An b’a mɛn kosɛbɛ an ka kumaw na, ko “kanɛmɛmusow dara
kanɛmɛkɛw kama”. O ye kuma ye, min bɛ baliyafuru kofɔ. Wa a furu suguya ninnu
ye mansaw de ka ko labɛnnenw ye, ka se ka balimaya tugu ka taa a fɛ. Nka waleya
in kuma ka ca bi, dugubaw kɔnɔ ; hali wula yɛrɛ kɔnɔ.
Mariyamu (o ye tɔgɔ singalen ye), furula a kanɛmɛkɛ ma. A y’a jira k’u mansaw de b’a la ka gɛrɛntɛ sigi u kan, walasa u ka sɔn ka ɲɔgɔn furu. U ko muso ka furu a kanɛmɛkɛ ma ; wa ko cɛ fana ka jɛn n’o ye, min b’a to du fila in kalalen bɛ to ɲɔgɔn na. Nka ale bolo, o ye dansagon ye ; sabula, a furu suguya caman ka telin ka laban nimisa la.
Muso san 25 in ka fɔ la, a ka ca a la, kalo damadɔ kɔnɔ, nimisa bɛ daminɛ fan
fila fɛ, fo a bɛ se ka laban furusa la, ka da a kan u tɛ ɲɔgɔn fɛ. I b’a sɔrɔ
dɔ tɛ fosi kalama a furuɲɔgɔn lahalaya la. Ale b’a yɛrɛ ɲininka, munna nin furu
suguya bɛ ka ta ba la halibi an sigida la, kasɔrɔ an b’a dɔn ko don janya o
janya, a bɛ se ka laban furusa la, ka duw kɔ don ɲɔgɔn ma.
Inna, (o fana ye tɔgɔ singalen ye) ; ale ye du dɔ denbatigi ye. Ale ɲininkalen telefɔni fɛ, a y’a jira ko balimafuru 10 na, kelen dɔrɔn de bɛ se ka mɛɛn si la. Sabula bi, denmisɛnw de bɛ ɲɔgɔn sugandi ; nka, o n’a ta bɛɛ, gɛlɛya bɛ yen, kuma tɛ furu labɛnnen ma balimaw cɛ. O de kosɔn ale b’a ɲinin denmansaw fɛ, u ka laadafuru suguya in kolokololi dabila.
Binta Bokumu tun sigilen b’a ka kalalikɛso kɔnɔ Hipodɔrɔmu na Bamakɔ komini 2nan kɔnɔ. A y’a jira k’ale bɔra balimafuru fila la. O furu fɔlɔ kɛra san 2010 waati la, a kanɛmɛkɛ dɔ kun. A k’ale somɔgɔw fɛ, furu ɲuman don, sabula cɛ in ye mɔgɔ masumannen ye, wa a darɔko man ca. Nka a tun bɛ dɔlɔ min. A tun b’ale gosi sanga ni wati bɛɛ la. Don dɔ yɛrɛ la, a y’ale gosi fo k’a kininbolo kari.
O de kosɔn ale wajibiyara k’a furu sa ka bɔ a kun, du fila ninnu ka wulikajɔw
n’u ta bɛɛ, k’a ɲinin ka bɛn sɔrɔ a ko la. San fila furusa kɔfɛ, Binta Bokumu
ko ale furula a kanɛmɛkɛ wɛrɛ ma, min tun bɔra tunga la Alimaɲi jamana na, ka
na a ka lafiɲɛbɔ kɛ Bamakɔ yan ; nka ale y’a kɔlɔsi, ko kulusijalagosi b’a
la. Fɛn min juguyara n’a bɛɛ ye, a y’ale ka sanu bɛɛ sonya ka tunun sɔgɔmada
kelen san 2012 kɔnɔ. Sisan ale bɛ musoganaya la kannabila kɔnɔ. A bɛ jago
misɛnnin kɛ, wa kalalikɛso b’a bolo k'a mansaw bolomadɛmɛn.
LAƝININW TƐ KELEN YE- Abudulayi ni Laliya Sɔ furulen don ɲɔgɔn ma kabini zuwɛnkalo tɛmɛnnen in tile 21. U sigilen bɛ Lafiyabugu Bamakɔ komini 4nan na ; kanɛmɛmaw don. U bɛnkɛ Umaru Sɔ de ye furu in laɲinin k’u cɛ, u fana jɛnna n’a ye. A k’o y’a jira u la, k’u ka furu ɲɔgɔn ma k’o de nafa ka bon, sabula k’a bɛ u ka duw tin don ɲɔgɔn na ka taa a fɛ. A ko a b’a to fana, du nafolo kana bɔ ka taa du wɛrɛ kɔnɔ u ni min tɛ kelen ye. Ko mɔgɔ man kan ka don dunanfuru la ; sabula bana dogolenw bɛ yen, wa a bɛ se ka kɛ jogow tɛna ɲɔgɔn ta. Ko ka da nin kun ninnu kan, balimafuru ka ɲi.
Mɔgɔ ɲininkalen caman y’a jira, ko balimafuru yɛrɛ de y’an ka duw gɛlɛya fanba ye. Alima Jabi fana y’a ta ɲɛfɔ. A k’ale sɔnna a kanɛmɛkɛ ka furu ma san 2019, a mansaw ka laɲinin kosɔn. Nka ale tun t’a dɔn ko dilannabana bɛ tungaranke in na. A ka bana yɛlɛmana ale fɛ kabini u ka furu donnen san fɔlɔ kɔnɔ. Halibi a b’o furakɛli la. O de kosɔn, ale t’a ɲinin mɔgɔ si fɛ, a ka sɔn balimafuru ma.
Aliyu Jalo ye dutigi ye ; ale y’a jira ko balimafuru caman bɛ laban duw kɔ donni na ɲɔgɔn ma. A k’ale yɛrɛ y’a denmuso di a balimamuso denkɛ ma furu la. O de kosɔn a bɛ dɔ dɔn a ko la. A ko n’u kɛlɛla tuma o tuma, ale balimamuso de b’a denkɛ lafasa. A ma ɲɛ min kɔ, ale yɛrɛ farala a denmuso kan. Nka, furu in ma se ka laban, a sara. Kabini o don fo bi, ale balimamuso n’a furucɛ tɛ kuma ale fɛ bilen ; hali u sen tɛ bila ale bara.
Modibo Ture ye hakililakow dɔnbaa ŋana ye ; a ka fɔ la, an ka jamana kɔnɔ, hakililaw yɛlɛmana. kanɛmɛ fɛ furu tɛ ko duman ye tuguni. Cɛ ni muso hakɛ ka ca dugukolo kan cogo min na, yɛrɛfuru tɛ bɔda ɲuman ye duw bolo bilen. Mɔgɔ bɛ se k’a nikanu sɔrɔ fan bɛɛ fɛ ; nafa b’o furu suguya de la. Mɔgɔw bɛ se k’u ka duw kalalen to ɲɔgɔn na ni balimafuru tɛ.
Wa denmisɛnw yɛrɛ tɛ balimafuru kanubaaw ye bi, ka da
a gɛlɛyaw kan duw ni ɲɔgɔn cɛ. Denmansa caman, kɛrɛnkɛrɛnnenya la duguba kɔnɔ, olu
b’a kanu u denw yɛrɛ ka bɛn furuko kan fɔlɔ. Sabula mɔgɔ caman y’a faamuya, ko
an bɛ san kɛmɛ mugan ni kelennan (21èS) kɔnɔ. O b’a jira ko kanɛmɛmusow ma da
kanɛmɛkɛw ye, sabula hakililaw tɛ kelen ye.
Fɛn min kɔni jɛlen don, an tile ni an bɛnbaw tile tɛ kelen ye ; ka da kan, olu ka waati la, ni mansa ko min, o de don, wa a bɛ to o de la. Nka bi, mara tiɲɛnen an bolo, mɔgɔ ka kan k’i yɛrɛ ɲininka, ni nafa bɛ laada kɔrɔ in labatoli la bilen.
Dɔkala Yusufu JARA
Djeneba BAGAYOGO
-.
U gosira 2-0 Sɛnɛgali fɛ u bɔko fɔlɔ la. O siratigɛ la, Mali ka ko b’a yɛrɛ bolo kari nata in sɛtanburukalo tile 22. A ni Ganbi de bɛna ɲɔgɔn sɔrɔ nɛgɛ kanɲɛ 16 waati la, Mɔrɔbiya Antuwanɛti Tubuman tɔgɔla farikoloɲɛnajɛkɛnɛ na. Ka sɔrɔ kow bɛ sɔn ka nɔgɔya dege.
Afiriki ntolantantɔnw ka ɲɔgɔndanw taali tako filanan daminɛna jumadon. Mali ka cɛbɔ fila, n’o ye Joliba min bɛ ntolantantɔnw ka ŋanaɲinin na ani Sitadimaliyɛn min bɛ kɔnfederasɔn kupu la, u y’u ka balontanw kɛ sibiri tɛmɛnnen in sɛtanburukalo tile 14 san 2024.
Ntolantanna 27 welelenw na degelikaramɔgɔ nɔnabila Badara Alu Jalo fɛ, seegin de ma ye. Olu ma se ka ma ka da kun dɔw kan. I n’a fɔ ntolantannaw ɲɛmɔgɔ Hamari Tarawele, Amadu Hayidara n’a bɛ wele Dudu, Nene Dɔrizelɛsi, Masajo Hayidara.
Nin kuma tun bɛ mɔgɔw da kɔnɔ kabini waati jan ; sisan a kuma forobayara ; Ganbi degelikaramɔgɔ kɔrɔ Tɔmu Sɛnfiye, ni Bɛliziki jamanaden don, a sugandira ka kɛ Mali Sɛgɛw degelikaramɔgɔ kura ye.
