Jago ni iziniko minisiri Musa Alasani Jalo ni Mali jagoko n’a iziniko soba ɲεmɔgɔ Maju Sεnpara ye lajε laɲaga
Gɔfεrεnaman b’a fε ka sukaro tɔni 25.000 lamara a bolo kɔrɔ sukarodilan izini « Sukala » ani « N-Sukala » ka sukaro sɔrɔtaw la. O kunnafoni lasera araba desanburukalo tile 27 san 2023 jago ni iziniko minisiri Musa Alasani Jalo fε, a ni Mali jagoko n’a iziniko soba (Ccim) ɲεmɔgɔw ka lajε senfε.
Musa Alasani Jalo ka fɔ la, sanga ni waati bεε la, (Ccim) ni jago ni iziniko minisiri bε kumaɲɔgɔnyaw kε sɔrɔ yiriwali gεlεyaw ani jamanadenw haminanko gεlεnw kan. O la, ka kεɲε ni furancεlafanga jamanakuntigi Kolonεli Asimi Goyita ka cikan ye gɔfεrεnaman ma, ko a ka cogoya bεε kε ka jamanadenw haminanko gεlεnw don gɔfεrεnaman ka baara kεtaw cεmancε la.
Minisiri y’a jira kunnafonidilaw la, k’a ni jamana julabaw ka lajε in kεra o hukumu kɔnɔ. Mɔgɔ suguya wεrε ma ye a kεnε kan. Dabali fεn o fεn tigεlen don u ni ɲɔgɔn cε jεkabaara la, u jεra k’olu fεsεfεsε, walasa k’a dɔn, ni majε min bε yɔrɔ min na, ka dabali jɔnjɔn tigε o dalafali la. Gεlεya minnu dεnnen don iziniko ni jago yiriwali la, olu bε ta ba la a kɔnɔ.
Sinsin kεra jamana labɔli la dunfεn kεrεnkεrεnnenw na a ɲεma waati kuntaala jan kɔnɔ. O siratigε la, da sera fεnw sɔngɔw yεlεnniko ma ; o min bε sin ka mɔgɔnin kelenw kɔ kari yɔrɔnin kelen, kuma tε denbayatigiw ma ». Fεn min ye jamana labɔli ye sukaro la, o sεbεkɔrɔ fεsεfεsεra, kεrεnkεrεnnenya la sunkalo ɲεsigili la ; o min bε sɔn ka daminε marisikalo nata in kɔnɔ san 2024.
Mali jagoko n’a iziniko soba ye laɲininw ani furakεcogo minnu dantigε lajεba dɔ senfε, min kεra marisikalo tεmεnen in tile 30 ka se a tile 31 ma san 2023 Segu, kumaɲɔgɔyaw kεra o yεrε kan. O siratigε la, minisiri y’a jira ko jago ni iziniko minisiriso ye jεkulu kεrεnkεrεnnen dɔ sigi ka baara kεtaw boloda, k’u waleya waatiw dantigε.
Minisiri ko a wasara n’a ni (Ccim) ka lajε in ye ; ka da a kan a kεra hakilijakabɔ kεnε y’u bolo, ka ko ɲuman caman dajira ɲɔgɔn na gεlεyaw fεsεfεsεlen. (Ccim) ɲεmɔgɔ fana y’a jira ko layiduw tara jamana labɔli la a ɲεma ka tugu dunfεn kεrεnkεrεnnenw na san 2024 sunkalo tuntaala kɔnɔ.
Baba KULUBALI
Dɔkala Yusufu Jara
Vente de carburant.
Vente des produits phytosanitaires.
Sport/football.
Terrorisme à Kita.
Salon des armements.
Annulation du pèlerinage.
