfederasɔn daraponw yɛlɛnni ɲɛmɔgɔya kɛ.
Nin koba in kɛra
minisiriɲɛmɔgɔ Zenerali de diwisɔn Abudulayi Mayiga, bulonba kuntigi Zenerali
de kɔri darimɛ Maliki Jawu, gɔfɛrɛnaman minisiriw, Burukina faso ni Nizɛri
lasigidenw, ka fara lasigiden tɔw kan, olu tun b’a kɛnɛ kan. Jamanakuntigiso
baarakɛla bɛɛ lajɛlen fana tun bɛ yen.
Furancɛlafanga
jamanakuntigi Zenerali darimɛ Asimi Goyita sera kɛnɛ kan nɛgɛ kanɲɛ 07 tɛmɛnnen
ni sanga 27 ye. Jamanakuntigiso lakanankulu (GSSP) ɲɛmɔgɔba Yitinan-Kolonɛli
Alifuseyini Ba ye yamaruya di daraponw ka yɛlɛn. Lakananbaaw tun kɛlen bɛ ka
kɛnɛ labɔ kosɛbɛ. An ka jamana fasa dalen kɔ, jamana lakananbaaw ka ɲɛnajɛkulu
ye AES kɔnfederasɔn fasa da ; Nin kɛra o siɲɛ fɔlɔ ye jamanakuntigi Goyita
ka jɔ daraponjiri kɔrɔ ka Kɔnfederali datɔ fo. Hakililajigin na, sahɛli
kungo jamanaw ka kɔnfederasɔn ye sariya ye jamanaw ni ɲɔgɔn cɛ, min sinsinnen
don taamasiyɛnw kan. Marisikalo tɛmɛnnen in tile 3 kɔnfederasɔn darapon yɛlɛnko
fɔlɔ kɛra. An bɛ don min na sinsinyɔrɔ saba bɛ AES la : Kɛnɛ kelen-Fasojama
kelen-Dakan kelen
Minisiriɲɛmɔgɔ ka fɔ la,
« sɔgɔma in na, an bɔra ka AES kɔnfederasɔn fasa da. Ne hakili la
taamasiyɛn saba ninnu nafa ka bon kosɛbɛ. U b’a to kɔnfederasɔn min ye sariya
ani labɛn ye jamanaw ni ɲɔgɔn cɛ, an ka se k’o sinsin waati kuntaala jan kɔnɔ,
a ka se ka lakodɔn n’a taamasiyɛnw ye. A ko ɲɛ ka yeli la, darapon in nafa ka
bon, taamasiyɛn in b’a to AES fasojama k’a yɛrɛ dɔn ni laɲinin jɛlenw ye. Fasa
tɛ dɔnkili gansan ye, cikanw de b’a kɔnɔ, minnu b’an danbew kofɔ, AES fasojama
bɛɛ b’a yɛrɛ ye minnu kɔnɔ. Ne hakili la nin fasa in dali bi, a wajibiyalen don
an AES fasojamaw ma, k’a minɛ n’an bolo fila ye ».
Zenerali de diwisɔn
Abudulayi Mayiga bolo, fasa in lamɛnnen kɔfɛ, AES sigibaaw senkan, u ka laɲinin
ye ka dusu don lakananbaaw kɔnɔ ka taa a fɛ kudayi. Ni nin fasa in ye, an y’a
faamuya ko AES ɲɛmɔgɔw ka yecogo la, an bɛɛ ye sɔrɔdasiw ye ka fara sɔrɔdasiw
yɛrɛ kan, sigidalamɔgɔw ani AES kɔnfederasɔn siwili tɔ bɛɛ.
Ka da Kɔnfederali ka cikan nafamaw kan, minisiriɲɛmɔgɔ ka fɔ la, u gansili bolodalen don kalanyɔrɔw la, ani yɔrɔ o yɔrɔ fasa in ka kan ka da minnu na. K’a daminɛ sɔgɔma in na ka kɛɲɛ ni AES jamanakuntigiw ka magɛlɛyali ye, an wajibiyalen don ka Kɔnfederali minɛ n’an bolo fila ye.
Dɔkala Yusufu JARA
Oumar DIAKITE
Sariya min tara ka yamaruya di, o sariyasen 2 bɛ politikitɔnw sigicogo an’u labaaracogo dantigɛ ka kɛɲɛ ni sariyasunba ye.
