Mali : Sɔrɔdasiw sεnsεnna ka se Kidali donda la

Mali sɔrɔdasiw ɲεmɔgɔso ka kunnafonidi cakεda « Dirpa » ye laseli kε kunun ntεnεn nowanburukalo tile 13 san 2023, ko sɔrɔdasiw ka setigiya taama kɔnɔ ka da u ka mugu fanga kan sanfε ani duguma, yɔrɔ caman yεlεmana u ka bolo kan ka bɔ kojugubakεlaw bolo. Kojugubakεlaw dagayɔrɔ tɔnin minnu bε ka kɔlɔsi, o karangakogo bεε b’a la bin kelen-kelen.

Kojugubakεlaw bε yεrεɲininboli la Mali sɔrɔdasiw ɲε. O la ɲεtaa bε ka kε jantonyεrεla kɔnɔ, u kana u sabaatɔɲinw kari u la. Nin gεrεntεba min filε kojugubakεla ninnu da la, Mali sɔrɔdasiw ɲεmɔgɔso b’a ɲinin sigidalamɔgɔw fε, a k’u hakili sigi, wa dusukasi fosi kana u bila ka wuli fana ka mɔgɔw bolofεnw tiɲε Kidali dugu kɔnɔ.

Mali gɔfεrεnaman tεgε dali Kidali kan kokura, o bεna a to dansagonwale minnu tun bε sen na, fu ka siri olu dan na ; sabula fεn bεε santa tun bε sɔrɔ kojugubakεla ninnu bolo : mɔgɔ,marifa, dɔrɔgu, taji, sigarεti… Kidali kε a damana jamana ye Mali kεrεfε, sɔrɔdasiw y’o kuma ban pewu

Hakililajigin na, sɔrɔdasiw bε sεnsεn na ka Kidali dugukɔnɔna sεgεrε. Sira fε, u b’a la ka kojugubakεlaw folongoto u dagayɔrɔ dogolenw na u ɲε. U bε k’o baaraw kε ni ɲεmajɔba ye. Minusima taatɔ tun ye bilende min to kojugubakεlaw bolo, o tun falen don mugu jugu la tewu ; sɔrɔdasiw y’o bon k’o tiɲε. Mugu fanga sanfε ani duguma, o sera k’a to sɔrɔdasiw ka dan kari kojugubakεlaw ka karangakogo kɔlɔsilenw na.

Kεlε bε dakun min na sisan, a fanba sinsinnen don kunnafoniw kan ; ka kunnafoni jεlenw ni kolonw fεsεfεsε ka bɔ ɲɔgɔn na. Fεn o fεn ye sɔrɔdasiw lagosiko ye, k’i yεrε tanga ka bɔ o ma. O n’a ta bεε, sɔrɔdasiw ɲεmɔgɔso ye jigisigikuma fɔ sigidalamɔgɔw ye, ko sɔrɔdasiw bε hakilimaya baara de la Kidali sεgεrεli kɔnɔ. Wa dabali bεε tigεlen don u bolo u ka baaraw kɔlɔlɔ jugu kana yεlεn mɔgɔ wεrεw la.

Kidali minεni kojugubakεlaw n’u jεɲɔgɔn jugu marifafeerelaw ni dɔrɔgufeerelaw la, o ye laɲininba ye furancεlafanga ɲεmɔgɔw fε ; wa sɔrɔdasiw b’o sabatili sira kan.

Minusima y’a dagayɔrɔ min labila kojugubakεlaw ye Kidali ka kɔn a bɔli sarati dafali ɲε, n’a tun ka kan k’o to Mali sɔrɔdasiw ka bolo kan, o de nana ni Kidali minεni sennateliyali fana ye. Kojugubakεlaw n’o ye kεlεjεkulu CMA n’a jεɲɔgɔnw ye, u ye Minusima dagayɔrɔ maminε u yεrε ye, k’a minεn nafama bεε ta.

Nin bεε kεra diɲεmaa ɲεna mɔgɔ si ma kala don a ɲin na ka bεn ni Minusima k’o kεwale jugu ye Kidaliko la ; kasɔrɔ diɲε tɔnba ONU ka basigi satilijεkulu ka sariya 2690 b’a sεmεntiya, ko ni Minusima b’a dagayɔrɔ min labila, a k’o latεmεn Mali sɔrɔdasiw ma. Minusima yεrε y’o sariya sɔsɔ n’a ŋaniya ye.

N’o tε, k’a ta utikalo tile 1^lɔ ka se a tile 31 ma san 2023, a dagayɔrɔ minnu tun bε Ogosagu, Gundamu ani Menaka, a y’olu latεmεn Mali sɔrɔdasiw ma basigi kɔnɔ. Nka k’a daminε sεtanburukalo tile 1^lɔ la, ni bɔlibaaraw tun ka kan ka kuncε desanburukalo nata tile 31 ma, gεlεyaw de daminεna a dagayɔrɔw latεmεncogo la. Tesaliti, Agelihɔku, Ansɔngo, Kidali ani Duwazan, olu tun ka kan ka latεmεn Mali sɔrɔdasiw ma o furancε kɔnɔ. Nka kojugubakεlaw n’u dεmεnbaaw wulila k’u jɔ, k’u bε sira da u ɲε o yɔrɔw lasɔrɔli la. Tiga ma don a na na. Sɔrɔdasiw ye bɔrɔntɔli min da u kan, o ma kε dɔɔnin ye.

Minusima dagayɔrɔ min tun bε Bεri, o lasɔrɔli kεra mugu ni kisε dan bεε ye. Mali sɔrɔdasiw y’o kεlε da to u la. Ɔkutɔburukalo fana kɔnɔ kojugubakεlaw y’a ɲinin ka sira da sɔrɔdasiw ɲε Anefisi lasɔrɔli la. O fana janjon ma diya u la. O si m’u bolo jigin. Pankurunw taatɔ Mali sɔrɔdasiw jigin Tesaliti, u ye mugu wuli k’a ɲinin k’u jiginni bali. Nka sɔrɔdasiw y’u kɔmunun u kama, k’u bon k’u tiɲε, ka jigin Tesali u fεrε ma.

Fεn min tora malidenw ye bi, i n’a fɔ minisiriɲεmɔgɔ D^r Sogεli Kokala Mayiga y’a jira cogo min na, o ye ka wuli k’an jɔ an ka lakananbaaw ani furancεlafanga ɲεmɔgɔw kɔkɔrɔ.

Abubakari TARAWELE

Dɔkala Yusufu JARA