Mali ni Moritani ye balontan 8 minnu kε, Sεgεw ye 7 sebaaya ta, 1 kεra filaninbin ye
Mali degelikaramɔgɔ ye yεlεmaba don ntolantannaw cogoya la. A y’a wasa don denmisεn caman na, minnu bεna u ntolantanko fɔlɔ kε Sεgεw fε.
O bεnna sen ma ; sabula sεbεnw kɔnɔ, a tun jiralen bε ko Moritani bɔgɔ ka fεgεn Mali kɔrɔ.
O faamuyali ka nɔgɔ, n’i ye jatebɔ kε u ka ɲɔgɔnsɔrɔw cogoyaw kan. I b’a ye ko Mali ni Moritani kunbεnko 31 na, Mali ye 21 sebaaya ta, 6 kεra filaninbin ye, Moritani ye Mali gosi siɲε 4. U ye ɲɔgɔnsɔrɔ fila minnu kε kɔsa in na KANI 2019 ani 2021 Eziputi, Mali y’a gosi 4 ni1. Abudulayi Jabi sanga 37nan, Musa Marega sanga 45nan, Adama Tarawele «Noss» sanga 50nan, ani Adama Tarawele «Maluda» sanga 74nan, o biw donna. Ka sɔrɔ k’a da kameruni kan 2 ni 0. Masajo Hayidara ani Ibarahima Kɔnε kεra o biw donbaa ye.
Sεgεw ka sebaaya tun ye 7 ye Moritani Morabituni kan (sebaaya 6 ani filaninbin 1). Nka u y’a dafa sebaaya 8 na jumadon. Degelikaramɔgɔ tun y’o layidu ta sanni u bε pan ka taa Marɔku ; ka sɔrɔ k’u sigi ka Nizeriya makɔnɔ.
Degelikaramɔgɔ ye denmisεn kura minnu wele Mali ni Moritani ka balontan na, olu ye Ibarahimu Jara « Africa foot » cεmancεmɔgɔ (Bamakɔ faaba D2). Ale de tun ye U17 ntolantannaw ɲεmɔgɔ ye. A y’a jira ko a wasalen don k’a yεrε ye a kɔrɔw cεla nin sen in na Moritani ani Nizeriya kunbεnni na. A ko a ka nisɔndiya ka bon ; sabula an bε dankan min na, jamana bεε b’a ɲinin ka jɔyɔrɔba sɔrɔ. O siratigε la, ale bεna a yεrε di kosεbε, min b’a to a sugandili kana kε nimisa ye degelikamɔgɔ bolo.
Hakililajigin na, Moritani yera KANI saba tεmεnnenw kεnε kan, fo a delila ka Alizeri gosi 1 ni 0 kuluntolantan dɔ la, ani ka sebaaya sɔrɔ ka se wicεmudefinali la. O de kosɔn Hamari Tarawele n’a tɔɲɔgɔnw m’a diya u bolo jumadon tariyantolantan na.
Moritani gosilen kɔfε 2 ni 0, Sεgεw bε Nizeriya Sεgεbaw bisimila « 26Mars » ntolantankεnε na a ka tariyabalontan filanan na sini tarata marisikalo tile 26 san 2024. Nizeriya ni Kɔnɔwari de ye KANI tεmεnnen in finali tan. O y’a gosi 2 ni 1.
Ibarahimu DANBƐLƐ et
Dɔkala Yusufu Jara
Visite du PM du Niger.
Réflexion sur la démocratie.
Transfert de compétence.
Semaine nationale de l'harmonisation des symboles de l'Etat.
Vote de loi de finances 2026.
Rencontre sur l'AES.
