Sɛnɛ minisiri Daniyɛli Simeyɔn Kelema ye jamana woroduguyanfan Sɛmudete ka sɛnɛkɛmara (Sikaso ni Bugunin) yaala sɛtanburukalo tile 6 ka se a tile 8 ma san 2024. A kɛra sababu ye a ni yen sɛnɛkɛlaw ka ɲɔgɔn ye ani ka forow cogoyaw dɔn. A Sɛmudete ɲɛmɔgɔw, sɛnɛ fɛɛrɛkow ɲɛmɔgɔw, ka fara sɛnɛkɛjɛkuluw ka cidenw kan, u ye lajɛ kɛ Sikaso lotoliba dɔ la. Sɛmudete ɲɛmɔgɔba Mamadu Musutafu Jara, Mali sɛnɛkɛso (Apcam) kuntigiba Sanusi Buya Sila ani Mali kɔɔrisɛnɛnaw ka tɔnba (C-SCPC) ɲɛmɔgɔ Yakuba Tarawele tun b’a kɛnɛ kan.
A lajɛ senfɛ, da sera gɛlɛya dɔw ma ; i n’a fɔ juru lasɔrɔbaliya, angɛrɛ dɔgɔyali, kɛrɛnkɛrɛnnenya la sumanw taw, tilemafɛsɛnɛ ji sɔrɔbaliya. U da sera baarakɛminɛndɛsɛ fana ma. Tuma dɔw la o minnu bɛ sɔrɔ, o tɛ kɛ laɲinin ye, ka fara kumaɲɔgɔnya ntanya kan baara kɛbaaw cɛ.
Sɛmudete ka san 2024-2025 kanpaɲi, jamana woroduguyanfan fɛ, o daminɛna gɛlɛya kɔnɔ ; i n’a fɔ samiyɛ donbaliya joona. Jamana woroduguyanfan Sɛmudete ɲɛmɔgɔ Mamari Berete ye ɲɛfɔli kɛ gɛlɛyaw kan, minnu y’u sɔrɔ danni waati la ; i n’a fɔ Bugunin sɛnɛkɛmara kɔnɔ. Zuwɛnkalo tile 30 y’a sɔrɔ foro taari 263.029 sɛnɛni daminɛna, o tun ye 82,97% waleyale ye laɲinin na. Sɛnɛkɛlaw n’u bilasirabaaw ka wulikajɔw sera ka kɛ sababu ye laɲinin ka se ka sabati ni foro taari 307.475 sɛnɛni ye kɔɔri la (97%), taari 295.973 kaba la (105%), taari 76.737 saɲɔ na (106%) ani taari 109.015 keninge la (84%).
O ɲɛtaaw n’u ta bɛɛ, angɛrɛ de ma se ka sɔrɔ a tuma na. Jamana woroduguyanfan ye 95% sɔrɔ a ka ɲininnen na kɔɔri la, 99,99% sumanw na ani 102% ure la. U dun fanba ma sɔrɔ joona.
Kɔɔriforo 45% tun furakɛlen don siɲɛ naani, kasɔrɔ 9% tun dɔrɔn ye furakɛliko duuru sɔrɔ. O siratigɛ la, siran kɛlen don sababu fila ɲɛ kanpaɲi sabatiliko la. A fɔlɔ ye sanjiba nata ye kabini utikalo tile 10, ka tɛmɛn milimɛtɛrɛ 120 kan tuma dɔw la, ka forow kuntunun ji la. Utikalo banwaati la kɔɔriforo taari 4.789, kabaforo taari 1.125, saɲɔforo taari 262 ani keningeforo taari 323 tun dajira sanji fɛ. Jɔrɛnanko filanan ye bana dɔ ye sɛnɛfɛnw na ; kɛrɛnkɛrɛnnenya la Kiɲan, Niyɛna ani Sikaso maraw kɔnɔ ; nka wuliajɔw tun bɛ sen na a kɛlɛli la. O baaraw n’u ta bɛɛ, Mamari Berete k’a jigi ma tigɛ ; sabula ko kɔɔrikoloma tɔni 293.500 ka kan ka sɔrɔ ɲinan ; kasɔrɔ salon, dɔwɛrɛ ma se ka sɔrɔ tɔni 248.360 kɔ ; wa ko dunkafa bɛ sɔn ka sabati ni suman tɔni 433.151 sɔrɔli ye ka bila bolo kɔrɔ dunta kɔfɛ.
Sɛnɛ minisiri k’a wasara ni sɛnɛkɛlaw ka fɔlenw ye ; nka a y’a jira u la, ko gɛlɛya bɛɛ tɛ se ka furakɛ a 100% na. Daniyɛli Simeyɔn Kelema ko kanpaɲi waleyali n’a nɔgɔyaw an’a gɛlɛyaw don, ko ni jɛ kɛra ka hakilijakabɔw kɛ, a ka ca a la, laɲininw bɛ sabati. A labanna k’a ɲinin jamanadenw ka ɲɔgɔn dɛmɛn, ji ye tiɲɛni don minnu kun, k’u bolomagɛn.
A y’a ɲinin
sɛnɛkɛlaw fɛ, u
k’u hakili to metewo ka laadilikanw na sanjiko la. Ni ɲinan
tɛ, san caman sɛtanburukalo
b’a sɔrɔ sanjiko dɔgɔyara,
kasɔrɔ
halibi sanji nata tɔba bɛ kɔfɛ fo
ka se nowanburukalo ma, hali ni tilejɔw bɛ kɛ a kɔnɔna na.
O siratigɛ la, a b’a ɲinin
sɛnɛkɛlaw fɛ, u
k’u hakili to u yɛrɛ la
kosɛbɛ.
Daniyɛli Simeyɔn Kelema
sinssinna fɛn min kan kosɛbɛ, o
ye sɛnɛfɛn
suguya labaaracogo, sɛnɛfɛn sɔrɔtaw
ladoncogo an’u sannifeere kɛcogo
ye. Bɛɛ k’a jɔyɔrɔ fa koɲuman
a ko kɔnɔ, i
n’a fɔ a bɛ ka kɛ kɔɔriko la
cogo min na, min b’a to waribatigiw bɛ
saman an nɔfɛ.
Sɛmudete ɲɛmɔgɔba sinsinna tuguni, baaraw kɛwaati labatoli kan forow furakɛli la ni fura ɲumanw ye, kɔɔri ɲuman fana ka se ka sɔrɔ. Mamadu Musutafa Jara ye ɲɛfɔli kɛ, ko ni nin taabolo kofɔlenw labatora, kɔɔriko bɛ sɔn ka kɛ wasa ye. A ko a ɲuman dɔ fana ye ka suman suguya sɛnɛta caya dunkafa sabatili nasira la. O de kosɔn Sɛmudete bɛ kabasɛnɛ senkɔrɔmadon kosɛbɛ.
A y’a jira fana, ko
nafaba bɛ kɔɔri bɔli la
tuma na, sanji kɔsaw kana a tiɲɛ, sabula
kɔɔri ɲuman
bɛ wari min sɔrɔ tiɲɛnen
t’o sɔrɔ sanniyɔrɔ la.
Dɔkala Yusufu JARA
Amadou GUEGUERE
O foroba kalansow ni kɛnyɛrɛyew jɔyɔrɔ ka bon bi kosɛbɛ baaradege la denmisɛnw fɛ.
