Minisiriɲɛmɔgɔ Zenerali de diwisɔn Abudulayi Mayiga sera Sewili Ɛsipaɲi sibiri zuwɛnkalo tile 28 san 2025, diɲɛ tɔgɔla lajɛba 4nan na yiriwali musakako kunkan. O lajɛba in bɛ daminɛ bi ntɛnɛn zuwɛnkalo tile 30 k’a kuncɛ zuluyekalo tile 3, dugu lajɛkɛsoba la. Minisiriɲɛmɔgɔ selen Andaluzi mara in kɔnɔ, AES jamanaden (Mali, Burukina Faso ani Nizɛri) minnu bɛ yen, olu sɛbɛkɔrɔ bɔra k’a kunbɛn.
A ni jamaba bɛ nin taama in na ; nafoloko ni wariko minisiri Aluseni Sanu, kɔkankow ni diɲɛ tɔnbaw cɛ koɲɛnabɔ minisiri Abudulayi Jɔpu, saniya ni yiriwali kuntaala jan minisiri Madamu Dunbiya Mariyamu Tangara, muso ni den ani denbaya ɲɛtaa minisiri, Mali ka lasigiden min bɛ Ɛsipaɲi Zenerali Abudaramani Babi, ka fara jamanakuntigiso ni minisiriɲɛmɔgɔso laadibaa dɔw kan.
Kunun, Maliden minnu sigilen bɛ Ɛsipaɲi, olu y’u haminankow dantigɛ minisiriɲɛmɔgɔ ye, AES jamana fila tɔ minnu mɔgɔw bɛ yen olu fana tun b’a kɛnɛ kan.
U ka gɛlɛya fanba dantigɛlenw ye hadamadenya sɛbɛn nafamaw lasɔrɔbaliya ; kɛrɛnkɛrɛnnenya la kariti NINA, kariti biyometiriki, pasipɔri ani wiza. U ka tɔn ɲɛmɔgɔba Tata Keyita ka fɔ la, o sɛbɛn ninnu nafa ka bon kosɛbɛ u dabolo labɛnni na Ɛsipaɲi ɲɛmɔgɔw bolo ani u kɔseginko la Mali kɔnɔ don nataw la. Walasa ka se k’o kɛ, A y’a ɲinin Mali ka kɔnsula dɔ dayɛlɛ yen ; ani ka damakasili kɛ bɛnkan dɔ tali la Mali ni Ɛsipaɲi cɛ u ka ɲɛnamaya kɛcogo ɲuman na basigi kama, tuma min na n’u bolo bɔra baara la k’a sababu kɛ si kɔrɔbayali ye. A y’a ɲinin fana, pankurun ka se ka sɔrɔ ka bɔ Ɛsipaɲi ka sin Mali la ka da maliden hakɛ caya kan yen.
Mamadu Jakite min ye Ɛsipaɲi Malidenw ka jɛkuluba kuntigi ye, o y’a ɲinin u sen ka don Banako jigisigi asuransiko (Amo) la. A k’u sago don fana ka se ka dɔ sɔrɔ gɔfɛrɛnaman ka so jɔtaw (mɛzɔn sosiyo) la. K’aw ladɔnniya fana, ko Maliden ninnu ma na laɲinin dama kama minisiriɲɛmɔgɔ la. U fana b’a fɛ k’u jɔyɔrɔ fa jamana jɔli kura la, ka jamana dɛmɛn a ka dunkafa laɲinin sabatili la.
O siratigɛ la, a ka di u ye ka dɔnniyabaw sɔrɔ sɛnɛ sɔrɔ jiidicogo la ani sɛnɛfɛnw bayɛlɛmani na ; ka da a kan ko u caman de bɛ foro kɔnɔ baaraw la Ɛsipaɲi yen. O la, a ka di u ye fana, ka foro labɛnnenw sɔrɔ u ka jamana kan, fo ka sɛnɛkɛjuru fana sɔrɔ jamana ɲɛmɔgɔw bolo a poroze suguyaw waleyaliko la.
AES jamanaden minnu sigilen bɛ Ɛsipaɲi, o caman tun bɛ lajɛ in kɛnɛ kan
Maliden minnu sigilen bɛ Ɛsipaɲi, olu ye laɲinin minnu kɛ minisiriɲɛmɔgɔ la a nɔfɛmɔgɔw cɛla, Mali ka lasigiden da tun sera a caman ma a ka bisimilali kɔrɔfɔ kɔnɔ. Sira ɲuman bɛ Mali ni Ɛsipaɲi cɛ. Zenerali Abudaramani Babi ka fɔ la, Ɛsipaɲi ye sira kura minɛ a ni Afiriki cɛ jɛkabaara la ; kɛrɛnkɛrɛnnenya la ni saheli kungo jamanaw ye. A y’a jira ko Maliden 60.000 de sigilen bɛ Ɛsipaɲi dugukolo kan. A ye foli di gɔfɛrɛnaman ma a a cɛsiri la malidenw kunkow ɲɛnabɔli hukumu kɔnɔ Ɛsipaɲi.
Jaabili la, minisiriɲɛmɔgɔ y’a sara u la Bamanankan na, ko a Maliden ɲɔgɔnw lamɛnni ye wajibi ye jamana ɲɛmɔgɔw bolo. Zenerali de diwisɔn Abudulayi Mayiga ye jigisigi kɛ, k’u ye gɛlɛya minnu kofɔ, olu bɛ sigikafɔba jamana jɔli kurako la, o laɲinin 517 kofɔlenw kɔnɔ. Fɛn min ye jamana kunkanko tɔ ye, minisiriɲɛmɔgɔ y’a jira ko an bɛ don min na jamana lakananbaaw bɛ fan bɛɛ fɛ, ka fara jamana tɔgɔla baarakɛla tɔ kan. A y’a ɲinin Maliden bɛɛ fɛ, an ka fara ɲɔgɔn kan k’an fanga kɛ kelen ye kojugubakɛ kɛlɛli la. Zenerali de diwisɔn Abudulayi Mayiga ye layidu ta, ko tɛmɛn bɛna kɛ ni waleya sennaminɛnenw ye u haminankow ɲɛnabɔli la.
A y’a jira fana, ko cakɛda dɔ bɛna sigi senkan hadamadenya sɛbɛnkow ɲɛnabɔli kama, min b’a to fura jɔnjɔn ka se ka sɔrɔ u ka sɛbɛnkogɛlɛyaw la. O n’a ta bɛɛ, minisiriɲɛmɔgɔ y’a jira ko gɔfɛrɛnaman ŋaniya ye cogoya ɲumanw sigili ye senkan Malidenw toli la jamana kɔnɔ k’u ka baaraw kɛ.
A y’a ɲinin u fɛ fana, u kafolen ka to, ka ɲɔgɔn dɛmɛn ani k’u sigiyɔrɔ jamanaw ka sariyaw labato. A ko Maliden kelen o kelen, i bɛ yɔrɔ o yɔrɔ la, i ka kan ka kɛ lasigiden ye jamana tɔgɔ makaranni na. A sɔrɔla ka foli lase Ɛsipaɲi faamaw, ani AES fasojama ma an’a nɔfɛjama kunbɛnko ɲuman na. AES ani Mali fasaw dara lajɛ in daminɛtɔ.
Dɔkala Yusufu JARA
Sɛki Mukutari TARAWELE
Rédaction Kibaru
Mali cidenklu taara a ɲɛ da Kazan cakɛda « Rostec » kan kunun. O ye helikɔputɛri dilanyɔrɔba lakodɔnnen ye diɲɛ kɔnɔ. U ye Yadaran baarakɛla dɔw fana bisimila ; o cakɛda in de bɛna Mali sanubɔgɔ koli izinin jɔ pankurunjiginkɛnɛ masurunna na Senu Bamakɔ.
Mali cidenklu taara a ɲɛ da Kazan cakɛda « Rostec » kan kunun. O ye helikɔputɛri dilanyɔrɔba lakodɔnnen ye diɲɛ kɔnɔ. U ye Yadaran baarakɛla dɔw fana bisimila ; o cakɛda in de bɛna Mali sanubɔgɔ koli izinin jɔ pankurunjiginkɛnɛ masurunna na Senu Bamakɔ.
