Balo ditɔ dεsεbaatɔw ma Gawo Kolonεli Asa Bajalo Ture fε
Ɲɔgɔn dεmεnni, ɲɔgɔn bolomagεnni ani tilali, olu ye an danbe kɔrɔw ye an ka hadamadenya ni mɔgɔya kɔnɔ. A bε dɔn an ka don o don kεwalew la ka ɲεsin ɲɔgɔn ma. An ka hadamadenya yεrε de sinsinnen b’u kan o tε bi ko ye. Dεmεnni hakilila min b’an na ka ɲεsin an mɔgɔ ɲɔgɔn dεsεbaatɔ ma, dɔ bε fara o fanga kan musakababɔw waatiw la ; i n’a fɔ seliw, silamεw ni kerecεnw ka sunw.
O ɲɔgɔndεmεn ni tilali waatiw bεnna ni gεlεya ye ɲinan ; kεrεnkεrεnnenya la funteniba, kurantigεba ani faantanya Malidenw na. Nin gεlεya bεε faralen ɲɔgɔn kan, a tε ɲε ni fura jɔnjɔn ma sɔrɔ k’u latεmεn. O de kosɔn, jamana ɲεmɔgɔw, ani mɔgɔ dɔw y’a ŋaniya, ka ko bɔ u yεrε la, ka yεlεda di u mɔgɔ ɲɔgɔnw ma, minnu mako bε dεmεn na.
O siratigε la, furancεlafanga jamanakuntigi Kolonεli Asimi Goyita ye waleyaw kε, minnu bε dɔ bɔ dεsεbaatɔ dɔw ka gεlεya la. Hakilila in tara o min kama, sunkalo ɲɔgɔndεmεn hukumu kɔnɔ, balo tɔni 150.000 bεna tila jamana marayɔrɔ 19 ani Bamakɔ faaba dεsεbaatɔ dɔw cε ; ɲɔ, malo, ka fara dunfεn suguya wεrεw kan, olu don. A dili daminεna kabini marisikalo tile 12 san 2024, Saaba tεrεn na Lafiyabugu, Bamakɔ komni 4nan na, mara ni desantaralizasɔn minisiri Kolonεli Abudulayi Mayiga fε.
Bamakɔ kominiw y’u ta sɔrɔ sibiri kalo tile 16. Baara in dɔgɔkun fɔlɔ kɔnɔ dunfεn 42.000 ni kɔ dira suntigε ye yɔrɔ 18 na Bamakɔ komini 6 mumε kɔnɔ ani yɔrɔ 6 la Kati dugu kɔnɔ. Kati ni Bamakɔ cε ye km15 ɲɔgɔnna ye. Silamεw ni kerecεnw y’u niyɔrɔw sɔrɔ kalo tile 18 Hijiso la diinεkow minisiri Dr Mahamadu Kɔnε bolo.
Mara ni desantaralizasɔn minisiri Kolonεli Abudulayi Mayiga ye dantigεli kε dunfεnw dili daminεni kεnε kan. A ko sunkalo ɲɔgɔndεmεn bε bila gɔfεrεnaman ka baara kεtaw hukumu kɔnɔ, furancεlafanga jamanakuntigi Kolonεli Asimi Goyita ka ɲεmɔgɔya kɔnɔ. A dabɔra ka ɲɔgɔn bolomagεn nin waati gεlεn in na. A ye foli lase jamanadenw ma u ka muɲun ni sabali la gεlεyaw kɔrɔ. A labanna ka jigisigi kuma fɔ ; ko gɔfεrεnaman b’u kɔkɔrɔ k’u dεmεn gεlεya ninnu tali la.
Bolomadεmεn minnu dira diinεmɔgɔw ni kominiden tɔw ma, a diyara u ye a bεnna u ma. Diinεko nasira la, sunkalo jatelen bε k’a kε ɲɔgɔn dεmεnni kalo ye. U ye Ala deli nin ka kε a daminε ye, a kana kε a laban ye ka ɲεsin dεsεbaatɔw ma, ka laban ka layidu ta, k’u bεna fεn sɔrɔlenw tila koɲuman bεrεmakεɲε kɔnɔ.
Jamana ɲεmɔgɔw ka dεmεn kɔfε, mɔgɔ wεrεw fana y’u seko jira ka ɲεsin u mɔgɔ ɲɔgɔnw ma. Nin waleyaw de ye siman ye ka hadamadenya kala, k’an tin don ɲɔgɔn na ka taa a fε. An b’a ye tuma caman na kerecεnw fε, suntigε mana surunya, u bε bɔ ka gilasi di silamε sunbaatɔw ma.
Bamakɔ kɔnɔ, suntigε waati la, i bε mɔgɔw ye ka sun tigε ɲɔgɔn fε sirabadaw la. Dɔw fana b’u ka mɔbiliw jɔ ka sunnakari bɔ ka di tεmεnbaaw ma ; n’o ye dumuniw, minfεnw, gilasi. Nin bεε kun ye mɔgɔw ka se ka sun tigε cogoya ɲuman na k’u to yɔrɔ o yɔrɔ la. Hakilila caman wεrεw daminεna sunkalo ɲɔgɔndεmεn hukumu kɔnɔ. N’o ye nɔgɔya donni ye dumuniko la. O hakilila in bɔra dunkafa sabatili komisεri Ereduwani Agi Mohamεdi Ali la. O ɲεsinnen bε dεsεbaatɔdu 600 ni kɔ ma.
Ka fara nin bεε kan, jabεti ni jolicayabana lajεli fu la, o don kεrεnkεrεnnenw bε sen na, ani ka tile forobayeele (lanpadεri) 9.000 sigi Bamakɔ ni marayɔrɔ tɔw la ; kɔrɔlenw labεnni ani kuraw sigili b’o la.
Mohamεdi JAWARA et
Dɔkala Yusufu Jara
Mali furancɛlafanga jamanakuntigi Zenerali darimɛ Asimi Goyita, tarata, sariya n°2025-029/ min tara zuluyekalo tile 08 san 2025 yɛlɛma donni na furancɛlafanga taabolo la, o waleyali yamaruya di, a ma dɔgɔkun kelen bɔ bulonba jɛnnen kɔ n’a ye..
Ala kana a kɛ, n’o tɛ ni jisonko kɛra, denbaya dɔw bɛ u sigiyɔrɔw bila. Dɔw yɛrɛ fana b’u sigi ka Ala makɔnɔ, ko a mana ɲɛ cogo min na.
Taamako cakɛdaw ka fɔ la, kasaara seereyasɛbɛn (PV) dilanni de bɛ waati jan ta. O de kosɔn k’u bɛ se ka dɔ da kalo kan tuma dɔw la fo ka se san ma, k’a sɔrɔ asurelen ma bila a hakɛ kɔnɔ.
Denmisɛnw bɛ ka kalan bila ka firi Kɔfilacɛ damanda kan Kangaba sɛrɛkili kɔnɔ kosɛbɛ sisan. Cɛmannin fara musomannin kan, u kɛlen bɛ ka Kɔfilacɛ damandaw fa tewu digɛn senni ani damanbɔgɔw koli kama sanu nɔfɛ. U bɛ firi dugukolo jalan kan i ko fɛn wɛrɛ, k’u jigi dalen to sa.
Kow gɛlɛyara Mali bolo. An tɛ se k’a fɔ fɔcogo wɛrɛ la n’o tɛ, Mali dɛsɛlen kɔ Santarafiriki la 0-0 kunun ntɛnɛn marisikalo tile 24 san 2025, kupudimɔni san 2026 ɲɛbila ntolantanw tile 6nan hukumu kɔnɔ.
Taamasiyɛnnanw jɔra Bamakɔ ani jamana marayɔrɔ caman faabaw la k’a daminɛ san 1992 la, walasa ka hakililajigin kɛ Malidenw ka wulikajɔba la demokarasi nɔfɛ.
