Lafasa minisiri n’a nɔfɛjama tun don, Mali sɔrɔdasiw ɲɛmɔgɔba Zenerali de diwisɔn Umaru Jara b’o la. Taama in kun tun ye ka se ka sɔrɔdasi minnu dagalen bɛ yen, k’olu dabolo dɔn, marako bɛ dankan min na ani Kidali sigidalamɔgɔw yɛrɛ bɛ cogo min na hali n’a tɛ san fila dafa fɔlɔ dugu bɔɔsilen kɔ Mali sɔrɔdasiw fɛ nowanburukalo tile 14 san 2023. Nɛgɛ kanɲɛ 7 masurunnaw na, Zenerali de kɔri darimɛ Sajo Kamara ka pankurun cunna Kidali.
Kidali mara gɔfɛrɛnɛri Zenerali de diwisɔn Ɛlihaji Agi Gamu y’a kunbɛn pankurunda la. A kɛlen kɔ ka foli bila lakananbaaw la kɛnɛ kan, u sɔrɔla ka taa Kidali sɔrɔdasikan n°2 la, ka taasibila kɛ ka ɲɛsin mɔgɔ binnenw ma kɛlɛdagaw la, ka fara siwiliw fana kan.
Zenerali de kɔri darimɛ Sajo Kamara fɔlɔla ka Ala fo k’a barikada u ka kunnadiya sɔrɔli la, ka Kidali dugumɔgɔw labɔ kɛlɛ bulen san 2012 marisikalo tile 30. A y’a jira ko ale tɔɲɔgɔn caman ni tora o senfɛ. O de kosɔn a k’u kɔseginna ka na taasibila kɛ ka ɲɛsin olu ma. Zenerali de kɔri darimɛ Sajo Kamara ka fɔ la, Kidaliko kɛra jolifɔn ye Mali sen na bi. A ko a tɔɲɔgɔn minnu ni tora yan, se ma k’u la. Ka da a kan u ka wulikajɔ ma kɛ fosi ye jamana dugukolo kunmabɔli kɔ ka Mali ka yɛrɛmahɔrɔnya lakanan. Taasibila kelen o kelen yan, o ye layidu lakurayali ye. Wa ko kaburu kabakurun kelen o kelen bɛ nin tariku kofɔ.
Minisiri Kamara ye jigisigi kɛ, ko jamana in bolo jannen bɛ bɛn sɔrɔli hakilila ɲumantigi bɛɛ ye. Nka ko fini nɔgɔ kɔni bɛ ko so kɔnɔ. O b’a jira ko Mali kɔnɔ gɛlɛyaw bɛ furakɛ Malidenw yɛrɛ dama cɛ ka sinsin bɛn ani fɔkabɛn sariya kura kɔnɔko kan, min labɛnni baara labanw bɛ sen na. Fɔkabɛn ye wajibi ye ; nka a bɛ kɛ ka kɛɲɛ n’an taabolo ye. A labanna ka dugawu kɛ mɔgɔ o mɔgɔ ni tora Maliko la.
Taasibila kɛlen ka ɲɛsin lakananbaa binnenw ma, Zenerali de kɔri darimɛ n’a nɔfɛjama sinna gɔfɛrɛnora la. Jama bɔra dugu fan bɛɛ fɛ k’u tɛmɛntɔ fo ni nisɔndiya ye, Mali darapo b’u bolo, a sɛbɛnnen bɛ walanninw kan dɔw bolo ko, Ala ka Mali kɛnɛ to !
LAKANAN DABALI ƝUMAN TIGƐLENW- Bɔ kɛlen gɔfɛrɛnora la, Sajo Kamara ni lakananbaaw ye kumaɲɔgɔnya kɛ sɔrɔdasikan n°2 kɔnɔ. O lajɛ senfɛ, Kidali mara sɔrɔdasiw ɲɛmɔgɔba Kolonɛli-mazɔri Dawuda Sagara y’a jira ko kabini Kidali bɔɔsira juguw la nowanburukalo tile 14 san 2023, olu bɛ wulikajɔ la sanga ni waati bɛɛ la, basigi sabatiliko la ani ka tɛmɛn ni sɔrɔdasiw sannayɛlɛnni waleyaw ye marayɔrɔ kɔnɔ. Ka da a kan sɔrɔdasiw dagayɔrɔ bɛɛ la, lakanan dabali ɲumanw tigɛlen don, wa labɛnw kɛlen don ka bila wulikajɔ kama ko kana bala an na, kunnafoniko fana cogoya ka ɲin kosɛbɛ. Nin bɛɛ kun ye lakananbaaw yɛrɛ lakananko ɲuman ani mununmununsaalow kɛcogo ɲuman ye, ka juguw ɲinin k’u daji, min b’a to basigi ka sabati koɲuman Kidali mara kɔnɔ.
Walasa ka se k’u ka baaraw mɔɔnɔbɔ ka se yɔrɔw la, halibi minnu tɛ lakananbaaw sago la koɲuman, Kolonɛli-mazɔri Dawuda Sagara y’a jira ko u bɛ jateminɛw na kabini san 2024 fo 2025 in kɔnɔ, sɛrɛkiliw ni komini dɔw kɔnɔ ; i n’a fɔ Tin-Esako, Abeyibara, Bugeyisa ani Tinzawatɛni ni pankurunw ni doroni TB2 ka dɛmɛn ye. O kɛlɛ dɔw kɔfɛ, kojugubakɛla dɔw y’u mabɔ ka taa u daga Mali ni Alizeri dancɛw la Tinzawatɛni, Talihandaki, In-Halidi ani In-Afaraki, k’u kalifa don Alizeri la. O n’a ta bɛɛ kɛlɛw bɛ sen na marayɔrɔ mumɛ basigiliko la.
Kolonɛli-mazɔri
Dawuda Sagara ka fɔ la, n’u ɲɛmɔgɔw ka senkɔrɔmadonni ye, olu sera ka baara dɔw
kɛ siwili kunda ani lakananbaa kunda fo ka sigidalamɔgɔw dɛmɛn ni kɛnɛyafuraw
ye. O waleyaw bɛnna dugu caman ma. A k’u bɛ dɛmɛn suguya wɛrɛw kɛ, kɛrɛnkɛrɛnnenya
la ka gɔfɛrɛnaman baarakɛlaw ta ka taa u bila u taayɔrɔw la, u ka baaraw yɛlɛma
o yɔrɔ minnu na ani dunkafa sabatili komisariya bɛ balo minnu di, olu laseli u
laseyɔrɔw la marayɔrɔ kɔnɔ.
Fɛn min ye siniɲɛsigikow ye, Kolonɛli-mazɔri y’a jira k’u b’a la ka dɔ fara
basigi fanga kan ni sɔrɔdasiw dagayɔrɔ kuraw sigili ani mununmununsaalo cayali ye
« Dugukoloko » laɲininw sabatili kama. A ye foli ni tanuni lase
sɔrɔdasiɲɛmɔgɔw ma u ka cɛsiri la yɛlɛma ɲuman donni na kɛlɛcɛw ka ɲɛnamaya
kɛcogo an’u dabolo la, ka sɔrɔ ka gɛlɛya dɔw kofɔ ; kɛrɛnkɛrɛnnenya la
kuranko ani jiko Kidali mara kɔnɔ. Nka a ko nin gɛlɛyaw n’u ta bɛɛ, ale n’a ka
cɛdenw cɛsirilen don k’u jɔyɔrɔ fa a ɲɛma.
SEBAAYA BƐN
JUGUW KAN- jaabili la,
lafasa ni sɔrɔdasi kɔrɔ ka minisiri y’a jira ko furancɛlafanga jamanakuntigi de
y’a ci ka na lakananbaaw, marakɛlaw ani sigidalamɔgɔ bɛɛ kunnafoni ɲinin,
walasa ni gɛlɛyaw bɛ yen, ka fura ɲinin olu la. A ko waati kɔni ka gɛlɛn, nka
ko a dalen b’a la ko lakananbaaw bɛna sebaaya sɔrɔ bɛn juguw kan.
A ye taasibila kɛ ka ɲɛsin bɛɛ ma, minnu binnen kɛlɛdagaw la. A k’u joli bɔnni tɛna kɛ fu ye jamana bolo, u bɛ kɛlɛ kɛ halibi jamana ka yɛrɛmahɔrɔnya an’a danbe nɔfɛ. A ye jigisigi kɛ, ko jamanakuntigi ka yamaruya kɔnɔ, gɔfɛrɛnaman bɛ wulikajɔ suguya bɛɛ la, min b’a to an tɛgɛ bɛ se ka da mɔgɔ minɛnenw kan. Hakililajigin na, mɔgɔ dɔw ye kɛlɛ kɛ ka kɔn an ɲɛ walasa Mali ka se k’a ka yɛrɛmahɔrɔnya sɔrɔ. O la, a bɛ wajibiya anw fana ma ka kɛlɛ kɛ an ka jamana basigili nɔfɛ walasa ka se ka Mali kannabilalen yiriwalen to siniɲɛsigi ye.
Zenerali de kɔri darimɛ Sajo Kamara ko jamana ɲɛmɔgɔw bɛ cɛsiri la lakananbaaw bɛ se ka bila dabolo ɲuman kan cogo min na, u ka se k’u ka baaraw kɛ ni wasa ye. Baarakɛminɛn nafamaw sɔrɔlen kɔ, halibi dɔwɛrɛw fana bɛ kɔ ka na. Minisiri ka nin taama in senfɛ, a yera Kidali mara seko ni dɔnko ɲɛnajɛba kɛnɛ kan Kidali dugu kɔnɔ. A ye kɔrɔfɔ ta o kɛnɛ kan, ka foli ni tanuni di dugumɔgɔw ma an’a nɔfɛjama kunbɛnko ɲuman na.
A seginna k’a jira ko ale tun nanen bɛ ni furancɛlafanga jamanakuntigi ka bɛn
cikan ye. O la, a b’a ɲinin mɔgɔ murutilenw fɛ, u ka maramafɛnw bila ka fara
jamanaden tɔw kan, u ka jɛ ka Maliba in jɔ. A ni lakananbaaw ye surɔfana dun
ɲɔgɔn fɛ. Dugu jɛlen, u taara u ɲɛ da jamana bɔrɔtɔbaaw ka damandingɛ kɔrɔw
kan, an’u bolila ka taa k’u ka so minnu to u kɔ Kidali minɛni kɛlɛ kɔnɔnan na.
A ye Mali kura taasira jɛmukan labɛn k’a to nin taama in na Kidali.
Dɔkala Yusufu JARA
Bembablin DOUMBIA
Minisiriɲɛmɔgɔ dɛmɛnni minisiri Mamanin Nasire ka ɲɛsin politiki yɛlɛma kuraw ani kalataw tɛmɛnsira senkɔrɔmadonni ma, o y’a jira kunun kunnafonidilajɛ dɔ senfɛ, ko politikitɔnko sariya ni fanga sinamatɔnw ɲɛmɔgɔba jɔyɔrɔ binna, wa ko politikitɔn bɛɛ ani jɛkulu fɛn o.
Kojugubakɛlaw ka binkanni n’a ta bɛɛ sigimajɔyɔrɔw kan Bamakɔ dɔgɔkun tɛmɛnnen in, Mali ka yɛrɛmahɔrɔnya sɔrɔli sanyɛlɛma 64nan laɲɛnamatali seli, n’a bɛ wele sɛtanburukalo tile 22, o wulikajɔw kɛra an ka jamana kɔnɔ..
