Sudelikanw ani mariton mankanw tun gannen bɛ nɛgɛw la cakɛda « Rostec » kɔnɔ taamakɛlaw bɛ yen waati min na. Zenerali darimɛ Asimi Goyita n’a nɔfɛjamaba yamaruyara donni na yen Kazan zuwɛnkalo tile 26 san 2025. Helikɔputɛri dilan cakɛda in ɲɛmɔgɔba yɛrɛ de bilala u ɲɛ ka yɔrɔw yaala. Cakɛda don min lakodɔnnen bɛ diɲɛ fan caman fɛ. Helikɔputɛri suguya minnu bɛ wele « Mi », olu dilanyɔrɔ don. U jɔyɔrɔ ka bon kosɛbɛ lakananbaaw walima maabaw donini na.
Tɛmɛnsiraw kɛrɛ filaw fɛ izinin in kɔnɔ, baarakɛlaw tun bɛ yɛlɛnni na. Yanfɛ,
kabinɛ (bolibaa sigiyɔrɔ) dɔ labɛnnen tun don ; yenfɛ, helikɔputɛriw
jɔ-jɔlen don. Gɔfɛrɛnaman minisiri minnu tun b’a kɛnɛ kan, jamanakuntigi ka
baarakɛkulu mɔgɔw ani fɛɛrɛko baarakɛla wɛrɛw, bɛɛ tun b’a la k’a ɲinin ka
fɔtaw lamɛn mankanw n’u ta bɛɛ yɔrɔ in na. Minɛn min bɛ Irisikan bayɛlɛma
tubabukan na, o tun bɛ Mali jamanakuntigi tulo la u ɲɛminɛbaa ka fɔtaw
faamuyali kama. Fɛn minnu ka kan ka lajɛ yɔrɔyaala in kɔnɔ, sɛbɛnniw kɛlen tun don
k’o bɛɛ jira. Helikɔputɛri girimanba suguya minnu bɛ wele Mi-8MTV-1, olu bɛ ye
ka lasa ; ani mankan suguya minnu bɛ wele Mi-24, ka fara polisiw ka
helikɔputɛriw ni kasaarakɛyɔrɔw magɛnbaaw taw kan.
Furancɛlafanga jamanakuntigi Zenerali darimɛ Asimi Goyita y’a ɲinin a
nɔfɛjama k’a hakili to Irisila dɔnkow la k’u ɲɛmada u fɛ yiriwali kuntaala jan
kama, nafoloko kologɛlɛn, ani yɛrɛya fangama kama. Bɛnkansɛbɛn bolonɔbilalenw
ko suguya caman na, walasa ka se k’olu sɛmɛntiya, a ɲuman tun ye ka fɛn dɔw ye
ka lasa ; i n’a fɔ dɔnniyaw latɛmɛnni.
O de kɛra izinin in sugandikun ye ka taa ɲɛ da o kan, kɛrɛnkɛrɛnnenya la
lakananbaaw ka minɛnw dilanyɔrɔ ; o min ye Mali hami ye bi. Dannaya kɔnɔ, Irisila
cakɛda in y’a ka da bɛɛ yɛlɛ Mali cidenkulu ye u ka se ka dɔnniyaw lajɛ
yiriwali ani izininko kɛcogo ɲuman waleyali kama, lafasa ni sɔrɔdasi kɔrɔw ka
minisiri ka ɲɛfɔli la.
Pankurun dilannenw sifilɛkɛnɛ min jirala Mali jamanakuntigi la, o yɔrɔ in na, a tun b’a kunbɔ mɔgɔ ye, min hami ye lakananbaaw ka pankurunko ye. Zenerali de kɔri darimɛ Sajo Kamara bolo, Tatarisitan izinin in bɛ mɔgɔ hakili jigin ko caman na : Tatarisitan min ye Irisila kɔnɔ jamana dɔ ye, o gɔfɛrɛnaman y’a ŋaniya k’a sekow jira u la izininko la a ka jamana kan, kɛrɛnkɛrɛnnenya la lakananbaaw ka helikɔputɛriw an’u ka mɔbiliw. Minisiri ka fɔ la, an dabali banna aw ka nin izinin ninnu cogoyaw la. Sisan an y’a dɔn an bɛ Irisila minɛn minnu labaara kɛlɛdagaw la, u ɲɛ, an’u kologɛlɛya sababu ye fɛn min ye. An y’u cogoya faamuya kɛlɛdagaw la. Nin ye ɲɛmadako ye anw bolo waati nataw la ka nin sira kelen in minɛ.
Dɔkala Yusufu JARA
Alasani SULEYIMANI
Rédaction Kibaru
Zenerali de diwisɔn Abudulayi Mayiga da sera gɛlɛya minnu bɛ Malidenw kan kɔkan sɛbɛn nafamaw kunkan, kɛrɛnkɛrɛnnenya la Kariti NINA, kariti biyometiriki, pasipɔri. Maliden minnu sigilen bɛ Ɛsipaɲi, olu fana da sera nin fɛn ninnu ma, ani k’a ɲinin Mali ɲɛmɔgɔw fɛ u ka bolonɔ.
Mali cidenklu taara a ɲɛ da Kazan cakɛda « Rostec » kan kunun. O ye helikɔputɛri dilanyɔrɔba lakodɔnnen ye diɲɛ kɔnɔ. U ye Yadaran baarakɛla dɔw fana bisimila ; o cakɛda in de bɛna Mali sanubɔgɔ koli izinin jɔ pankurunjiginkɛnɛ masurunna na Senu Bamakɔ.
