Cɛfɔli hukumu kɔnɔ, o min hakilila tara minisiriɲɛmɔgɔ kɔrɔ Usumani Isufi Mayiga fɛ, ni fanga taasira sariya ɲɛbila poroze bɛn sɔrɔli la jamana kɔnɔ, o kolabɛnkulu ɲɛmɔgɔ don, politikiɲɛmɔgɔ 11 minnu tun minɛna ka datugu kaso la, olu labilala fɔlɔ kunun. N’o ye Musutafa Dikɔ (Adema-PASJ), Yaya Sangare (Adema-PASJ), Mamadu Tarawele (Politikitɔn Uniyɔn ɲɛmɔgɔ), Mulayi Hayidara (Pdes), Sanba Kulubali (politikitɔn Nema), Abudaramani Korera (Asma), Laya Gido (ADRP), Adama Mayiga (RPM), Male Kamara (CNDR), Amadu Tarawele (Alternative pour le Mali) ani Mohamɛdi Ali Bacili (M5-RFP Mali kura).
U tun minɛna kabini zuwɛnkalo tile 20 san 2024 tɛmɛnnen in minisiri kɔrɔ Musutafa Dikɔ ka so, k’u lamara bolo kɔrɔ kaso la zuwɛnkalo tile 25 san 2024, Bamakɔ faaba komini 5nan sɛgɛsɛgɛli kiiritigɛla dɔ fɛ, k’a sababu kɛ « fanga ka bɛnkan talen dɔ sɔsɔli ye ». Sabula sariya tun y’a jira ko politikitɔnw ani tɔn minnu bɛ politiki kɛ, u ka baaraw ka soronsoron fɔlɔ fo ka taa a fɔ sira dira u ma kokura. O bɛnkan in tun tara awirilikalo tile 10 tɛmɛnnen in.
Politikiɲɛmɔgɔ labilalen ninnu ka soronadonbaa dɔ, min ma sɔn k’a bugunnatigɛ fɔ, o ɲininkalen telefɔni fɛ, a y’a jira ko politikiko bɛ ko in na kosɛbɛ ka tɛmɛn kiiriko kan. Nka min jɛlen don, cɛfɔli de jɔyɔrɔ bonyana u labilali la kosɛbɛ. A labanna k’a jira ko minisiriɲɛmɔgɔ kɔrɔ Usumani Isufi Mayiga bɔra u fɛ yen Kɛɲɛroba kasobonba la sibiri tɛmɛnnen in, k’u kumaɲɔgɔnya. O kɔrɔfɔ kɔnɔ, cɛfɔlikɛla in y’a jira u la, k’ale bɛna a seko jira u labilali kama. O de kosɔn politikiɲɛmɔgɔ ninnu labilali ka bɔ kaso la fɔlɔ, o laɲinin kɛra ntɛnɛn desanburukalo tile 2 san 2024. O kɛlen kiiritigɛla y’o sɛbɛn kelen in lase komini 5nan kiiritigɛso la o dugu jɛ tarata. Minisirilajɛ min kɛra araba desanburukalo tile 4, politikiɲɛmɔgɔ 11 ninnu labilali laseli kɛra. Soronadonna in y’a ka nisɔndiya jira u labilali la fɔlɔ.
Fanga taabolo sariya ɲɛbila poroze bɛn sɔrɔli la jamana kɔnɔ, o kolabɛnkulu ɲɛmɔgɔ ka wulikajɔ kuncɛra ɲuman na ni politikiw walangatali ye. Sabula politikitɔn ɲɛmɔgɔ minnu labilalen filɛ, o bɛna ni fiɲɛbɔda ye politikiko ni hadamadenya gɛlɛya la. Ani bɛɛ sendonni fasoko la, ka ba don furancɛlafanga ɲɛmɔgɔw k’o hakilila in na. An bɛ se k’a fɔ, ko foroba fanga ni politikitɔnw bɛ ka baara kɛ ɲɔgɔn fɛ furancɛlafanga tiimɛko ɲuman siratigɛ la ani seginni na sariya ma jamana maracogo la.
An hakili b’a la nowanburukalo tile 12 san 2024, kuuru dapɛli ye laɲinin kɛ, ko ka sariyasɛbɛn in lasegin jamana ka hakɛw lafali kiiritigɛlila ma, a k’a hakililaw fara a kan. O furancɛ la, cɛfɔli jɔyɔrɔ yera kow la, sabula mɔgɔ minnu tun minɛna ka datugu olu labilala. Sanni ka politikiɲɛmɔgɔ 11 ninnu dalajɛ ɲɔgɔn kan Kɛɲɛroba kasobonba la, u tun tilalen don Bamakɔ, Kulukɔrɔ ani Dɔyila kasobonw cɛ.
Dɔkala Yusufu JARA
Namori KUYATE
Dɔkala Yusufu Jara
Kunnafoni, numeriki sɔrɔ ni fanga ka baara yɛlɛma kura minisiri tun ye mɔgɔ welelen ye Mali Kura Taasira 3 jɛmukan kɛnɛ kan, min labɛnna Mali kunnafoni latɛmɛnni n’a gansili cakɛda (SMTD) la Kati sira la. O cogoya la, Alihamudu Agi Iliyɛni da sera ko jɔnjɔnba saba ma, minnu b’a k.
Furu ɲɔgɔn fatuli ye ko ye, min degun ka bon kosɛbɛ an sigida la furusira kɔnɔ cɛyanfan ani musoyanfan. Wa furu kura sɔrɔli a tigilamɔgɔ dɔ fɛ, o ka gɛlɛn n’a tɔ bɛɛ ye, ka da hakilila juguw kan.
Mali furancɛlafanga jamanakuntigi Zenerali darimɛ Asimi Goyita, tarata, sariya n°2025-029/ min tara zuluyekalo tile 08 san 2025 yɛlɛma donni na furancɛlafanga taabolo la, o waleyali yamaruya di, a ma dɔgɔkun kelen bɔ bulonba jɛnnen kɔ n’a ye..
Ala kana a kɛ, n’o tɛ ni jisonko kɛra, denbaya dɔw bɛ u sigiyɔrɔw bila. Dɔw yɛrɛ fana b’u sigi ka Ala makɔnɔ, ko a mana ɲɛ cogo min na.
Taamako cakɛdaw ka fɔ la, kasaara seereyasɛbɛn (PV) dilanni de bɛ waati jan ta. O de kosɔn k’u bɛ se ka dɔ da kalo kan tuma dɔw la fo ka se san ma, k’a sɔrɔ asurelen ma bila a hakɛ kɔnɔ.
Denmisɛnw bɛ ka kalan bila ka firi Kɔfilacɛ damanda kan Kangaba sɛrɛkili kɔnɔ kosɛbɛ sisan. Cɛmannin fara musomannin kan, u kɛlen bɛ ka Kɔfilacɛ damandaw fa tewu digɛn senni ani damanbɔgɔw koli kama sanu nɔfɛ. U bɛ firi dugukolo jalan kan i ko fɛn wɛrɛ, k’u jigi dalen to sa.
