Kojugubakε kεlεli : Boli banna kojugubakεkulu « Daesh » kuntigi lakodɔnnenba Hugo bolo

Silamεjamana n’o ye Eta isilamiki ye, o kojugubakεkulu (Daesh) ɲεmɔgɔ Abu Huzeyifa n’a tun bε wele Hugo, a fagara Mali sɔrɔdasiw fε. O waleya in kεra taare ye kojugubakε kεlεli la an ka jamana kɔnɔ.

Jateminε na, Mali sɔrɔdasiw bε ka jamana dugukolo fan bεε don u sagoya la. Waleya min kεra karidon awirilikalo tile 28 san 2024, o bε seere bɔ. Hugo tun ye kojugubakεla dunanw dɔ ye Mali kɔnɔ. A fagara Mali sɔrɔdasiw fε Indelimani kεlεdaga la Gawo mara la.

Taamasiyεn minnu sɔrɔla a fari la, olu b’a sεmεntiya, ko siga t’a la Hugo don cɔyi. A tun ye ŋaniyajuguya dama min da sigidalamɔgɔw kan, ani AES sɔrɔdasiw kan, o ma dogo mɔgɔ si la. Hugo tun ye kojugubakεkulu « Daesh » ɲεmɔgɔba ye Mali, Burukina Faso ani Nizεri dancεw la.

Komando min ye dan kari Lamerikεnjamana sɔrɔdasi dan-kelen-bilaw la Tongo-Tongo, Nizεri jamana na san 2017, o kuntigi tun ye Hugo ye. Lamerikεnjamana sɔrɔdasi caman ni tora o la. O kεlen, Lemerikεnjamana tun ye sefawari miliyari 3,4 labila, mɔgɔ min mana se ka Hugo sɔrɔ k’a faga olu ka tajurusara ye. Ni min sera k’a faga, walima k’a ɲεnama lase u ma. Awirilikalo tile 27 san 2024, Mali sɔrɔdasiw ye dunan wεrε minε Tumutu mara kɔnɔ, siga kεlen don min na kojugubakε la.

Kunnafonisεbεn dɔ kεlen k’a lase awirilikalo tile 29 san 2024, ko kojugubakεkulu « Daesh » ɲεmɔgɔ Hugo fagara Mali sɔrɔdasiw fε, Lamerikεnjamana jamanakuntigi Jo Bayidεn y’a ka nisɔndiya jira o ko a kosεbε. A ye foli ni tanuni lase Mali sɔrɔdasiw ma o kunnafoni in sεmεntiyalen kɔ. Hugo fagali kεra ɲɔninba dɔ bɔlen ye Sahelikungo jamanaw sen na kojugubakε kεlεli la.

Hakililajigin na, kabini Mali sɔrɔdasiw ye fangasɔrɔ daminε furancεlafanga latilennen kɔfε, ka fara Kidali bɔɔsili kan kojugubakεlaw n’u dεmεnbaaw la nowanburukalo tile 14 san 2023, ka Mali dugukolo fan bεε lasɔrɔli nɔgɔya u bolo, kojugubakεkuluw ye jɔrε daminε. U ka kεlεcε caman fagara, ka caman fana ɲεnama minε. U ɲεmɔgɔ lakodɔnnenba caman b’o la.

I n’a fɔ Al-kalifa Sawuri, o fagara awirilikalo tile 19 san 2024 Duwekire ni Asarani furancεw la Tumutu mara kɔnɔ. Tile damadɔ o kɔfε, awirilikalo tile 12, Ali Seku n’a tun bε wele Jurayidi, o fagara Dongo, Yuwaru mara kɔnɔ. U kojuguakεla caman fagara o kεlεw senfε Lawuniya, Moti mara kɔnɔ yen. Kojugubakεlaw ɲεmɔgɔ dɔ fana tun ye Bura Lobi ye ka bɔ Tana dugu kɔnɔ, o n’a jεɲɔgɔn caman fagara marisikalo tile 18 san 2024 Niyabi jiritu kɔnɔ Duwazan mara la.

An ma ɲinε Hamajire Ba kɔ ; o fagara feburuyekalo tile 14 san 2024 Ndola kεɲεkayanfan fε, Kɔlɔdugu-kɔrɔ ni kεɲεka cε ka digi kɔrɔn kan ni km6 ɲɔgɔnna ye Segu mara la. A bε san saba bɔ, Kolonεli Asimi Goyita ka ɲεmɔgɔya kɔnɔ Mali kunna, an ka jamana bε k’a mεru don (ɲεsin) Irisijamana na sɔrɔdasiya nasira la, k’a bolo bɔ an marabaa kɔrɔ Faransi n’a jεɲɔgɔnw bolo. Furancεlafanga ɲεmɔgɔw y’o waleya min kε, o kεlen bε kunkɔrɔta ye sɔrɔdasiw ma kojugubakε kεlεli la.

Abubakari TARAWELE

Dɔkala Yusufu JARA