Nin sariya poroze in, bulonba jɛnna ni min ye, o tun kɔkɔrɔmadonnen bɛ
minisiriɲɛmɔgɔ dɛmɛnni minisiri fɛ ka ɲɛsin politiki yɛlɛma kuraw ani kalataw
senkɔrɔmadonni ma Mamanin Nasire fɛ. A ka fɔ la, jɛnni ni nin poroze kura in
ye, o b’a to kuntilenna kura ka ta politikiko nasira la jamana basigiliko la ka
kɔn ko caman wɛrɛ ɲɛ. Kɔnseye 131 minnu tun b’a kɛnɛ kan, o bɛɛ jɛnna ni sariya
in ye.
Jɛnni ni nin sariya in ye, o kɛra jamana jama fangamaw ni kɔkanmalidenw ka
hakilila falenw kɔfɛ awirilikalo tɛmɛnnen in na. O sigikafɔbaw ye laɲinin kɛ, kɛrɛnkɛrɛnnenya
la, furancɛlafanga taabolo sariya ka latilen, ka Zenerali Asimi Goyita sigi Mali
jamanakuntigiya la san 5 kuntaala min bɛ se ka mɔɔnɔbɔ ; k’o daminɛ san 2025
in yɛrɛ kɔnɔ, i n’a fɔ o kɛra AES kɔnfederasɔn jamanakuntigi tɔw ye cogo min na.
Bulonba jɛnna n’a ye fana, gɔfɛrɛnaman ka sariya dɔw ta waatiw la, waati
minnu ni kɔnseyew tɛ sigi la.
O sariyasɛbɛn tun kɔkɔrɔmadonnen bɛ minisiriɲɛmɔgɔ dɛmɛnni minisiri fɛ ka ɲɛsin
politiki yɛlɛma kuraw ni kalataw senkɔrɔmadonni ma. Kɔnseye 131 minnu tun bɛ
kɛnɛ kan, o bɛɛ jɛnna n’o ye. Ani laban na, u jɛnna ni sariya ŋaniya sirilen
ye, min bɛ sariya n°2025-002/PT-RM min tara zanwuyekalo tile 27 san 2025, ka fasodenw
ka kologɛlɛya ani cakɛda minnu sirilen b’o la Mali kɔnɔ (Malidenko), o musakali
yamaruya. O sariya bolonɔbilala Bamakɔ desanburukalo tile 06 san 2024, gɔfɛrɛnaman
ni diɲɛ jɛkulu min ɲɛsinnen bɛ yiriwali ma (IDA) olu cɛ. O sariya in tun
kɔkɔrɔmadonnen bɛ kɔkanmalidenw ni Afiriki donɲɔgɔnna minisiri Mosa Agi Atahɛri
fɛ. Kɔnseye 130 minnu tun b’o kɛnɛ kan, o bɛɛ jɛnna n’o ye. Bulonba jɛnni ni nin
sariya minnu ye, o baaraw de kɛra ka kɔnseyew ka sigi kuncɛ.
SARIYA BI NAANI NI KƆ- Bulonba kuntigi
Zenerali de kɔri darimɛ Maliki Jawu y’a jira a ka kɔrɔfɔ kɔnɔ, ko awirilikalo
sigi ye sariya ŋaniya sirilen bi naani ni kɔ de sɔrɔ k’u sɛsɛfɛsɛ ka jɛn n’u
ye ; sɛbɛn caman b’u la minnu tun tara gɔfɛrɛnaman fɛ k’a sɔrɔ kɔnseyew tɛ
sigi la. O dɔw tun bɛ wariko bɛnkanw kan ka se ka musaka dafaw sɔrɔ ka bila
jamana ka bolo kan. A bɛ dabɔ ka se ka kuranko, denmisɛnw ka baarako, dunkafa
sabatili, sirakow ani yiriwali disidakow kunbɛn.
Zenerali de kɔri darimɛ Maliki Jawu y’a ka nisɔndiya jira jɛnni na ni
sariya ninnu ye, n’a dɔw laɲinin ye ka se ka dɔ bɔ bulonba kɔnseyew ka
ladiyaliwari an’u ka nafa sɔrɔta wɛrɛw hakɛw la. A y’a ka nisɔndiya jira fana,
Nizɛri bulonba sigili la a tile damadɔ ye nin ye. A ka fɔ la, AES
kɔnfederasɔn jamana saba ninnu bɛ ka bulonba b’u bolo. O bɛ dayɛlɛ kɔnfederasɔn
tɔgɔla bulonba fana sigili ye, hakilila falen kɛnɛw sigili kama demokarasi kɔnɔ,
sariyaw mabɛnni ani kɔnfederasɔn ka baara kɛtaw kɔlɔsili kama, bulonba kuntigi
ka fɔ la.
Dɔkala
Yusufu JARA
Bɛnbabilen
DUNBIYA
Bembablin DOUMBIA
Furancɛlafanga sariya kura in kosɔn, Zenerali Asimi Goyita bɛ jamanakuntigiya jɔyɔrɔ fa a ɲɛma san 5 kuntaala, min bɛ se ka mɔɔnɔbɔ siɲɛ hakɛ la n’o b’a kunbɔ fo ka jamana basigi tuma min na. Wa a bɛ se fana k’a kanbɔ jamanakuntigiya nɔfɛ a ka furancɛlafanga bannen kɔfɛ.
Kolonɛli-mazɔri Amadu Makan Sidibe, lafasa ni sɔrɔdasi kɔrɔw minisiriso ka wariko ni minɛnko ɲɛmɔgɔba, Kolonɛli Badara Aliyu Jɔpu, taamako ɲɛmɔgɔba lakananbaaw ka minɛnko ni tajiko ɲɛmɔgɔso (DMHTA) la ani Seyidu Dikɔ, ciden wariko kɔlɔsilikɛla cakɛda « Guo-Star » ka bɛn.
Lafasa ni sɔrɔdasi kɔrɔw ka minisiri ye taama kɛ Kidali jumadon, a ma san fila bɔ o dugu in bɔɔsilen kɔ kojugubakɛlaw n’u dɛmɛnbaaw la Mali sɔrɔdasiw fɛ. Zenerali de kɔri darimɛ Sajo Kamara tun taalen bɛ ni furancɛlafanga jamanakuntigi Zenerali darimɛ Asimi Goyita ka bɛn cikan.
Minisiriɲɛmɔgɔ dɛmɛnni minisiri Mamanin Nasire ka ɲɛsin politiki yɛlɛma kuraw ani kalataw tɛmɛnsira senkɔrɔmadonni ma, o y’a jira kunun kunnafonidilajɛ dɔ senfɛ, ko politikitɔnko sariya ni fanga sinamatɔnw ɲɛmɔgɔba jɔyɔrɔ binna, wa ko politikitɔn bɛɛ ani jɛkulu fɛn o.
Kojugubakɛlaw ka binkanni n’a ta bɛɛ sigimajɔyɔrɔw kan Bamakɔ dɔgɔkun tɛmɛnnen in, Mali ka yɛrɛmahɔrɔnya sɔrɔli sanyɛlɛma 64nan laɲɛnamatali seli, n’a bɛ wele sɛtanburukalo tile 22, o wulikajɔw kɛra an ka jamana kɔnɔ..
