Lɛrɛ kelen ɲɔgɔnna
pankurun na ka bɔ Musuku ka se Tatarisitan faaba Kazan, walasa ka nafoloko
jɛkabaara fura ɲɛ kura dayɛlɛ Mali ni Irisila cɛ. Furancɛlafanga jamanakuntigi
ŋaniya ye ka kɔnɔko don nafoloko la ni baarabaw ye. O yɛrɛ de ye jamanakuntigi
ka taama kunba ye Irisila, ka taa a ɲɛ da Tatarisitan kan, o min ye Irisila nafoloko
motɛri ye.
O cakɛda in lakodɔnnen bɛ kosɛbɛ ni waleya dɔw ye ko suguya caman na : petorosimi,
mɔbili dilan ani sɔrɔdasi pankurunko, dugujukɔrɔfɛnw ɲininni an’u bɔli mansinko,
sɛnɛkɛmansinko, adw. Tatarisitan ɲɛmɔgɔba « le Rayisi » Urusitamu
Minnikanɔwu Nurugaliyewisi ka fɔ la, diɲɛ bɛɛ bɛ pankurun « Mi » sidɔn ;
o bɛ dilan anw fɛ yan ani mɔbili « Kamaz » min bɛ kɛ sodanso ye arali
Pari Dakaro la. Ɲɛmɔgɔba in yɛrɛ kɛra o arali mɔbilibolila dɔ ye ka tɛmɛn.
Mali jamanakuntigi ni Tatarisitan jamanakuntigi, u fila ye ɲɔgɔnye kɛ Kazan
Kɛrɛmulɛn kɔnɔ ; lafasa ni sɔrɔdasi kɔrɔw ka minisiri Zenerali de kɔri
darimɛ Sajo Kamara ni Irisila lafasa minisiri-dankan Yunusu-Bɛki Yewukurɔwu tun
b’o kɛnɛ kan. O ɲɔgɔnye laban na, u sɔrɔla ka yamaruya di cidenkulu fila in ma
ka fara u kan lajɛ tɔ la. O ɲɔgɔnye sera k’a to u ka se k’u kuntilennaw jira
ɲɔgɔn na jɛkabaara kologɛlɛn sigili la senkan.
Tatarisitan jamanakuntigi ka fɔ la, jɛkabaara Mali ni Tatarisitan cɛ, o senna
ka suman. N’i y’a ye a y’o fɔ, sabula ɲɛɲininniw a ka jamana kan, o jaabiw k’u
yɛrɛ fɔ : jamana in fanga ka bon kosɛbɛ kɔkan feerew la ni jɛɲɔgɔn jamana 160
ni kɔ ye jagoko nasira la. Tatarisitan bɛ Wɔliga nafoloko mara mara, o mara
in tɔgɔ dalen bɛ ba Wɔliga » de la, min bɛ jamana cɛci. Irisila marayɔrɔ
nafamabaw dɔ don, ani yiriwalenbaw nafoloko nasira la. Tatarisitan ka sɔrɔfɛn
tilancɛ bɛ feere kɔkan, a jamanakuntigi ka fɔ la.
KA JƐƝƆGƆNYA SAMAN KA DON SƆRƆ KO CAMAN KƆNƆ - An b’a dɔn ko sɔrɔ kɛli sababu caman bɛ anw ka jamana in kɔnɔ, wa a ka di an ye ka jɛɲɔgɔnya sira kuntaala jan nafamaw don. Hakilila jɛlen b’an na an ka sɔrɔko la, an’an ka dɔnniyakow la. O de kosɔn ne nana ni minisiri caman ye nɔfɛ foroba taama na Irisila jamanakuntigi bara, ani yan, e ka jamana kɔnɔ. An ye kow daminɛ koɲuman ni cakɛda Yadaran sendonni ye sanubɔgɔ koli la.
Jamanakuntigi Goyita ko tuguni, an sago don k’a jɛɲɔgɔnya saman ka se sɔrɔ ko
caman ma, e yɛrɛ dɔnkoba ye minnu ye. An ye kumaɲɔgɔnyaw daminɛ kaban poroze
dɔw kan tajiko la, kɔɔri parataliko la ka kɛ gaarikisɛw ye, taamakow, angɛrɛko,
kalanko la. An sago don k’o porozew waleya. A ye nin dantigɛli in kɛ Tarisitan
jamanakuntigi n’a ka gɔfɛrɛnaman minisiri dɔw ɲɛkɔrɔ, ani izinin ɲɛmɔgɔ dɔw
fana tun b’a kɛnɛ kan.
Dɔkala Yusufu JARA
Alasani SULEYIMANI
Rédaction Lessor
Minisirw y’u ka laadalatɔnsigi kɛ juma zuluyekalo tile 04 san 2025 Kuluba, jamanakuntigiso la. A ɲɛmɔgɔya tun bɛ furancɛlafanga jamanakuntigi Zenerali darimɛ Asimi Goyita bolo..
Bɛnkansɛbɛn bolonɔbilalen kɔ jamana fila in cɛ Musuku, Wiladimiri Putini ni Asimi Goyita taara Kazan, « Tatarstan » lajɛ walasa ka taamasiyɛnba di Mali ŋaniya la nafoloko jɛkabaara yiriwali kama ni irisila n’a tɔndenjamanaw ye.
Waatiba foroba taama in kɔnɔ Irisila : Ɲɔgɔnye Asimi Goyita ni a tɔɲɔgɔn Irisila jamanakuntigi Wiladimiri Putini cɛ. U jamanakuntigi fila ka tɛgɛdiɲɔgɔnma jɛlen kɛra Kɛrɛmulɛn bisimilaso kɔnɔ nɛgɛ kanɲɛ 16 Musuku lɛrɛ la..
Jigisigi la, dɔ farali siraw kan Mali ni Irisi cɛ, nin taama in bɛ o hukumu kɔnɔ ani jɛɲɔgɔnya bolofara cayali.
K’a daminɛ nowanburukalo nata in tile 3 la ka se a tile 27 ma, cɛ ntolantanna minnu si hakɛ tɛ san 17 bɔ (U-17), olu tɔgɔla kupudimɔni bɛna kɛ Katari. Mali bɛ ye o kɛnɛ kan. A delila ka se fo o finali ma san 2015..
Bɛn ni fɔkabɛn bɛnkansɛbɛn ɲɛbila-poroze kolabɛnkulu ɲɛmɔgɔ, minisiriɲɛmɔgɔ kɔrɔ Usumani Isufi Mayiga n’a ka cakɛda mɔgɔw, u ye gɔfɛrɛnaman minisiriw kumaɲɔgɔnya alamisa tɛmɛnnen in minisiriɲɛmɔgɔso la, wulayanfan fɛ..
