Faso ka baarabolodalen danbew kalanni kama : Seginni laada kɔrɔw ma

Furancεlafanga jamanakuntigi Kolonεli Asimi Goyita kεtɔ ka faso ka baarabolodalen (Pnev) waleyali baaraw nun don kunun jamanakuntigiso lajεkεso kɔnɔ Kuluba, a y’a jira ko an sirilen don an danbew la, wa an ka kan k’u don ba la.

Baarabolodalen in bε Maliden kura dilan, min bε jɔ ko kɔrɔ, n’a bε kɔrɔlenw dɔn, fasoden ɲuman min bε fangabulonw bonya, baarakεla hakilima, min hakili dayεlεlen don, n’a bε a lamini fε ani ka baara kε bεε ka hεrε kama, ɲεtaa kanubaa don. Ka da nin mankutu ɲuman ninnu kan, furancεlafanga ɲεmɔgɔw bε ba don baarabolodalen in na.

Jamana jɔli kura minisiri ka ɲεsin gɔfεrεnaman ni fangabulonw cε koɲεnabɔ ma, o ka yamaruya kɔnɔ, baarabolodalen in labεnna kodɔnkulu dɔ fε, min sigira senkan san 2021 desanburukalo la, n’a ɲεmɔgɔya tun bε Ala m’an hinεna kalanko minisiri kɔrɔ Adama Samaseku bolo. Ala ka hinε minisiri kɔrɔ D^r Abudulayi Sali la, o fana tun ye kulu in mɔgɔ dɔ ye. O kodɔnkulu in dεmεnna a ka baara la minisiriso dɔw mɔgɔw fε, minnu ka ko bε baara in na.

Baarabolodalen in an danbew kalanni kama, o donni jamanakuntigi Kolonεli Asimi Goyita bolo, a kεra minisiriɲεmɔgɔ D^r Sogεli Kokala Mayiga, gɔfεrεnaman minisiriw, fangabulonw ɲεmɔgɔw, ani kodɔnkulu in mɔgɔw ɲεna, ka fara maaba caman wεrεw kan. 

Kodɔnkulu ka ciden Mohamεdi Salikεnε Kulubali ye ɲεfɔli kε baarabolodalen in labεncogo kan an’a laŋinin kan. A ka fɔ la, a dabɔra ka sinsinnan, ani kɔlɔsilikεlan sɔrɔ, kεrεnkεrεnnenya la, ka dεmεn don segincogo la an danbe kɔrɔw ma. Baara in kεra dakun jɔnjɔn naani kan, ka kuncε ni bεnkantalajε ye, sɔnni na baarabolodalen in ma. Sεbεn in dilanni bεnna jama makosεbε ; sabula olu minnu lamεnna a ko la, u ye laɲinin caman kε.

Ka fasoden kura dilan- Pr Ibarahimu Ncayi, ni kodɔnkulu mɔgɔ dɔ don, ale ye ɲεfɔli kε baarabolodalen in sinsinbɔlɔ 11 kan. A yɔrɔ nafamaw ye gεlεya minnu b’an ka jamana kan Mali kura laɲininw sɔrɔbaliya la. Jamana jɔli kura minisiri ka ɲεsin gɔfεrεnaman ni fangabulonw cε koɲεnabɔ ma, sanni a ka sεbεn in don jamanakuntigi bolo, a ye foliw kε fasokan dɔw la ; i n’a fɔ bamanankan, fulfulde ani kɔrɔbɔrɔkan ; an ka sariyasunba b’o waleyaw de kofɔ : « Waati tεmεnnenw tiɲε, waati bεε tiɲε ».  

Ibarahimu Ikasa Mayiga ka fɔ la, tiɲεw, danbew ani ɲεnamaya kεcogo, o bε Mali kɔnɔ a bε san kεmε caman bɔ, wa an ka kan ka fasoden kura dilan, min b’an sɔgɔ an danbew la kεlεkεlε. Minisiri ko, fasojama tariku kɔnɔ, ko dɔw bε dilanni kε ka da u cogoya kan an’u hakεya (valeur) kan, ka yεlεma ɲuman don hakili la ani hadamadenya la. A ye senkɔrɔmadonni kε, ko ka da nin baara in nafa kan, furancεlafan jamanakuntigi hami ye an ka segin an danbew, n'an ka ɲεnamaya kεcogo kɔrɔ ma. O jogo ɲuman ninnu mεεnna bila la bolo kɔfε, k’a sɔrɔ sinsin kεlen tun b’u kan an ka hadamadenya kɔnɔ fɔlɔ.

Fεn min ye baarabolodalen in dilancogo ye, minisiri Ikasa Mayiga ye foli kε a bolodacogo la. O b’a jira ko baara donna a dɔnbaaw bolo, minnu y’a tεmεnsiraw labato u ka baara kɔnɔ, fo ka se baaraw kuncεlen kiimεni ma. Jamana jɔli kura sinsinnanba don- O de kosɔn furancεlafanga jamanakuntigi ye sεbεn in kanu kosεbε. Jamanakuntigi ka fɔ la, Faso ka baaraboloda ka ɲεsin seginni ma an danbew ma, o ye koba ye, k’a dɔn ko an bε waati min na, o b’a kun bɔ, o y’an bεε haminanko fana ye. An danbew de b’an bugunnatigε, k’an ka sinima-sinima kow labεn

O cogoya in de y’an hami ye, k’an kuntilenna labεn Mali kura Jɔli kama ; sabula fasojama bεε ka diɲεnatigε bε labεn ka kεɲε n’u ɲεmɔgɔw hakililaw ani fasoden tɔw taw ye, ka kεɲε n'u sekow ŋaniyaw ye ɲεtaako la kannabila ani hɔrɔnya kɔnɔ. Danbeko tεmεnna hakililafɔ kan ; jamana sigikanw don, a ka muɲunni sekow b’a kɔnɔ, dayεlεli ka bila yεlεmaniw ɲε, o sekow fana b’a kɔnɔ. O siratigε la, Kolonεli Asimi Goyita y’a jira, ko nafa bε danbew la hadamadenya tεmεnsira bεε kɔnɔ, hali jamana jɔli kura. A ko faso ka baarabolodalen danbew kalanni kama, o ye seginni ye an bɔyɔrɔ ma ; n’o dun ma kε, sinikow bolodali bε sɔn ka gεlεya an ka jamana bolo a ka yεrεmahɔrɔnya yεrε-yεrε sɔrɔli la.

Danbe kɔrɔw ye mɔɔnɔbɔlan sεbεw ye faso bolo, k’a disi da gεlεya kεrεnkεrεnnenw furakεli la, minnu bε se k’a sɔrɔ. O siratigε la, jamanakuntigi ka fɔ la, a ka ɲi, ka hakililajigin kε, ko kalan min ye dɔnni motεrε ye, o ka kan ka sinsin an danbew kan, walasa ka da yεlε ka bila diɲε na, waati min na diɲε dugukoloko politiki kεlen bε dulokin cencenge ye, setigijamanaw sago ye ka min coron sentanjamanaw kanna, k’u bɔ u danbe kɔnɔ k’u kε suguya wεrε ye, u t’u yεrε dɔn min kɔnɔ. O la, nin baarabolodalen in ye jaabi ye, an ka se ka jamana jɔ kura ye ka kεɲε ni jamana ɲεmɔgɔw hakililaw ye. Danbew kalanni laɲinin kεra kosεbε sigikafɔba senfε jamana jɔli kura hukumu kɔnɔ, gεlεyaw fεsεfεsεlen kɔ.

Ka da nin kunw kan, Malidenw y’a kanu, segin ka kε an danbe ɲumanw ma Mali kura jɔli la. O siratigε la, walasa bεε sen ka don baara la, hadamaden suguya bεε hakililaw ɲininna fura sɔrɔcogo la bi mɔgɔw danbe tiɲεcogo la. Jamanakuntigi Kolonεli Asimi Goyita ye sεbεn in kanu ka da o fana kan ; sabula ko a b’an dεmεn k’an disi da sisan waleyaw la, kɔkanmɔgɔw bε k’a ɲinin ka minnu ɲɔni ka kε an kan. O siratigε la, furancεlafanga jamanakuntigi y’a jira, ko a tun bε ka ɲinin an bεε fε, an ka jɔyɔrɔ di fasokanw ma. O de la u kεra forobakanw ye Mali kɔnɔ, baara kεta minnu bε sen na k’olu waleya, ani minnu bεna kɔfε, k’olu fana waleya an danbew kalanni hukumu kɔnɔ.

Walasa ka se k’o kε, jamanakuntigi y’a ɲinin gɔfεrεnaman fε, a ka waleyaw kε, min b’a to jamanadenw k’a faamauya, ko an ka jamana mankutu duman walangatali ka taa a fε, o sirilen b’an wasa donni na an danbe kɔrɔw la, minnu y’an ka hadamadenya an’an ka seko ni dɔnko taamasiyεnw ye. Sabula jamanakuntigi bolo, faso ka baarabolodalen an danbew kalanni kama (Pnev), o bε jigisigi yeelen bɔ fasojama ye, an danbe kɔrɔw kununni kama. Olu minnu y’an sinsinnan ye, ka hakili ɲuman di fasodenw ma bi ani sini gεlεyaw kεlεli kama ; u kεra kɔkantaw ye walima kɔnɔtaw.

Umari JAKITE

Dɔkala Yusufu JARA